ၵႃးၵူၼ်းမိူင်း လမ်းၼိုင်ႈ ၺႃးယိုဝ်း တီႈလွႆလၢဝ်း ၸႄႈဝဵင်းမိူင်းၵိုင် တူဝ်ၵူၼ်းႁေႃႈၵႃးတႄႉ တၢႆႁိုဝ် လိပ်းႁိုဝ် ဢၼ် ဝႃႈၼၼ်ႉ ပႆႇႁူႉ ဝႃႈၼႆ။
ဝၼ်းတီႈ 27/04/2018 ၵႃးၵူၼ်းမိူင်း လမ်းၼိုင်ႈ ၺႃးယိုဝ်း တီႈလွႆလၢဝ်း ႁိမ်းတၢင်းၽႄ ၵႂႃႇဝၢၼ်ႈႁူဝ်ၶၢႆး ၼႂ်းဢိူင်း တူင်ႇလၢဝ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ တူဝ်ၵူၼ်းႁေႃႈၵႃးၼၼ်ႉ တၢႆႁိုဝ် လိပ်းႁိုဝ် ပႆႇလႆႈႁူႉ။ တီႈၵႃးၼၼ်ႉတႄႉ ႁၼ်မီးႁွႆးလိူတ်ႈဢိူၵ်ႇဝႆႉၵမ်ႈၽွင်ႈသေ လႆႈႁၼ်တီႈၵႃးၼၼ်ႉ ၺႃးမၢၵ်ႇၵွင်ႈယိုဝ်းသႂ်ႇ လၢႆလၢႆၵမ်း ဝႃႈၼႆ။
လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(2) ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈ ႁဝ်းၵေႃႈ လႆႈႁပ်ႉႁူႉတီႈၵူၼ်းပိုၼ်ႉတီႈလၢတ်ႈၼႄၵူၺ်း ၵႃးလမ်းၼၼ်ႉ ၺႃးမၢၵ်ႇၵွင်ႈယိုဝ်းသႂ်ႇ ပဵၼ်လၢႆၵမ်း။ ၵူၺ်းၵႃႈ တူဝ်ၵူၼ်းႁေႃႈမၼ်းတႄႉ ဢမ်ႇႁၼ်။ လႆႈႁၼ်ၼႂ်းၵႃးၼၼ်ႉတႄႉ ဢိူၵ်ႇလိူတ်ႈဝႆႉ။ လိူဝ်ၼၼ်ႉ တၢင်းၾၢႆႇ ၸဝ်ႈၼႃႈတီႈ RCSS တင်းၸဝ်ႈၼႃႈတီႈမၢၼ်ႈၵေႃႈ လႅပ်ႈၵႂႃႇၵူတ်ႇထတ်းတူၺ်းယူႇ။ ယၢမ်းလဵဝ် ပႆႇလႆႈငိၼ်း ၶၢဝ်ႇ ဢွၵ်ႇမႃးသင် ဝႃႈပဵၼ်လွင်ႈသင် ယွၼ်ႉသင်။ ယဝ်ႉၵေႃႈ ပဵၼ်ၽႂ် ၵေႃႉလႂ်ႁဵတ်း ဢၼ်ဝႃႈ ၼၼ်ႉတႄႉ ပႆႇႁူႉ။ လွင်ႈဢၼ်ဝႃႈ ၵႃးၵူၼ်းမိူင်းၺႃးယိုဝ်း ဢၼ်ဝႃႈၼၼ်ႉတႄႉ ႁဝ်းၶႃႈၵေႃႈ ပႆႇယိုၼ်ယၼ်လႆႈ ယွၼ်ႉၶႃႈႁဝ်းၵေႃႈ လႆႈငိၼ်းပိူၼ်ႈ လၢတ်ႈၵူၺ်း” ဝႃႈၼႆ။
ၵဵဝ်ႇၵပ်းလွင်ႈၼႆႉ ပဵၼ်ၸုမ်းလႂ် ပဵၼ်ၽႂ် ဢၼ်ဝႃႈၼၼ်ႉ ပႆႇႁူႉသေတႃႉ ႁွင်ႈၵၢၼ်ပိုၼ်ၽၢဝ်ႇ တႆးလွတ်ႈလႅဝ်းတႄႉ ဢွၵ်ႇဝႆႉဝႃႈ “ ၵႃးၼႆႉ ၺႃးယိုဝ်းတၢင်းလင်လႄႈ တၢင်းၶၢင်ႈၾၢႆႇၶႂႃ/သၢႆႉ တင်းသွင်ၾၢႆႇ။ ပဵၼ်တပ်ႉသိုၵ်းမၢၼ်ႈ ၶလယ 249 ယိုဝ်း” ဝႃႈၼႆ။
တပ်ႉၶလယ 249 ၼႆႉ တူၵ်းပုၼ်ႈၽွၼ်းမႃးတီႈသျႃးတေႃး မီးလၢႆပီ။ ငဝ်ႈတပ်ႉၵွင် 249 တႄႉ ပၵ်းဝႆႉတီႈဝဵင်း ပၢင်လွင်း ၸႄႈတွၼ်ႈတူၼ်ႈတီး မိူင်းတႆးပွတ်းၸၢၼ်း ဝႃႈၼႆ။
