မိူဝ်ႈၼႆႉ ဝၼ်းတီႈ 2/9/2023 ယၢမ်းၵၢင်ၼႂ် ယူႇတီႈၸုမ်းၵူၼ်းၼုမ်ႇ ၸေႊလၢၼ်ႉ လူင်းၵူတ်ႇထတ်းတူၺ်း ၸွမ်းၼႂ်းပွၵ်ႉယွမ်ႇ ၼႂ်းၵၢတ်ႇသေ ထူပ်းႁၼ် မၢၵ်ႇလူင် ဢၼ်ပႆႇတႅၵ်ႇ တင်းမူတ်း 4 ႁူၺ်ႇ တီႈၼႂ်းၵၢတ်ႇၸေႊလၢၼ်ႉ ၸႄႈဝဵင်းမူႇၸေႊ။

ၵူၼ်းၼုမ်ႇၸေႊလၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ -“တေႃႈလဵဝ် ႁဝ်းၶႃႈ ထူပ်းႁၼ် 4 ႁူၺ်ႇယဝ်ႉၶႃႈ ၸိူဝ်းပႆႇတႅၵ်ႇ။ ၵူၺ်းၵႃႈ ပႆႇလႆႈလဵပ်ႈတူၺ်းမူတ်းလႄႈ ပႆႇၸၢင်ႈလၢတ်ႈဝႃႈ တင်းမူတ်း ဢၼ်ဢမ်ႇတႅၵ်ႇတေမီးထႅင်ႈလၢႆႁူၺ်ႇၼႆ ဢၼ်ႁၼ်ၸိူဝ်းၼႆႉ ပဵၼ်တီႈၼႂ်းၵၢတ်ႇၸေႊလၢၼ်ႉတင်းမူတ်းဢေႃႈ။ လွင်ႈမၢၵ်ႇမႃးတူၵ်းသႂ်ႇၼႂ်းၵၢတ်ႇသေ တႅၵ်ႇၵႂႃႇ ႁဵတ်းႁႂ်ႈတုမ်ႉတိူဝ်ႉၵူၼ်း မၢတ်ႇၸဵပ်းလူႉတၢႆ၊ ၶူဝ်းၶွင်လူႉသုမ်းတႄႉ ၸိူဝ်းၼႆႉတႄႉ ဢမ်ႇမီးၶႃႈ”- ဝႃႈၼႆ။

မၢၵ်ႇလူင် ဢၼ်မႃးတူၵ်းဝႆႉၼႂ်းၵၢတ်ႇၸေႊလၢၼ်ႉၼႆႉ ပဵၼ်မၢၵ်ႇသိုၵ်းမၢၼ်ႈတင်း သိုၵ်းတဢၢင်း TNLA ပိုတ်းယိုဝ်းၵၼ် မႃးႁၢဝ်ႈႁႅင်း မိူဝ်ႈႁၢင်လိူၼ်ဢေႃႊၵတ်ႊသ်ၼႆႉသေ ႁၢၼ်ႉတေႃႇထိုင်ယၢမ်းလဵဝ် တင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်း ၵၼ် ဝႆႉယူႇ။

“ပဵၼ်မၢၵ်ႇသိုၵ်းမၢၼ်ႈ တင်းသိုၵ်းလွႆ ယိုဝ်းၵၼ်မိူဝ်ႈပူၼ်ႉမႃးၼႆႉၶႃႈဢေႃႈ ၵွပ်ႈၼႆလႄႈ ယွၼ်းၾၢၵ်ႇထိုင် ၵူၼ်းမိူင်းႁဝ်းၶႃႈ သင်ဝႃႈတေၵႂႃႇမႃးၸွမ်းသဵၼ်ႈတၢင်းၵႃး ၸွမ်းၼႂ်းမၢၼ်ႈ ၸွမ်းၼႂ်းၵၢတ်ႇ ၸိူဝ်းၼႆႉ ႁႂ်ႈၾၢင်ႉသတိၵႂႃႇမႃးၵၼ်ၽွင်ႈၶႃႈ ၵူဝ်ၵႂႃႇ ၽႃႇၺႃးမၢၵ်ႇၸိူဝ်းၼၼ်ႉသေ တႅၵ်ႇသႂ်ႇႁဝ်းၶႃႈဢေႃႈ”- ၵူၼ်းၼုမ်ႇ ပိုၼ်ႉတီႈ ၸေႊလၢၼ်ႉ သိုပ်ႇတုၵ်းသူၼ်းလၢတ်ႈၼႄၼင်ႇ ၼႆ။

