ၵူၼ်းၶၢႆၼမ်ႉၶႅင်လွတ်ႇ (ရေခဲချောင်း) တီႈမူႇၸေႊ ၺႃးယိုဝ်းတၢႆထင်တီႈ။
ဝၼ်းတီႈ 30/9/2023 ယၢမ်းဝၢႆးဝၼ်း 2 မူင်းၶိုင်ႈၼၼ်ႉ ၵူၼ်းၶၢႆၼမ်ႉၶႅင်လွတ်ႇၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ယိုဝ်းတီႈႁိမ်းဝၢၼ်ႈၵွင်းဝဵင်း ၸႄႊဝဵင်းမူႇၸေႊၼၼ်ႉသေ လူႉတၢႆထင်တီႈ။
ၵူၼ်းပိုၼ်ႉတီႈလၢတ်ႈတီႈၽူတွႆႇႁွၵ်ႈဝႃႈ – “ ၸႂ်ႈယဝ်ႉ ၵူၼ်းၶၢႆၼမ်ႉၶႅင်လွတ်ႇၼႆႉ မႃးၶၢႆတၢင်းၼႆႉယူႇတႃႇသေႇၶႃႈဢေႃႈ။မိုတ်ႈတႄႉဢမ်ႇမိုတ်ႈမၼ်းၼင်ႇၵဝ်ႇ ။မၼ်း လုၵ်ႉမႃးတၢင်း 105 လၵ်းပုၼ်ႉဢေႃႈၼၼ်ႉ ” – ဝႃႈၼႆ။
ၵူၼ်းၸၢႆးၵေႃႉၺႃးယိုဝ်း ၼႆႉ ဢႃယု မီး 40 ပၢႆ ယွၼ်ႉမၢတ်ႇၸဵပ်းႁၢဝ်ႈႁႅင်းသေ လူႉတၢႆထင်တီႈ ။ ၸုမ်းၸွႆႈတူင်ႇဝူင်းၵူၼ်း ၸွႆႈသူင်ႇၵူတ်ႇထတ်းတီႈႁူင်းယႃလူင်မူႇၸေႊ။
မိူဝ်ႈဝၼ်းတီႈ 9/9/2023 ၼၼ်ႉၵေႃႈ ၵူၼ်း 2 ၵေႃႉ ဢၼ်မႃးၼွၼ်းလိုဝ်ႈတီႈႁူင်းႁႅမ်းတၢႆႊမုၼ်ႊ(Daimond Hotel) ၼႂ်းပွၵ်ႉၵွင်းၼွင် မူႇၸေႊၼၼ်ႉ ၺႃးၸုမ်းဢမ်ႇႁူႉၾၢႆႇငွႆးယိုဝ်း ၸၢႆးမၢတ်ႇၸဵပ်းသေ ယိင်းလူႉတၢႆထင်တီႈ။
မိူဝ်ႈဝၼ်းတီႈ 27/8/2023 ၼၼ်ႉၵေႃႈ ၼၢင်းယိင်းၵူၼ်းႁဵတ်းၵိၼ်ၵၢၼ် လႅၵ်ႈငိုၼ်းၼႂ်းၵၢတ်ႇၵေႃႉၼိုင်ႈ တီႈမူႇၸေႊ ၺႃးၸုမ်းဢမ်ႇႁူႉၾၢႆႇ ယိုဝ်းသေ ႁိမ်ဢဝ်ငိုၼ်းမၼ်းၼၢင်းၵႂႃႇ ၼႆယဝ်ႉ။
ၸႄႈဝဵင်းမူႇၸေႊၼႆႉ ပၢင်တိုၵ်းသိုၵ်းသိူဝ်ၵေႃႈ ပဵၼ်ယူႇၶိူဝ်းယႂ်း တႄႇမိူဝ်ႈႁၢင်လိူၼ်ၵျူႊလၢႆႊၼၼ်ႉမႃး ထိုင်ယၢမ်းလဵဝ် သိုၵ်းမၢၼ်ႈယိုတ်းမိူင်း လႄႈ သိုၵ်းတဢၢင်း TNLA တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ႁၢဝ်ႈႁႅင်းလၢႆတီႈ မိူၼ်ၼင်ႇ ဢိူင်ႇဝၢၼ်ႈၼမ်ႉဢုမ် ၊ ဢိူင်ႇၸေႊလၢၼ်ႉ ၊ ဢိူင်ႇပၢင်ႇၶမ်း ၸဵမ်ၸိူဝ်းၼႆႉ။
