သိုၵ်းမၢၼ်ႈယိုတ်းမိူင်း လၢမ်းလိမ်းယိုဝ်းၵွင်ႈလူင် ၵႂႃႇတၢင်းၾၢႆႇဢွၵ်ႇဝဵင်းလၢႆးၶႃႈသေ ႁဵတ်းႁႂ်ႈၵူၼ်းပိုၼ်ႉတီႈ တိုၼ်ႇသၢၼ်ႈ မႆႈၸႂ်ၵူဝ်ပဵၼ်ပၢင်တိုၵ်း။

ဝၼ်းတီႈ 30/9/2023 ယၢမ်းၵၢင်ၶိုၼ်း 10 မူင်းပၢႆ သိုၵ်းမၢၼ်ႈ ယိုတ်းမိူင်း ယူႇတၢင်းၾၢႆႇၸၢၼ်းဝဵင်းလၢႆးၶႃႈ ယိုဝ်းၵွင်ႈလူင် ၸူးတၢင်းၾၢႆႇဢွၵ်ႇဝဵင်း 5 လုၵ်ႈ ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇလူင် သိုၵ်းမၢၼ်ႈ ယိုဝ်းမႃးၶႃႈဢေႃႈ ၶဝ်လုၵ်ႉတၢင်းၾၢႆႇ ၸၢၼ်းဝဵင်း တီႈတပ်ႉပၢင်သဝ်းၶဝ် ဝၢၼ်ႈၸႅၼ်ႇၼၼ်ႉသေ ယိုဝ်းမႃး တၢင်းၾၢႆႇဢွၵ်ႇဝဵင်း တၢင်ႈဝၢၼ်ႈသၢင်းၼႆႉ 5 လုၵ်ႈဢေႃႈ။ မၢၵ်ႇၶဝ်မႃးတူၵ်းတႅၵ်ႇ လိၼ်ပေႃးသၼ်ႇလူင်ဝႆႉၶႃႈဢေႃႈ ႁဝ်းၶႃႈ တူၵ်းၸႂ် ၵူဝ်ၶဝ်ပဵၼ်ပၢင်တိုၵ်းၵၼ်ၶႃႈဢေႃႈ ၼွၼ်းပေႃး ဢမ်ႇလပ်းၶႃႈၶိုၼ်းၼၼ်ႉ”- ဝႃႈၼႆ။

ယၢမ်းလဵဝ် တၢင်းၾၢႆႇၸၢၼ်းလႄႈ ၾၢႆႇဢွၵ်ႇ ဝဵင်းလၢႆးၶႃႈၼႆႉ သိုၵ်းမၢၼ်ႈ ယိုတ်းမိူင်းတင်း ပႃႇတီႇမႂ်ႇသုင်ၸိုင်ႈတႆး/ တပ်ႉ သိုၵ်းၸိုင်ႈတႆး SSPP/ SSA တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ တၢင်းၾၢႆႇလႂ်ၵေႃႈ ပႆႇထွႆထွၼ်ဢွၵ်ႇၼႂ်းပိုၼ်ႉတီႈ ဝႃႈၼႆ။

ၵူၼ်းၼုမ်ႇ ပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ်ၼႆႉ သိုၵ်းမၢၼ်ႈၵေႃႈ ဢမ်ႇတူင်ႉၼိုင် သိုၵ်းတႆး ၶူဝ်းၶဵဝ်ၵေႃႈ ဢမ်ႇတူင်ႉၼိုင်သင် ယူႇဝႆႉႁဵတ်းၼၼ်သေ ငႃၵၼ်ဝႆႉ ၸိူင်ႉၼၼ်ၵူၺ်း။ ဢၼ်ယိုဝ်းၵွင်ႈလူင် ၵႂႃႇတၢင်းၾၢႆႇ ဢွၵ်ႇဝဵင်းလၢႆးၶႃႈၼၼ်ႉ ပဵၼ်သိုၵ်းမၢၼ်ႈ ယိုဝ်းၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းၵွင်ႈလူင် ၵႂႃႇၵူႈႁူးၵူႈတၢင်း ၼႂ်းၸႄႈဝဵင်းလၢႆးၶႃႈ ၸိူင်ႉၼႆၼႆႉ ၶဝ်ၵူဝ် ၸုမ်းယိပ်းၵွင်ႈၵၢင်ႇ ၶဝ်ႈယိုဝ်းတပ်ႉပၢင်သဝ်းၶဝ် ၽူႈတူင်ႉၼိုင် ၵၢၼ်သိုၵ်း တၢင်းထုင်ႉဝဵင်းလၢႆးၶႃႈလၢတ်ႈ။

