သိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းမၢၵ်ႇလူင် ၵႂႃႇၵူႈႁူးၵူႈတၢင်းသေ တူၵ်းတႅၵ်ႇ ၸၢၵ်ႇမၢၵ်ႇတိူဝ်ႉသႂ်ႇၵူၼ်းၵူတ်ႉၶၢႆ လူႉ တၢႆထင်တီႈ 1 ၵေႃႉ မၢတ်ႇၸဵပ်းထႅင်ႈ 3 ၵေႃႉ။

မိူဝ်ႈဝႃး ဝၼ်းတီႈ 1/9/2023 ယၢမ်းဝၢႆးဝၼ်းမွၵ်ႈ 1:30 မူင်း သိုၵ်းမၢၼ်ႈ ယိုတ်းမိူင်း တပ်ႉၶလယ 123 ၼမ်ႉၽၵ်းၵႃ လၢမ်းလိမ်းယိုဝ်းၵွင်ႈလူင် ၵႂႃႇတၢင်းမူႇၸေႊၼၼ်ႉသေ မၢၵ်ႇလူင်တူၵ်းသႂ်ႇၵူၼ်းဝၢၼ်ႈ ဢၼ်မီးႁိမ်းတပ်ႉၶဝ် ယၢၼ်တပ်ႉမွၵ်ႈ 500 ထတ်း တၢင်းၾၢႆႇႁွင်ႇတပ်ႉ ၼႂ်းဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႇ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇ ၽူႈၸၢႆး ဢႃယုမွၵ်ႈ 35 ပီ လူႉတၢႆထင်တီႈ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇထႅင်ႈ ၵူၼ်းႁိမ်းႁွမ်းၸိူဝ်းၼၼ်ႉ လႆႈမၢတ်ႇၸဵပ်း ၸွမ်းႁၢဝ်ႈႁႅင်းထႅင်ႈ 3 ၵေႃႉ။

ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈ တပ်ႉၶလယ 123 ၼႆႉၶႃႈဢေႃႈ ၶဝ်လုၵ်ႉတီႈ တပ်ႉၶဝ်ၼႆႉသေ လၢမ်းလိမ်းယိုဝ်းလူင်ၵႂႃႇတၢင်းမူႇၸေႊၼၼ်ႉၶႃႈဢေႃႈ။ မိူဝ်ႈဝႃး ၶဝ်ယိုဝ်းမၢၵ်ႇလူင်ၼႆႉ ဢမ်ႇယွမ်း 10 လုၵ်ႈ ၶႃႈ။ ၵူၺ်းၵႃႈ မၢၵ်ႇၶဝ် ၸိူဝ်းၼၼ်ႉ မၢင်လုၵ်ႈယိုဝ်းၵႂႃႇဢမ်ႇၵႆသေ တူၵ်းတႅၵ်ႇတိူဝ်ႉသႂ်ႇ ၵူၼ်းၸိူဝ်းယူႇႁိမ်းတပ်ႉၶဝ်ၼႆႉ လူႉတၢႆ 1 ၵေႃႉ ပဵၼ်ၸၢႆး (ၸၢဝ်းၶၢင်)။ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇထႅင်ႈ ၽူႈယိင်း 1 ၵေႃႉ ၸၢႆး 2 ၵေႃႉ လႆႈမၢတ်ႇၸဵပ်းႁၢဝ်ႈႁႅင်း ၶႃႈဢေႃႈ။ ၵူၼ်းဝၢၼ်ႈၼႆႉသမ်ႉ ၶဝ်ႁဵတ်းၵၢၼ်ယူႇႁိမ်းႁိူၼ်းသေ မၢၵ်ႇလူင်သိုၵ်းမၢၼ်ႈၼႆႉ တူၵ်းမႃးသႂ်ႇႁဵတ်းၼၼ်ၶႃႈဢေႃႈ”- ဝႃႈၼႆ။

ယၢမ်းလဵဝ် ၵူၼ်းပိုၼ်ႉတီႈ 3 ၵေႃႉ ဢၼ်ၺႃးၸၢၵ်ႇမၢၵ်ႇလူင်သိုၵ်းမၢၼ်ႈၼၼ်ႉ ယွၼ်ႉလႆႈတိူဝ်ႉမၢတ်ႇၸဵပ်းႁၢဝ်ႈႁႅင်းလႄႈ လႆႈ သူင်ႇ ယူတ်းယႃတူဝ်ဝႆႉတီႈ ႁူင်းယႃၵူတ်ႉၶၢႆယဝ်ႉ။ ၽူႈၸၢႆး ၵေႃႉလူႉတၢႆထင်တီႈၼၼ်ႉ ယူႇတီႈၵူၼ်းဝၢၼ်ႈ ၸုမ်းၸွႆႈထႅမ်ပရႁိတၶဝ် လႆႈဢဝ်ၵႂႃႇပူၼ်ႉၶၢပ်ႈတူဝ် မိူဝ်ႈဝႃး ဝၼ်းတီႈ 1/9/2023 ၼႆႉယဝ်ႉ။

