မိူဝ်ႈၼႆႉ ဝၼ်းတီႈ 20/9/2023 ယၢမ်းၵၢင်ၼႂ် မၢၵ်ႇလူင်တူၵ်းတႅၵ်ႇ တီႈလွႆသူးတွင်း ဢၼ်မီးဝႆႉ တၢင်းၾၢႆႇႁွင်ႇၸေႊလၢၼ်ႉ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၸဝ်ႈသြႃႇ တီႈလွႆသူးတွင်းၼၼ်ႉ လႆႈတိူဝ်ႉမၢတ်ႇၸဵပ်းၸွမ်း တူၼ်ၼိုင်ႈ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ဢမ်ႇႁူႉၶႃႈ မၢၵ်ႇလူင်ၼႆႉ မႃးတူၵ်း သႂ်ႇ တီႈၼိူဝ်ၵျွင်းလွႆသူးတွင်းသေ ၸၢၵ်ႇမၢၵ်ႇတိူဝ်ႉသႂ်ႇၸဝ်ႈသြႃႇ တီႈလွႆသူးတွင်းၼၼ်ႉ လႆႈတိူဝ်ႉမၢတ်ႇၸဵပ်း တီႈၵွၵ်းႁူဝ်၊ တီႈ ၶႃ ၸိူဝ်းၼႆႉ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈႁူင်းယႃယဝ်ႉ။ မၢၵ်ႇလူင် ဢၼ်ၵႂႃႇတူၵ်းတီႈလွႆသူးတွင်းၼၼ်ႉ တင်းမူတ်း တေဢမ်ႇယွမ်း 3 ႁူၺ်ႇ။ ယဝ်ႉၵေႃႈ မၢၵ်ႇၸိူဝ်းၼၼ်ႉ ၵႂႃႇတူၵ်းတီႈႁိမ်းလၵ်းသဝ်ၾူၼ်း ဢၼ်မီးတီႈလွႆသူးတွင်း ၸိူဝ်းၼၼ်ႉ ထႅင်ႈ”- ဝႃႈၼႆ။
လွႆသူးတွင်းၼႆႉ မီးၾၢႆႇႁွင်ႇၸေႊလၢၼ်ႉ ဢွင်ႈတီႈၼၼ်ႉသမ်ႉ မီးသိုၵ်းမၢၼ်ႈ ယိုတ်းမိူင်းပၵ်းဝႆႉ။ တပ်ႉသိုၵ်းမၢၼ်ႈတီႈၼႆႈ ၵႆႉ ယိုဝ်းၵွင်ႈလူင် ၸူးတီႈလွႆတေးမိူင်း ၾၢႆႇၸၢၼ်းၸေႊလၢၼ်ႉ ဢွင်ႈတီႈၼၼ်ႉသမ်ႉ မီးသိုၵ်းတဢၢင်း TNLA ပၵ်းယူႇဝႆႉ ဝႃႈၼႆ။
တႄႇဢဝ် ဝၼ်းတီႈ 17/9/2023 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 20 ၼႆႉ သိုၵ်းမၢၼ်ႈ ယိုတ်းမိူင်းတင်း ပျီႇတူႉၸိတ်ႉ ႁူမ်ႈၵၼ် ပဵၼ်ပၢင်တိုၵ်းတင်း တပ်ႉသိုၵ်းတဢၢင်း TNLA မႃး ႁၢဝ်ႈႁႅင်း ၼႂ်းဢိူင်ႇၸေႊလၢၼ်ႉလႄႈ ဢိူင်ႇပၢင်ႇၶမ်း ၼႂ်းၸႄႈ ဝဵင်းမူႇၸေႊ မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈ မၢၼ်ႈဝဵင်းၼၢင်း လူႉၵွႆ ဢမ်ႇယွမ်း 2 လင်။ ယဝ်ႉ ၵေႃႈ တူၵ်းသႂ်ႇ ထႅင်ႈ ႁိူၼ်းယေးၵူၼ်းဝၢၼ်ႈ တၢင်းမၢၼ်ႈၸၢၼ်းသႃႇ လူႉၵွႆၸွမ်း 2 လင် ၵူၼ်းမိူင်း လႆႈတိူဝ်ႉမၢတ်ႇၸဵပ်းၸွမ်း 3 ၵေႃႉ။
မိူဝ်ႈၼႆႉ ဝၼ်းတီႈ 20/9/2023 သမ်ႉ ပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း TNLA သိုပ်ႇလၢမ်းပဵၼ်ပၢင်တိုၵ်းၵၼ်မႃး တၢင်းဝၢၼ်ႈသၢႆးၶၢဝ် ၼႂ်းဢိူင်ႇၸေႊလၢၼ်ႉ။
ဢိင်ၼိူဝ် လွင်ႈပၢင်တိုၵ်းၼႆႉသေ ယူႇတီႈ ၽူႈၵွၼ်းၸႄႈဝဵင်းမူႇၸေႊ ဢွၵ်ႇၶေႃႈၸီႉသင်ႇ ႁၢမ်ႈ (Curfew) ၸူးၵူၼ်းမိူင်း မိူၼ် ၼင်ႇ – ႁၢမ်ႈၵူၼ်းမိူင်းဢွၵ်ႇၵၢင်ၶိုၼ်း တႄႇဢဝ် ယၢမ်းၵၢင်ၶိုၼ်း 10 မူင်းထိုင် ၵၢင်ၼႂ် 4 မူင်း၊ ႁၢမ်ႈသူၼ်းတုမ်ၶွၼ်ႈတုမ် ၵၼ်၊ ႁၢမ်ႈဢွၵ်ႇၼႄၵၢင်ၸႂ်သၢၼ်ၶတ်း၊ ႁၢမ်ႈၶွၼ်ႈတုမ်ၵၼ် 5 ၵေႃႉ ဢမ်ႇၼၼ် 5 ၵေႃႉ ၶိုၼ်ႈၼိူဝ်၊ ႁၢမ်ႈ ႁဵတ်းႁၢႆႉ သၢၼ် ၶတ်းသေလွင်ႈလွင်ႈ ၸိူဝ်းၼႆႉ။
ၶေႃႈၸီႉသင်ႇ Curfew တီႈဝဵင်းမူႇၸေႊၼႆႉ ယၢမ်ႈဢွၵ်ႇမႃး မိူဝ်ႈဝၼ်းတီႈ 19/7/2023 ၼၼ်ႉမႃးယဝ်ႉ ၵမ်းၼိုင်ႈ ယၢမ်းလဵဝ် ၶိုၼ်းသိုပ်ႇဢဝ် ၶေႃႈၸီႉသင်ႇ Curfew ၼၼ်ႉသေ သိုပ်ႇတႄႇၸႂ်ႉၵႂႃႇထႅင်ႈ တႄႇဢဝ် ဝၼ်းတီႈ 19/9/2023 ၼႆႉ ၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