“သိုၵ်းမၢၼ်ႈၶဝ် ၵူဝ်ၸုမ်းယိပ်းၵွင်ႈၵၢင်ႇ ၶူဝ်းၶဵဝ် – ၶူဝ်းလၢႆး ၶဝ်ႈယိုဝ်းၶဝ်ၶႃႈယူဝ်ႉ ၵွပ်ႈၼႆလႄႈ ၸင်ႇလၢမ်းလိမ်းယိုဝ်းၵွင်ႈ လူင် လွၵ်ႇၵႂႃႇၵူႈႁူးၵူႈတၢင်းၸိူင်ႉၼႆ ယွၼ်ႉပိူဝ်ႈဝႃႈ ဢဵၼ်ႁႅင်းသိုၵ်းမၢၼ်ႈ တီႈဝဵင်းလၢႆးၶႃႈၼႆႉ မၼ်းဢေႇဝႆႉ ၶႃႈဢေႃႈ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 6/8/2023 ယၢမ်းၵၢင်ၼႂ် 6:15 မူင်း သိုၵ်းမၢၼ်ႈ ယိုတ်းမိူင်း ဢဵၼ်ႁႅင်း 70 ၵေႃႉ ႁႅၼ်းသိုၵ်းလေႃႇတိုၵ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA တီႈတပ်ႉပၢင်သဝ်းၶၢႆးၽၵ်းၼၢမ် ႁိမ်းဝၢၼ်ႈၼမ်ႉပွၵ်ႉ ၾၢႆႇ ၸၢၼ်း ဝၢၼ်ႈမၢၵ်ႇလၢင်း ၾၢႆႇဢွၵ်ႇဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ထိုင်မႃး ဝၼ်းတီႈ 7/8/2023 သိုၵ်းမၢၼ်ႈ ဢွၵ်ႇလိၵ်ႈႁၢမ်ႈၵူၼ်းမိူင်းၶဝ်ႈဢွၵ်ႇၵႂႃႇမႃး ၼႂ်းဝဵင်း တႄႇဢဝ် ယၢမ်းႁူဝ်ၶမ်ႈ 6 မူင်း ထိုင် 6 မူင်းၵၢင်ၼႂ်ထႅင်ႈ ႁၢၼ်ႉတေႃႇထိုင် ယၢမ်းလဵဝ် ပၵ်းပိူင်ၼၼ်ႉယင်းပႆႇယုၵ်ႉလိူၵ်ႈ ၵူၼ်းပိုၼ်ႉတီႈ ဝဵင်းလၢႆး ၶႃႈလၢတ်ႈ။

မိူဝ်ႈဝၼ်းတီႈ 14/9/2023 ၼၼ်ႉ တူၵ်းမႅၼ်ႈလိူၼ်ၵဝ်ႈလပ်း (ဝၼ်းသိလ်ၵၢင်ဝႃႇ) သေ ထိုင်မႃး ယၢမ်းႁူဝ်ၶမ်ႈ ၵူၼ်းပိုၼ်ႉ တီႈ ဝဵင်းလၢႆးၶႃႈ ဢွၼ်ၵၼ်ဢွၵ်ႇမႃးတႆႈတဵၼ်း လူႇတၢၼ်းတူၼ်ႈပႅၵ်ႈ ၸွမ်းထၢတ်ႈ/ ၵွင်းမူး ပေႃးရႃႇၼ၊ ၽြႃးလူင် ၵၢင်ဝဵင်း ၸိူဝ်းၼႆႉ ၵိုၼ်းၶွၼ်ႈ သတ်ႉၼႅၼ်ႈ ၼမ်ၵူႈတီႈ ယွၼ်ႉသဵင်ၵွင်ႈၵၢင်ႇ သိုၵ်းမၢၼ်ႈ ယိုတ်းမိူင်းတင်း သိုၵ်း SSPP ယဵၼ်လူင်းဝႆႉ ဝႃႈၼႆ။