သိုၵ်းမၢၼ်ႈ တပ်ႉၶလယ 123 တီႈၼမ်ႉၽၵ်းၵႃၼႆႉ လၢမ်းလိမ်းယိုဝ်းၵွင်ႈလူင် ၵႂႃႇၵူႈႁူးၵူႈတၢင်း ၸိူင်ႉၼႆ ၵူႈဝၼ်းၵူႈၶမ်ႈလႄႈ ၵူၼ်းပိုၼ်ႉတီႈႁိမ်းႁွမ်းၼၼ်ႉ ၵူဝ်မၢၵ်ႇလူင်တူၵ်းသႂ်ႇ ၵူဝ်ၸုမ်းယိပ်းၵွင်ႈၶဝ်ႈလူမ်ႇယိုဝ်းတပ်ႉၶဝ်သေ  ပေႃး ယၢမ်းၶမ်ႈမႃးၸိုင် ဢွၼ်ၵၼ်ပၢႆႈၶဝ်ႈမူၵ်းၼွၼ်းၼႂ်းလုၵ်းထႅင်ႉ (လုၵ်းလိၼ်) ၵၼ် ၼႆယဝ်ႉ။

“မွင်းဝႃႈ ႁူဝ်ၶမ်ႈမႃးၼႆ ႁဝ်းၶႃႈ ႁၢင်ႈႁႅၼ်း ဢွၼ်ၵၼ်ၵႂႃႇၼွၼ်းၼႂ်းလုၵ်းလိၼ်ယဝ်ႉ တီႈၵူၼ်းၼမ်ႉၽၵ်းၵႃၼႆႉ ၵူဝ်ၶႃႈ ဢေႃႈ။ ၵူဝ်မၢၵ်ႇလူင်တူၵ်းသႂ်ႇ။ ၵူဝ်ၶဝ်ပဵၼ်ပၢင်တိုၵ်းၵၼ် ၸိူဝ်းၼႆႉသေ ၵူဝ်ဢမ်ႇတၼ်းပၢႆႈလွတ်ႈၼၼ်ႉၶႃႈယဝ်ႉ။ ႁဝ်း ၶႃႈ လႆႈမႃး ၼွၼ်း ၼႂ်းလုၵ်းလိၼ်ၼႆႉ မီးမွၵ်ႈ 1 ဝူင်ႈၼႆႉယဝ်ႉ။ ၵၢင်ၶမ်ႈၶဝ်ႈမႃးၼွၼ်း ၵၢင်ဝၼ်းဢွၵ်ႇႁဵတ်းၵၢၼ် ၸိူင်ႉ ၼႆၶႃႈဢေႃႈ”- ၵူၼ်း ပိုၼ်ႉတီႈ ဝဵင်းၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။

မိူဝ်ႈဝၼ်းတီႈ 30/8/2023 ယၢမ်းၵၢင်ၼႂ် 10 မူင်းပၢႆ ၽူႈၸၢႆး (ၸၢဝ်းၶႄႇ) ၵေႃႉၼိုင်ႈ ၵူၼ်းဝၢၼ်ႈႁူဝ်ပုင်ႇ ၼႂ်းဢိူင်ႇၼမ်ႉ ၽၵ်းၵႃ ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ တိူဝ်ႉၺႃးမၢၵ်ႇလူင် သိုၵ်းမၢၼ်ႈ တပ်ႉၶလယ 123 တီႈၼမ်ႉ ၽၵ်းၵႃၼႆႉသေ လႆႈလူႉတၢႆထင်တီႈၼႂ်းသူၼ် ႁိမ်းႁိူၼ်းမၼ်းၸၢႆး။

တႄႇဢဝ် လိူၼ်ဢေႃႊၵတ်ႊသ်မႃး တေႃႇထိုင်ႁူဝ်လိူၼ်သႅပ်ႊထႅမ်ႊပိူဝ်ႊ 2023 ၼႆႉ ၸွမ်းၼင်ႇ ၵူၼ်းပိုၼ်ႉတီႈ ၵဵပ်း ၶေႃႈမုလ်းဝႆႉ လွင်ႈသိုၵ်းမၢၼ်ႈ ယိုတ်းမိူင်း တပ်ႉၶလယ 123 လမ်းလၢမ်းယိုဝ်းၵွင်ႈလူင် ၵႂႃႇၵူႈႁူႈၵူႈတၢင်းၼၼ်ႉသေ မၢၵ်ႇလူင် တူၵ်းတႅၵ်ႇ သႂ်ႇၵူၼ်းပိုၼ်ႉတီႈ ၼႂ်းဢိူင်ႇၼမ်ႉၽၵ်းၵႃၼႆႉ လူႉတၢႆၵႂႃႇယဝ်ႉ 5 ၵေႃႉ၊ မၢတ်ႇၸဵပ်း 6 ၵေႃႉ ၼႆယဝ်ႉ။

ဢိူင်ႇၼမ်ႉၽၵ်းၵႃၼႆႉ မီးၼႂ်းၵႄႈၵူတ်ႉၶၢႆ – မူႇၸေႊ။ မီးၾၢႆႇႁွင်ႇၵူတ်ႉၶၢႆ ယၢၼ်ၵူတ်ႉၶၢႆ 26 လၵ်းလႄႈ ယၢၼ်မူႇၸေႊ 36 လၵ်း။ တီႈဢိူင်ႇၼမ်ႉၽၵ်းၵႃၼႆႉ မီးဝႆႉတပ်ႉသိုၵ်းမၢၼ်ႈ ၶလယ 123 ပၵ်းဝႆႉ။