ၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉ တၢင်းၵုၼ်လူင် – ႁူဝ်ပၢင်ႇပုင်ႈ ၶိုၼ်ႈႁႅင်း

ၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉ ၼႂ်းၵုၼ်လူင် – ႁူဝ်ပၢင်ႇ ပုင်ႈၶိုၼ်ႈႁႅင်း ပဵၼ်လၢႆပုၼ်ႈ ၶဝ်ႈသၢၼ် 1 ထူင်သႅၼ်ပျႃးပၢႆယဝ်ႉ။

တႄႇဢဝ် လိူၼ်ဢေႃႊၵတ်ႊသ် 2023 ၼၼ်ႉမႃး တေႃႇထိုင်ယၢမ်းလဵဝ် ၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉလႄႈ ၶိူင်ႈၸႂ်ႉသွႆ ၼႂ်း သူၼ်ၸိူဝ်းၼႆႉ ပုင်ႈၶိုၼ်ႈႁႅင်း ပဵၼ်လၢႆပုၼ်ႈ ၼႂ်းၸႄႈဝဵင်းၵုၼ်လူင် – ႁူဝ်ပၢင်ႇ ၸိုင်ႈတႆးပွတ်းႁွင်ႇ ၽၵ်းမီႇလႅင် 1 ၸွႆႉ 5,000 ပျႃး ၶဝ်ႈသၢၼ် 1 ထူင် 110,000 ပျႃးယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းႁူဝ်ပၢင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸူဝ်ႈၶၢဝ်ႇလိုဝ်းလင် ၶႅပ်းဝႂ် 2 မိုၼ်ႇ တေဢွၵ်ႇမႃးၼႆႉသေ ၶၼ်ၶဝ်ႈ သၢၼ်၊ ႁူဝ်မီႇၼမ်ႉမၼ်း ၶွင်ၵိၼ်ယႅမ်ႉ ၸိူဝ်းၼႆႉ ၶိုၼ်ႈၵူႈမဵဝ်း ၵူၼ်းမိူင်းတႄႉ ယၢပ်ႇၽိုတ်ႇႁႅင်းၶႃႈဢေႃႈ။ မိူၼ်ၼင်ႇ ၶဝ်ႈသၢၼ် သႅၼ်း 502 (1 ထူင်) ပဵၼ်ၵႂႃႇ 105,000 ပျႃး – 110,000 ပျႃးယဝ်ႉ။ ၽၵ်းမီႇလႅင်ၼႆႉ ၵူႈပွၵ်ႈ 1 ၸွႆႉ 2,000 ပျႃး ယၢမ်းလဵဝ် ပဵၼ်ၵႂႃႇ 5,000 ပျႃး။ ၼမ်ႉမၼ်းၸၢၵ်ႈ 1 လိတ်ႊလႂ် 27,00 ပျႃး ထိုင် 28,00 ပျႃးယဝ်ႉ ၼႆႉပဵၼ် ၶၼ်ၵုၼ်ႇ ၶွင်ၵိၼ်ယႅမ်ႉ ၵူၺ်း ပႆႇပႃး ၶၼ်ၶူဝ်းၵုၼ်ႇ ၶိူင်ႈၸႂ်ႉသွႆ ၼႂ်းသူၼ်ႁႆႈၼႃး”- ဝႃႈၼႆ။

မိူၼ်ၼင်ႇ ၶိူင်ႈၶူဝ်းၸႂ်ႉၼႂ်းသူၼ်ႁႆႈၼႃး ၸိူဝ်းၼႆႉသမ်ႉ ထူင်သႂ်ႇၶဝ်ႈၵၢပ်ႇ/ ၶႄႇ 100 ထူင် ၵူႈပွၵ်ႈလႆႈသိုဝ်ႉ 12,000 ပျႃး – 13,000 ပျႃး။ ယၢမ်းလဵဝ် 100 ထူင် လႆႈသိုဝ်ႉ 27,000 ပျႃးယဝ်ႉ။ ယဝ်ႉၵေႃႈ ၸိူၵ်ႈသၢႆယၢင် (ၸိူၵ်ႈမတ်ႉသၢင်ႉထူဝ်ႇ) ၸိူဝ်းၼႆႉ မိူဝ်ႈပီၵၢႆ 1 ၵဵၼ် 3,500 ပျႃး 3 ၵဵၼ် လႆႈပၼ် 10,000 ပျႃးပၢႆ။ ယၢမ်းလဵဝ် 1 ၵဵၼ် လႆႈပၼ် 7,000 ပျႃး – 9,000 ပျႃးယဝ်ႉ။

ၶွင်ၵိၼ်ယႅမ်ႉလႄႈ ၶိူင်ႈၶူဝ်းၸႂ်ႉတိုဝ်း ၼႂ်းသူၼ်ႁႆႈၼႃး တၢင်းၵုၼ်လူင် – ႁူဝ်ပၢင်ႇ – လၢဝ်ႇၵၢႆး – ဝဵင်းၼမ်ႉၽႃႈ (သျိၼ်းသူၺ်ႇႁေႃႇ) ၸိူဝ်းၼႆႉသမ်ႉ တေပဵၼ်ၶူဝ်းၶွင်တၢင်းၾင်ႇမိူင်းၶႄႇ တေႃႉသူင်ႇၶဝ်ႈမႃးၶၢႆ။ ယွၼ်ႉၶၢဝ်ႇၶႅပ်းဝႂ် 2 မိုၼ်ႇပျႃး တေဢွၵ်ႇမႃး ၼႆႉသေ ႁဵတ်းႁႂ်ႈ ၶၼ်ငိုၼ်းမၢၼ်ႈ တူၵ်းႁႅင်း။ ယၢမ်းလဵဝ် ပေႃးဢဝ် ငိုၼ်းၶႄႇလႅၵ်ႈငိုၼ်းမၢၼ်ႈၸိုင် 100 ယႂၼ်ႊ လႆႈမၢၼ်ႈ 49,000 ပျႃး တေႃႇထိုင် 51,000 ပျႃးယဝ်ႉ။

ၸႄႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇၼႆႉ ယူႇၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းဝႃႉ ဢၼ်သိုၵ်းမၢၼ်ႈတႅမ်ႈဝႆႉ ၼႂ်းပိူင်ငဝ်ႈပိုင်းမိူင်း 2008 လူၺ်ႈဢမ်ႇထၢမ်ၵၢင်ၸႂ်ၵူၼ်းတင်းမိူင်း။ ၸႄႈဝဵင်းၵုၼ်လူင်ၼႆႉသမ်ႉ ယူႇတႂ်ႈလူင်ပွင် ၸိုင်ႈ ၵုမ်းၵမ်ဝႆႉ ၵမ်းသိုဝ်ႈ ၼႆယဝ်ႉ။