ၶၼ်ငႃးလမ် – ငႃးလႅင် တီႈဝဵင်းလၢင်းၶိူဝ်း ပဵၼ်ၵၢၼ်

ပီၼႆႉ တၢင်းမိူင်းထႆး ႁပ်ႉသိုဝ်ႉငႃးလမ် – ငႃးလႅင် တၢင်းမိူင်းတႆးသေ ႁဵတ်းႁႂ်ႈၶၼ်ငႃး တၢင်းပွတ်းၸႄႈတွၼ်ႈလၢင်းၶိူဝ်း ပုင်ႈ ၶိုၼ်ႈပဵၼ်လၢႆပုၼ်ႈ။

တႄႇဢဝ်လိူၼ်သႅပ်ႊထႅမ်ႊပိူဝ်ႊ 2023 ၼႆႉမႃး ၶၼ်ငႃးလႅင် တီႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း ငႃးလႅင် 22 ၸွႆႉ ၶၢႆလႆႈ 150,000 ပျႃး ယွၼ်ႉတၢင်းၾင်ႇမိူင်းထႆး ႁပ်ႉသိုဝ်ႉ တႃႇဢဝ်ၵႂႃႇဢိတ်ႇဢွၵ်ႇႁဵတ်းၼမ်ႉမၼ်း ၼႆယဝ်ႉ။

ၸဝ်ႈသူၼ်ငႃး ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝၼ်းသွင်ဝၼ်းၼႆႉ ၶၼ်ငႃးလႅင် တီႈဝဵင်းလၢင်းၶိူဝ်းၼႆႉ 22 ၸွႆႉ ပေႃးပဵၼ်ၵူၼ်းတၢင်းဝၢၼ်ႈႁၢတ်ႇ ၼႃးၵူင်းၶဝ်မႃးသိုဝ်ႉၸိုင် ၶၢႆလႆႈ 150,000 ပျႃးၶႃႈ။ သင်ဝႃႈ ပဵၼ်ၵူၼ်းၵၢင် (ပွဲရုံ) ႁပ်ႉသိုဝ်ႉ ၸိုင် ၶဝ်တေပၼ်လႆႈ 135,000 ပျႃး။ ပီၼႆႉ ၶၼ်ငႃးလမ် – ငႃးလႅင် ၶိုၼ်ႈႁႅင်းဢေႃႈ လႆႈငိၼ်းဝႃႈ ငႃး ၸိူဝ်းၼႆႉ တေသူင်ႇၶၢႆ  တၢင်းမႄႈႁွင်ႈသွၼ် မိူင်းထႆး ၼႆၶႃႈဢေႃႈ”- ဝႃႈၼႆ။

ၵူႈပီ ပူၼ်ႉမႃးၼၼ်ႉ ၶၼ်ငႃးလႅင် 22 ၸွႆႉ တေမီးယူႇ 60,000 ပျႃးတဵမ် ၵမ်ႈၼမ် ၸဝ်ႈသူၼ်ၶဝ် တေၽုၵ်ႇဝႆႉၵိၼ် ၸိူင်ႉၼႆ ၵူၺ်းလႄ ပီၼႆႉ ဢမ်ႇထၢင်ႇသေ ၶၼ်မၼ်းတေပုင်ႈၶိုၼ်ႈႁႅင်း ပဵၼ်လၢႆပုၼ်ႈ ၸဝ်ႈသူၼ်ငႃးလၢတ်ႈ။

ၵူၼ်းပိုၼ်ႉတီႈ ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ငႃးတၢင်းမႄႈႁွင်ႈသွၼ် မိူင်းထႆးၼၼ်ႉ ဢမ်ႇပဵၼ် ၵၢၼ်သေ ဢမ်ႇပေႃးဢွၵ်ႇၼမ်လႄႈ ၶဝ်ပိုတ်ႇႁပ်ႉသိုဝ်ႉငႃးတၢင်းလၢင်းၶိူဝ်းၼႆႉ ယွၼ်ႉၼၼ်လႄႈ ႁဵတ်းႁႂ်ႈၶၼ်ငႃးလႅင်ၼႆႉ ပုင်ႈၶိုၼ်ႈႁႅင်း။ ငႃးလႅင်ၼႆႉ ၶဝ်တေဢဝ်မိူဝ်းႁဵတ်းၼမ်ႉမၼ်း။ ပေႃးဝႃႈ ငႃးတၢင်းမိူင်းထႆးၼၼ်ႉ ဢွၵ်ႇလီၸိုင် ၶဝ်ဢမ်ႇႁပ်ႉသိုဝ်ႉတၢင်းၼႆႉယဝ်ႉ။ ယဝ်ႉၵေႃႈ တေလၢၼ်ႇၶဝ်ၼၼ်ႉ တိုၼ်းဢမ်ႇပၼ်ဢဝ်ငႃးတၢင်းၼႆႉ ၶဝ်ႈၵႂႃႇၶၢႆတၢင်းမိူင်းၶဝ်လူးၵွၼ်ႇ”- ဝႃႈၼႆ။

ပီၼႆႉ ၶၼ်ငႃးလမ် တီႈဝဵင်းလၢင်းၶိူဝ်းၵေႃႈ ပုင်ႈၶိုၼ်ႈမိူၼ်ၵၼ် မိူဝ်ႈလိူၼ်ဢေႃႊၵတ်ႊသ် ပူၼ်ႉမႃးၼႆႉ ပေႃး 32 ၸွႆႉၸိုင် လႆႈၶၢႆ 130,000 – 140,000 ပျႃး ၵူႈပီ လႆႈၶၢႆ 90,000 – 100,000 ပျႃးၵူၺ်း။ ငႃးလမ်ၼႆႉၵေႃႈ ၵမ်ႈၼမ် တေတေႃႉသူင်ႇၸူး တၢင်းမႄႈႁွင်ႈသွၼ် မိူင်းထႆးၼၼ်ႉ ၼင်ႇၵဝ်ႇ။

လိူဝ်သေ ၶၼ်ငႃး တီႈဝဵင်းလၢင်းၶိူဝ်းၼႆႉ ပဵၼ်ၵၢၼ်ယဝ်ႉ မိူၼ်ၼင်ႇ တၢင်းၸႄႈဝဵင်းမိူင်းၼၢႆး ၸိူဝ်းၼၼ်ႉၵေႃႈ ၶၼ်ငႃး ပုင်ႈၶိုၼ်ႈ မိူၼ်ၵၼ်ယူႇ ၵူၼ်းပိုၼ်ႉတီႈ ဝဵင်းမိူင်းၼၢႆးလၢတ်ႈ။