ၶူးသွၼ်ၼၢင်းဢူင်းၵျီႇ ဢႃႇယု 71 ပီ ၽူႈၵွၼ်းႁူင်းႁဵၼ်းၸၼ်ႉသုင် (ၵေႃႉၵဝ်ႇ) ဝဵင်းလၢင်းၶိူဝ်း ပဵၼ်လူမ်းလူမ်ႉ သဵင်ႈသၢႆၸႂ် ၼႂ်းပၢင်ၵၼ်ႇတေႃးၶူးသွၼ် ဢၼ်လုၵ်ႈႁဵၼ်းၵဝ်ႇၶဝ်ၼမ်းၸတ်း  ။

လုၵ်ႈႁဵၼ်းဢၼ်ဢွင်ႇပူၼ်ႉၸၼ်ႉသိပ်းၼႂ်းပီ  1985 ထိုင် 1995  ၸတ်းပၢင်ၵၼ်ႇတေႃးၶူးသွၼ် မေႃသွၼ် ဢၼ်ယၢမ်ႈလႆႈသွၼ်ပၼ်ၶဝ်။ ပၢင်ၵၼ်ႇတေႃးၶူးသွၼ် ၸတ်းႁဵတ်းမိူဝ်ႈဝၼ်းတီႈ 28/4/2018 တီႈႁူင်းႁဵၼ်းၸၼ်ႉသုင် ဢၼ်မီးတီႈပွၵ်ႉဝၢၼ်ႈလွႆ ဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း။ ၶူးသွၼ်ဢၼ်မႃးၶဝ်ႈႁူမ်ႈမီးႁိမ်း 30  ဝႃႈၼႆ။

ၸၢႆးၶမ်း လုၵ်ႈႁဵၼ်းၵဝ်ႇ ၽူႈၶဝ်ႈႁူမ်ႈၸတ်းပၢင်ၵၼ်ႇတေႃးၶူးသွၼ်လၢတ်ႈဝႃႈ- “ပွတ်းၼႂ်ႁဝ်းၶႃႈ ၵၼ်ႇတေႃးၶူး။ ပွတ်းႁူဝ်ၶမ်ႈ ၵိၼ်ၶဝ်ႈႁူမ်ႈမူႇလႄႈမီးပၢင်ႁွင်ႉၵႂၢမ်း။ ၶူးႁဝ်းၶႃႈ လႆႈၵႃႈၸွမ်းၽဵင်းၵႂၢမ်းၸၢႆးဢွင်ႇထီးၶမ်း ဢၼ်ပဵၼ်လုၵ်ႈႁဵၼ်းမၼ်းသေ ၽိူဝ်ႇၽဵင်းၵႂၢမ်းသုတ်း ၶူးသွၼ်ၵေႃႈပဵၼ်လူမ်းလူမ်ႉ၊ ႁိပ်ႈၼႅတ်ႈဢဝ်ၵႂႃႇႁူင်းယႃ၊ ၵႂႃႇသဵင်ႈတီႈႁူင်းယႃၶႃႈဢေႃႈ ”- ဝႃႈၼႆ။

ၶူးသွၼ်ၼၢင်းဢူင်းၵျီႇၼႆႉ ပဵၼ်ၶူးသွၼ်ႁူင်းႁဵၼ်း ၸၼ်ႉငဝ်ႈ ၸၼ်ႉၵၢင် ၸၼ်ႉသုင် တီႈႁူင်းႁဵၼ်းၼႂ်းမိူင်းလၢင်းၶိူဝ်း ၶၢဝ်းတၢင်း 40 ပီပၢႆ ။ လိူဝ်ၼၼ်ႉယၢမ်ႈပဵၼ်ၽူႈၵွၼ်းႁူင်းႁဵၼ်း လၢႆလၢႆတီႈ ပႃးၸဵမ်ႁူင်းႁဵၼ်းၸၼ်ႉသုင် ဝဵင်းလၢင်းၶိူဝ်း။ ၶူးသွၼ်ၼႆႉ လိုဝ်ႈၵၢၼ်ပဵၼ်ၶူး ၸဵမ်မိူဝ်ႈ 10 ပီပူၼ်ႉမႃး။

“ၶူးႁဝ်းၶႃႈၼႆႉမီးတၢင်းပဵၼ် လိူတ်ႈလိူဝ် ၊ တၢင်းပဵၼ်ႁူဝ်ၸႂ် ဝႆႉၸဵမ်လႂ်။ ဝၼ်းႁဝ်းၶႃႈၵၼ်ႇတေႃးၶူးၼႆႉ ၶူးတေၸူမ်းသိူဝ်းၸႂ်ၵေႃႈပႃးၶႃႈဢေႃႈ။ ႁိူဝ်ႉၵေႃႈတေပႃးၶႃႈဢေႃႈ။ ယွၼ်ႉပိူဝ်ႈလုၵ်ႈႁဵၼ်းမၼ်းၼၢင်း ၼႂ်းၸုပ်ႈၼႆႉ ဢၼ်ပဵၼ်ၶူးသွၼ်မေႃသွၼ်ၵေႃႈၼမ်။ ဢၼ်ပဵၼ်မေႃယႃၵေႃႈမီး၊ ဢၼ်ႁဵတ်းၵၢၼ်ပၢႆးမိူင်းၵေႃႈမီး။ ဢၼ်ပဵၼ်မေႃႁွင်ႉၵႂၢမ်းၸိုဝ်ႈသဵင်ယႂ်ႇၵေႃႈပႃး။ ၶူးလႅပ်ႈတေၸူမ်းသိူဝ်းၸႂ်ႁႅင်းဝႆႉၶႃႈဢေႃႈ” – ၼၢင်းယိင်း ဢၼ်ပဵၼ်လုၵ်ႈႁဵၼ်းၵေႃႉၼိုင်ႈလၢတ်ႈ။

ၶၢပ်ႈတူဝ်ၶူးသွၼ်ၼၢင်းဢူင်းၵျီႇၼႆႉ လုၵ်ႈႁဵၼ်းလုၵ်ႈၼွင်ႉလႄႈ ပီႈၼွင်ႉဢူၺ်းၵေႃႉ ၼပ်ႉႁူဝ်ပၢၵ်ႇ ႁူမ်ႈၵၼ်လုမ်းလႃးၽဝ်ၶၢပ်ႈတူဝ်ႁွပ်ႇႁူဝ်ၶဝ်ႈႁဵဝ်ႈၼႂ်းဝၼ်းတီႈ 30/4/2018 ။ တီႈပႃႇႁဵဝ်ႈလၢင်းၶိူဝ်း။

ၶူးသွၼ်ၼၢင်းဢူင်းၵျီႇၼႆႉ ၸႃႇတိတီႈၵိူတ်ႇပဵၼ်ဝၢၼ်ႈႁၢတ်ႇ ဝဵင်းလၢင်းၶိူဝ်း။ ၶူးသွၼ်ၼႆႉ တႄႇၼႃးႁိူၼ်းၵိုၵ်း လုင်းၸၢႆးဢွင်ႇလႃႉ ၵူၼ်းလၢင်းၶိူဝ်းသေ ၶၢႆႉမႃးယူႇလၢင်းၶိူဝ်း။ မီးလုၵ်ႈလၢင်း 4 ၵေႃႉ ။ ယၢမ်းလဵဝ် ယူႇဝႆႉပွၵ်ႉပၢင်ႁုင်းဝဵင်းလၢင်းၶိူဝ်း ။