ယၢမ်းလဵဝ် သိုၵ်းတင်းသွင်ၾၢႆႇၼႆႉ တိုၵ်ႉၶဵင်ႈၶႅင်ၵၼ်ဝႆႉယူႇ ယဝ်ႉၵေႃႈ သိုၵ်းတဢၢင်း TNLA ၸိူဝ်းၼႆႉၵေႃႈ တိုၵ်ႉမူၵ်းသွၼ်ႈယူႇ ဝႆႉ ၼႂ်းႁိူၼ်းယေး ၵူၼ်းဝၢၼ်ႈ မိူၼ်ၼင်ႇ ဝၢၼ်ႈၾၢႆဝဵင်း၊ ၵွင်းၼႃး၊ ၼွင်သႅင် ၸိူဝ်းၼႆႉဝႆႉထႅင်ႈယူႇ ၵူၼ်းပိုၼ်ႉတီႈလၢတ်ႈ။

တႄႇဢဝ် ဝၼ်းတီႈ 28/8/2023 ၼၼ်ႉမႃး သိုၵ်းမၢၼ်ႈ ယိုတ်းမိူင်း ယူႇတီႈတပ်ႉၶဝ် တၢင်းၾၢႆႇႁွင်ႇၸေႊလၢၼ်ႉ တီႈလွႆသူး တွင်းၼၼ်ႉသေ ယိုဝ်းမၢၵ်ႇလူင်သႂ်ႇ တပ်ႉသိုၵ်းတဢၢင်း TNLA ဢၼ်ပၵ်းဝႆႉတီႈလွႆတေးမိူင်း တၢင်းၾၢႆႇၸၢၼ်းၸေႊလၢၼ်ႉ ၼၼ်ႉ ႁၢဝ်ႈႁႅင်း မၢၵ်ႇလူင် တူၵ်းတႅၵ်ႇ ၵျွင်းမုၼ်ၸဝ်ႈ တီႈၼိူဝ်လွႆတေးမိူင်းၼႆႉ ထုၵ်ႇၾႆးပႅတ်ႈလင်ၼိုင်ႈ။ တႄႇဢဝ်ၼၼ်ႉမႃး တင်းသွင်ၾၢႆႇ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၼႂ်းဢိူင်ႇၸေႊလၢၼ်ႉ ႁဵတ်းႁႂ်ႈမၢၵ်ႇလူင်တူၵ်းသႂ်ႇႁိူၼ်းယေး ႁူင်းႁဵၼ်း ထုၵ်ႇ ၾႆးမႆႈ လူႉၵွႆသုမ်းၼမ် တိူဝ်ႉၺႃးၵူၼ်းမိူင်း လႆႈမၢတ်ႇၸဵပ်းၸွမ်းႁၢဝ်ႈႁႅင်းထႅင်ႈ 2 ၵေႃႉ ယဝ်ႉၵေႃႈ ႁဵတ်းႁႂ်ႈၵူၼ်းၸေႊလၢၼ်ႉ ပၢႆႈၽေးသိုၵ်း ၵႂႃႇသွၼ်ႈယူႇၸွမ်းႁိူၼ်းယေးပီႈၼွင်ႉၽႂ်မၼ်း ၼႂ်းဝဵင်းမူႇၸေႊ ၸိူဝ်းၼႆႉထႅင်ႈတင်းၼမ်။