သိုၵ်းမၢၼ်ႈတင်း သိုၵ်း TNLA သိုပ်ႇပဵၼ်ပၢင်တိုၵ်းၵၼ်ထႅင်ႈ ႁၢဝ်ႈႁႅင်း တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ သွင် ၾၢႆႇပဵၼ်ပၢင်တိုၵ်းၵၼ်မႃး မီး 4 ဝၼ်းယဝ်ႉ ပႆႇထွႆထွၼ်။  

ဝၼ်းတီႈ 20/9/2023 ယၢမ်းၵၢင်ဝၼ်းမွၵ်ႈ 11 မူင်း သိုၵ်းမၢၼ်ႈ ယိုတ်းမိူင်း၊ ပျီႇတူႉၸိတ်ႉပၢၼ်းသေးလႄႈ ပျီႇတူႉၸိတ်ႉ မဵဝ်ႉမ ႁူမ်ႈၵၼ် ဢဵၼ်ႁႅင်းမီး 80 ၵေႃႉတင်း သိုၵ်းတဢၢင်း TNLA သိုပ်ႇပဵၼ်ပၢင်တိုၵ်းၵၼ်ထႅင်ႈ ႁၢဝ်ႈႁႅင်း  တီႈဝၢၼ်ႇပၢင်ႇ လိၼ်လႅင် ဢိူင်ႇပၢင်ႇၶမ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းပိုၼ်ႉတီႈ ၼႂ်းဢိူင်ႇၸေႊလၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ်ပဵၼ်ပၢင်တိုၵ်းၵၼ် မိူဝ်ႈဝႃး ယၢမ်းဝၢႆး ဝၼ်း 1 မူင်း သိုၵ်း TNLA ယိုဝ်းမၢၵ်ႇလူင် ၵႂႃႇတူၵ်းသႂ်ႇတီႈၵျွင်းလွႆသူးတွင်း 1 လုၵ်ႈ ၸၢၵ်ႇမၢၵ်ႇတိူဝ်ႉသႂ်ႇ ၸဝ်ႈသြႃႇၼင်ႈ ၵျွင်းပႃးၼိုင်ႈ။ ၸၢၵ်ႇမၢၵ်ႇၼၼ်ႉ သႅတ်ႈသႂ်ႇတီႈၵွၵ်းႁူဝ်လႄႈ တီႈၶႃသွင်ၶွၼ်၊ တႃႇၶႃၶွၼ်ၼိုင်ႈတႄႉ ၸၢၵ်ႇမၢၵ်ႇၶမ်ဝႆႉလႄႈ မိူဝ်ႈၼႆႉ တေၶဝ်ႈႁွင်ႈၽႃႇတတ်းသေ ဢဝ်ၸၢၵ်ႇမၢၵ်ႈ တီႈၶႃဢွၵ်ႇၼႆ ၶႃႈဢေႃႈ။ မၢၵ်ႇလူင် သိုၵ်း TNLA ယိုဝ်းမႃး တၢင်းလွႆ သူးတွင်းၼၼ်ႉ တင်းမူတ်း 3 လုၵ်ႈ။ တႃႇလုၵ်ႈၼိုင်ႈ တူၵ်းသႂ်ႇတီႈၵျွင်း။ ယဝ်ႉၵေႃႈ ၸွမ်းႁိမ်းလၵ်းသဝ်ၾူၼ်း ၸိူဝ်းၼၼ်ႉ ထႅင်ႈ”- ဝႃႈၼႆ။

ၼႂ်းဝၼ်းတီႈ 20 ယၢမ်းဝၢႆးဝၼ်း 1 မူင်း တၢင်းၾၢႆႇသိုၵ်း TNLA တီႉၺွပ်းလႆႈ တူဝ်လိပ်းသိုၵ်းမၢၼ်ႈ ထႅင်ႈ လၢႆၵေႃႉ တီႈၼႂ်းဢိူင်ႇၸေႊလၢၼ်ႉ။

ၽူႈတူင်ႉၼိုင် ၵၢၼ်သိုၵ်း တၢင်းထုင်ႉမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ လႆႈႁၼ်သိုၵ်းလွႆၶဝ် ၶီႇရူတ်ႉၶိူင်ႈ 5 လမ်း သေ တၢင်ႇပႃးတူဝ်လိပ်း သိုၵ်းမၢၼ်ႈ 3 ၵေႃႉ မတ်ႉမိုဝ်း၊ ပူၵ်ႉၼႃႈၶဝ် ၵူႈၵေႃႉ လုၵ်ႉတၢင်းၸေႊလၢၼ်ႉၼႆႉ လူင်းၵႂႃႇတၢင်း ၽၢႆတူင်ႈၵွင်းၼႃးၼၼ်ႉၶႃႈဢေႃႈ”- ဝႃႈၼႆ။

ယၢမ်းလဵဝ် ဢဵၼ်ႁႅင်းသိုၵ်းမၢၼ်ႈတင်း ၸုမ်းပျီႇတူႉၸိတ်ႉ တီႈဝၢၼ်ႈပၢင်ႇလိၼ်လႅင်တင်း မၢၼ်ႈဝဵင်းၼၢင်းၼႆႉ တင်းမူတ်း တေမီးဝႆႉ 200 ၵေႃႉ ၽူႈတူင်ႉၼိုင် ၵၢၼ်သိုၵ်းထုင်ႉမၢဝ်းလၢတ်ႈ။

