ၵူၼ်းၸၢႆးၵေႃႉၼိုင်ႈတီႈတႃႈၶီႈလဵၵ်း ၺႃးပေႃႉထုပ်ႉ တၢႆၼႂ်းထဵင်ၼႃး

ၵူၼ်းၸၢႆးၵေႃႉၼိုင်ႈတီႈတႃႈၶီႈလဵၵ်း ၺႃးပေႃႉထုပ်ႉသေ တၢႆၼႂ်းထဵင်ၼႃး၊ ပဵၼ်ၽႂ်တၢႆယွၼ်ႉသင် ၸုမ်းၸွႆႈထႅမ်လႄႈပလိၵ်ႈၶဝ်တိုၵ်ႉၸွပ်ႇတူၺ်းလွင်ႈတၢင်းမၼ်းယူႇ ဝႃႈၼႆ။

မိူဝ်ႈဝၼ်းတီႈ 4/9/2023 ယၢမ်း 6 မူင်း ထူပ်းႁၼ်တူဝ်တၢႆၵူၼ်းဢမ်ႇႁူႉၸိုဝ်ႈၵေႃႉၼိုင်ႈ မီးဝႆႉၼႂ်းထဵင်ၼႃး ၶၢင်ႈတၢင်းလူင်တႃႈၶီႈလဵၵ်း – ၵဵင်းတုင် ႁိမ်းၵဵတ်ႉမၢၵ်ႇယၢင်း ၸႄႈဝဵင်းတႃႈၶီႈလဵၵ်း။

ၽူႈၶဝ်ႈၸုမ်းၸွႆႈသူၺ်ႇမၢၵ်ႇယၢင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းဝၢၼ်ႈၶဝ် ပွင်ႇၶၢဝ်ႇမႃးလႄႈ ၸင်ႇလႆႈၵႂႃႇတူၺ်း ။ လႆႈႁၼ်တူဝ်တၢႆၽူႈၸၢႆးၵေႃႉၼိုင်ႈၼႂ်းထဵင်ၼႃး။ တၢႆယွၼ်ႉသင် ဢမ်ႇႁူႉ။ ၵွၵ်းႁူဝ်မၼ်းတႄႉ လႅပ်ႈတေၺႃးမၢၵ်ႇဢုတ်ႇပေႃႉထုပ်ႉဝႆႉ ” – ဝႃႈၼႆ။

ၵေႃႉဢၼ်လူႉတၢႆၵႂႃႇၼႆႉ ဢႃယု မီး 30 ပၢႆ မိူဝ်ႈလဵဝ်ၾၢႆႇပလိၵ်ႈၶဝ် တိုၵ်ႉပိုၼ်ၽၢဝ်ႇႁႃပီႈၼွင်ႉမၼ်းဝႆႉ။တီႈတႃႈၶီႈလဵၵ်းၼႆႉ ၵူၼ်းယူႇၵိၼ်ၸွမ်းၶၢင်ႈတၢင်းလိူင်ႇၼမ်လႄႈ ပေႃးမီးလွင်ႈလူႉတၢႆ ဢမ်ႇၸၢင်ႈႁူႉဝႃႈ ပဵၼ်ၵူၼ်းပိုၼ်ႉတီႈႁႃႉ ပဵၼ်ၵူၼ်းတီႈလႂ်။

ၽူႈၶဝ်ႈၸုမ်းၸွႆႈသူၺ်ႇမၢၵ်ႇယၢင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တီႈတႃႈၶီႈလဵၵ်းၼႆႉ ၵူၼ်းယူႇၵိၼ်ၸွမ်းၶၢင်ႈတၢင်း ဢမ်ႇမီးႁိူၼ်းမီးယေးၼမ်ၼႃႇ။ဢမ်ႇႁူႉၽႂ်ပဵၼ်ၽႂ် မိူဝ်ႈလဵဝ်ၵူၼ်းဢၼ်တၢႆၼႆႉၵေႃႈ ပႆႇႁူႉဝႃႈပဵၼ်ၵူၼ်းတီႈလႂ် မိူဝ်ႈၼႆႉ ႁဝ်းတိုၵ်ႉ တေလူင်းၸွမ်းပိုၼ်ႉတီႈၼၼ်ႉသေ ထၢမ်ႁိူၼ်းတႂ်ႈႁိူၼ်းၼိူဝ်ၵွၼ်ႇ ၸွင်ႇတေမီးၽႂ်ႁူႉၸၵ်း ” –  ဝႃႈၼႆ။

မိူဝ်ႈဝၼ်းတီႈ 19/7/2023 ၼၼ်ႉၵေႃႈ ၵႃးၽႃႇၺႃး ၵူၼ်းၵိၼ်ၼွၼ်းၶၢင်ႈတၢင်း 3 ၵေႃႉ တီႈတၢင်းၶဝ်ႈဝဵင်း တႃႈၶီႈလဵၵ်း ႁိမ်းၵွင်းပိဝ်ႇႁႃႇ မၢတ်ႇၸဵပ်းႁႅင်း 1  တၢႆ 2 ၵေႃႉ ၵူၼ်းႁေႃႈၵႃး ပၢႆႈလွတ်ႈဝႆႉ  ။