မိူဝ်ႈဝၼ်းတီႈ 6/9/2023 ယၢမ်းၵၢင်ၼႂ် 7 မူင်းၼၼ်ႉ သိုၵ်းမၢၼ်ႈတင်းၸုမ်းယိၵ်းၵွင်ႈၵၢင်ႇၸၢဝ်းၶိူဝ်း ပိုတ်းယိုဝ်းၵၼ် တီႈႁိမ်းဝၢၼ်ႈၼွင်မွၼ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။

ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “  သဵင်ႈမၢၵ်ႇလူင်တႄႉ ဢမ်ႇပေႃးငိၼ်းၵႃႈႁိုဝ်။ သဵင်ၵွင်ႈတႄႉ တႅၵ်ႇတင်းသွင်ၾၢႆႇ ။ ငိၼ်းဝႃႈ ယိုဝ်းၵၼ်တင်း TNLA    ။ ၵူၺ်းၵႃႈ ပႆႇႁူႉတႅတ်ႈတေႃး ။ ဝၢႆးသဵင်ၵွင်ႈယဵၼ်ယဝ်ႉတႄႉ လႆႈႁၼ် ၵႃးသိုၵ်းမၢၼ်ႈ  မႃးပၼ်ႇလဵပ်ႇ  မွၵ်ႈ 3-4 လမ်းၼႆႉ ” – ဝႃႈၼႆ။

မီးၶၢဝ်ႇလိုဝ်းဢွၵ်ႇမႃးဝႃႈ သိုၵ်းမၢၼ်ႈတင်းသိုၵ်း TNLA ပိုတ်းယိုဝ်းၵၼ် ၊ ပဵၼ်ႁိမ်းၶၢင်ႈတၢင်းလူင် လႃႈသဵဝ်ႈ – သီႇပေႃႉ  ၵူၺ်းဝႃႈၼႆ။ ယူႇတီႈၸုမ်းၶၢဝ်ႇၽူႈတွႆႇႁွၵ်ႈတႄႉ ပႆႇတိတ်းတေႃႇလႆႈၸူးၽူႉၶၢၼ်ပၢၵ်ႇ TNLA  ။

ဝၼ်းလဵဝ်ၵၼ်ၵူၺ်းၼင်ႇၵဝ်ႇ ထႅဝ်ၵႃးသိုၵ်းမၢၼ်ႈ ၽႃႇၺႃးမၢၵ်ႇႁၢင်ႈၵၢင်ဝႆႉတီႈၼိူဝ်သဵၼ်တၢင်း ႁိမ်းဝၢၼ်ႈၼွင်မွၼ်ၼၼ်ႉ ။

ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ထႅဝ်ၵႃးသိုၵ်းမၢၼ်ႈ ဢမ်ႇယွမ်း 30 လမ်းၼႆႉ ၶိုၼ်ႈမႃးတၢင်းသီႇပေႃႉၼႆႉႁေ ၶဝ်တေဢၢၼ်းၵႂႃႇလႃႈသဵဝ်ႈ။ၶဝ်မႃးၽႃႇၺႃး မၢၵ်ႇႁၢင်ႈၵၢင်ဝႆႉၼိူဝ်တၢင်း ႁိမ်းၼွင်မွၼ်ၼၼ်ႉ ။လႆႈငိၼ်းသဵင်မၼ်းလင်ဝႆႉဢေႃႈ။ၵႃးၶဝ်ၵွႆၽွင်ႈယူႇဝႃႈၼႆသေတႃႉ ၵူၼ်းၶဝ်တႄႉ ဢမ်ႇလႅပ်ႈပဵၼ်သင် ” – ဝႃႈၼႆ။

မိူဝ်ႈလဵဝ် တီႈမူႇၸေႊလႄႈသင် လႃႈသဵဝ်ႈလႄႈသင် သိုၵ်းမၢၼ်ႈတင်းသိုၵ်းတဢၢင်းၶဝ် ၶဵင်ႇထႅမ်ႁႅင်းသိုၵ်းၼင်ႇၵၼ်တင်းသွင်ၾၢႆႇဝႆႉသေ မီးလွင်ႈၶဵင်ႈၶႅင်တေႃႇၵၼ်ႁၢဝ်ႈႁႅင်းလႄႈ ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းၼႂ်းဝၢၼ်ႈၼႂ်းဝဵင်း။

မိူဝ်ႈဝၼ်းတီႈ 5/9/2023 ယၢမ်းၵၢင်ၶိုၼ်း 10 မူင်းပၢႆၼၼ်ႉၵေႃႈ ဢမ်ႇမီးပၢင်တိုၵ်းသိုၵ်းသိူဝ်သင်သေတႃႉ  သိုၵ်းမၢၼ်ႈ ယိုဝ်း ၵွင်ႈလူင်သႂ်ႇ ၼႂ်းဢိူင်ႇမိူင်းယူႉ ၸႄႈဝဵင်းၵူတ်ႉၶၢႆ   ႁဵတ်းႁႂ်ႈႁိူၼ်းယေးၵူၼ်းမိူင်းလူႉၵွႆၼမ်  သတ်းလဵင်ႉ ၼႂ်းႁိူၼ်းၵေႃႈတၢႆၼမ်။