ဢိင်ၼိူဝ် လွင်ႈပၢင်တိုၵ်းၼႆႉသေ မိူဝ်ႈဝၼ်းတီႈ 19 ၼႆႉ မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈ တီႈမၢၼ်ႈၸၢၼ်းသႃႇ လူႉ ၵွႆ 2 လင် ၵူၼ်းမိူင်းမၢတ်ႇၸဵပ်းၸွမ်း 3 ၵေႃႉ။ ဝၼ်းတီႈ 20 ၼႆႉသမ်ႉ မၢၵ်ႇလူင်တူၵ်းတႅၵ်ႇ တီႈၼႂ်းသူၼ်ၵူၼ်းဝၢၼ်ႈ ႁိမ်း ႁိူၼ်း ထႅင်ႈလုၵ်ႈၼိုင်ႈ တီႈမၢၼ်ႈၸၢၼ်းသႃႇ။ ထႅင်ႈၼိုင်ႈလုၵ်ႈသမ်ႉ ယိုဝ်းပူၼ်ႉမၢၼ်ႈၸၢၼ်းသႃႇသေ ၵႂႃႇတူၵ်းဝႆႉၼႂ်းတူင်ႈ ၼႃး ၼၼ်ႉတႄႉဢမ်ႇတႅၵ်ႇ ဝႃႈၼႆ။

ၼႂ်းဝၼ်းတီႈ 19 ဝၼ်းလဵဝ် သိုၵ်းမၢၼ်ႈ ယိုတ်းမိူင်းတင်း သိုၵ်း TNLA ပဵၼ်ပၢင်တိုၵ်းၵၼ် 7 ဢွင်ႈတီႈ ၼႂ်းၸိုင်ႈတႆးပွတ်း ႁွင်ႇ မိူၼ်ၼင်ႇ ၸႄႈဝဵင်းမူႇၸေႊ၊ ၵူတ်ႉၶၢႆလႄႈ မိူင်းၵုတ်ႈ ၸိူဝ်းၼႆႉ။ တီႈၸႄႈဝဵင်းမူႇၸေႊၼႆႉသမ်ႉ တီႈႁိမ်းဝၢၼ်ႈသၢႆးၶၢဝ် ပွၵ်ႈၼိုင်ႈ ယၢမ်းၵၢင်ဝၼ်းမွၵ်ႈ 11 မူင်း ပဵၼ်သိုၵ်းမၢၼ်ႈ တပ်ႉၵွင် 478 တင်း သိုၵ်း TNLA တပ်ႉၵူဝ်ႇမၢၼ်ႇတူဝ်ႇ။ တီႈၸႄႈ ဝဵင်းၵူတ်ႉၶၢႆသမ်ႉ ပဵၼ်တီႈႁိမ်းဝၢၼ်ႈၶူဝ်မုင်း ပွၵ်ႈၼိုင်ႈလႄႈ ဝဵင်းမိူင်းၵုတ်ႈသမ်ႉ 5 ပွၵ်ႈ။

ယွၼ်ႉပၢင်တိုၵ်းၼႆႉသမ်ႉ ၾၢႆႇသိုၵ်းမၢၼ်ႈ ယိုတ်းမိူင်း ယိုဝ်းၵွင်ႈလူင်ၶဝ် တီႈတပ်ႉလွႆၵိဝ်ႇလွၵ်ႇ၊ တီႈ 105 လၵ်းလႄႈ တီႈ ၼမ်ႉၽၵ်းၵႃ တပ်ႉၶလယ 123 ၸိူဝ်းၼႆႉ ယိုဝ်းၵွင်ႈလူင်မႃးတၢင်း မၢၼ်ႈၵၢင်၊ မၢၼ်ႈၼမ်ႉၵတ်းလႄႈ မၢၼ်ႈထမ်ႈ ၼႂ်းဢိူင်ႇ ၸေႊလၢၼ်ႉ ၸိူဝ်းၼႆႉ ၼႂ်းဝၼ်းလဵဝ်ၵူၺ်း 112 ပွၵ်ႈ။ 

ယွၼ်ႉပၢင်တိုၵ်း သိုၵ်းမၢၼ်ႈတင်း သိုၵ်း TNLA ၼႆႉသေ ႁဵတ်းႁႂ်ႈၵူၼ်းမိူင်းၵုတ်ႈ ပၢႆႈၽေးသိုၵ်း ဢမ်ႇယွမ်း 400 ၵေႃႉ။ တီႈ ၸႄႈဝဵင်းမူႇၸေႊၼႆႉသမ်ႉ ၵူၼ်းမိူင်း 350 ပၢႆလႄႈ မုင်ႉႁေႃႁိူၼ်း 131 လင် လႆႈပၢႆႈၽေးဝႆႉ။

တႄႇဢဝ် ဝၼ်းတီႈ 23/7/2023 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 19/9/2023 ၼႆႉ သိုၵ်းမၢၼ်ႈတင်း သိုၵ်း TNLA ပဵၼ်ပၢင်တိုၵ်းၵၼ်မႃး ၼႂ်းၸိုင်ႈတႆးပွတ်းႁွင်ႇၼႆႉ တင်းမူတ်း ဢမ်ႇယွမ်း 52 ပွၵ်ႈ ယူႇတီႈ ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်း တဢၢင်း TNLA ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။