ၼႂ်းလိူၼ်ၼႆႉ သိုၵ်းမၢၼ်ႈ ၶဝ်ႈထိုင်ၼႂ်းဝၢၼ်ႈၼႂ်းသူၼ်သေ သင်ႇ ႁႂ်ႈၵူၼ်းမိူင်းယႂႃႇငၢၼ်ႇ ပွင်ႇၶၢဝ်ႇပၼ်လွင်ႈတူင်ႉၼိုင်သိုၵ်းၵႅတ်ႇၶႄၵူၼ်းမိူင်း PDF ပေႃးဢမ်ႇပွင်ႇၶၢဝ်ႇပၼ် တေၽဝ်ႁိူၼ်းယေးၵူၼ်းမိူင်းၼႆယဝ်ႉ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸုမ်းပိဝ်ႇၸေႃးထီးၶဝ် ႁွင်ႉဢဝ်လုၵ်ႈသိုၵ်းမၢၼ်ႈသေ ၶဝ်ႈဝၢၼ်ႈမႃး။ တဵၵ်းထၢမ်ႁိူၼ်းတႂ်ႈႁိူၼ်းၼိူဝ်ၶႃႈဢေႃႈ ။ ၶဝ်ဝႃႈ ၵူၼ်းမိူင်းႁူႉလွင်ႈ PDF ယူႇၼႆဢေႃႈ။ ႁႂ်ႈၵူၼ်းမိူင်း ၸွပ်ႇလွင်ႈ PDF ပၼ်ၶဝ်ၼႆဝႃႈ။ပေႃးဢမ်ႇပွင်ႇၶၢဝ်ႇပၼ်ၶဝ်ၼႆႉ တေၽဝ်ႁိူၼ်းၵူၼ်းဝၢၼ်ႈၼႆဢေႃႈ။ ပၢႆ ယုၵ်ႉၵွင်ႈလွၵ်ႇၵူၼ်းဝၢၼ်ႈပႃးထႅင်ႈၶႃႈဢေႃႈ ” – ဝႃႈၼႆ ။
သိုၵ်းမၢၼ်ႈလွၵ်ႇငိုတ်ႈတဵၵ်းထၢမ်လၢႆလွင်ႈလႄႈ ၵူၼ်းမိူင်းယူႇယၢပ်ႇၵိၼ်းၸႂ်၊ ၵူၼ်းမိူင်း ဢဝ်တူဝ်လွတ်ႈၼႂ်းၵႄႈသိုၵ်းသိူဝ် ပေႃးပဵၼ်ယၢပ်ႇယူႇယဝ်ႉ၊ ႁႂ်ႈၵူၼ်းမိူင်းပွင်ႇၶၢဝ်ႇလွင်ႈသိုၵ်းၸုမ်းၼၼ်ႉၸုမ်းၼႆႉ တႄႉ ဢမ်ႇငၢႆႈ ၵူၼ်းပိုၼ်ႉတီႈၵေႃႉၼိုင်ႈ လၢတ်ႈ တီႈၽူႈတွႆႇႁွၵ်ႈထႅင်ႈၼင်ႇၼႆ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ် ၵူၼ်းမိူင်းတေၵႂႃႇႁႆႈၵႂႃႇသူၼ်ၵူၺ်းၵေႃႈ ပဵၼ်ယၢပ်ႇ။ ပေႃးၵူၼ်းမိူင်းၵႂႃႇႁဵတ်းၵၢၼ်ႁဵတ်းငၢၼ်းၼႆ သိုၵ်းမၢၼ်ႈသမ်ႉ ထၢင်ႇထိူမ်မၢပ်ႇၼႄးဝႃႈ ပဵၼ်သၢႆသိုပ်ႇ PDF ။ ၵူၼ်းမိူင်း တေယူႇတေၵိၼ်ၸိူင်ႉႁိုဝ်ၵေႃႈ ဢမ်ႇႁူႉယဝ်ႉ” – ဝႃႈၼႆ။
တႄႇဢဝ်ဝၼ်းတီႈ 5/9/2023 ၼၼ်ႉမႃး သိုၵ်းမၢၼ်ႈ ႁႄႉႁၢမ်ႈၵူၼ်းမိူင်း ဢမ်ႇႁႂ်ႈၵႂႃႇႁႆႈၼႃးသူၼ် ထိုင်မိူဝ်ႈလဵဝ် ပႆႇပၼ်ၵႂႃႇမႃး ။ မိူဝ်ႈလဵဝ် ၸွမ်းႁိမ်းဝၢၼ်ႈ ၼပၢၼ်းၵျီး ၼႂ်းဝဵင်းယႂႃႇငၢၼ်ႇၼႆႉ သိုၵ်းမၢၼ်ႈတူင်ႉၼိုင်ၵႂႃႇမႃး ဢဵၼ်ႁႅင်းမီး ဢမ်ႇယွမ်း 200 ၼႆယဝ်ႉ။
ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆႉ သိုၵ်းမၢၼ်ႈၶဝ်ႈဢဝ်တီႈယူႇ ၸွမ်းဢိူင်ႇၸွမ်းဝၢၼ်ႈသေဢမ်ႇၵႃး လွၵ်ႇငိုတ်ႈၵူၼ်းမိူင်းႁႂ်ႈၵူဝ်ႁႄယူႇယၢပ်ႇ။ၵူႈပွၵ်ႈတၢင်းဝဵင်းယႂႃႇငၢၼ်ႇ ပၢင်လႃႈၼႆႉ ဢမ်ႇတွၼ်ႉမီးၸုမ်းယိပ်းၵွင်ႈဢၼ်သၢၼ်ၶတ်းသိုၵ်းမၢၼ်ႈမႃးသေပွၵ်ႈ ။ ယၢမ်းလဵဝ်တႄႉ ထုင်ႉၼၼ်ႉၸုမ်းသိုၵ်းၵူၼ်းမိူင်းၸိူဝ်းဢမ်ႇၶႂ်ႈလႆႈၸဝ်ႈဢႃႇၼႃႇသိုၵ်းၼၼ်ႉ ပိုတ်းယိုဝ်းသိုၵ်းမၢၼ်ႈ ယဵၼ်းပဵၼ်ပိုၼ်ႉတီႈသိုၵ်းသိူဝ်ဝႆႉ။
