သိုၵ်းတဢၢင်း TNLA ႁၢမ်ႈၵူၼ်းပိုၼ်ႉတီႈ ဝဵင်းမူႇၸေႊၵႂႃႇမႃး ၸွမ်းၼႂ်းထိူၼ်ႇၶိူဝ်းလႄႈ သူၼ်ၼႃး ၵူဝ်ၽႃႇၺႃးမၢၵ်ႇမႅင်း တႅၵ်ႇသႂ်ႇ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း ထူပ်းလွင်ႈယၢပ်ႇၽိုတ်ႇႁႃၵိၼ်လဵင်ႉတွင်ႉ။

ဝၼ်းတီႈ 16/8/2023 ယၢမ်းႁူဝ်ၶမ်ႈ သိုၵ်းတဢၢင်း TNLA တႄႇႁၢမ်ႈၵူၼ်းဝၢၼ်ႈ ၼႂ်းဢိူင်ႇၼွင်သႅင် ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ၵႂႃႇသူၼ်ၼႃး ပၼ်ၾၢင်ႉသတိဝႆႉ “ပၢင်တိုၵ်းၼႆႉ ဢမ်ႇႁူႉဝႃႈ တေၵိူတ်ႇၶိုၼ်ႈမိူဝ်းလႂ် ”ယၢမ်းလဵဝ် သိုၵ်း တင်းသွင်ၾၢႆႇ တိုၵ်ႉၶဵင်ႈၶႅင်ၵၼ်ဝႆႉလႄႈ ႁဵတ်းႁႂ်ႈၵူၼ်းပိုၼ်ႉတီႈထူပ်းတၢင်းယၢပ်ႇၽိုတ်ႇ လွင်ႈၵၢၼ်ႁႃၵိၼ်လဵင်ႉတွင်ႉ ၼႆယဝ်ႉ။

ၵူၼ်းပိုၼ်ႉတီႈ ၼႂ်းဢိူင်ႇၼွင်သႅင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၶၢဝ်းသွမ်းၼႃႈတႄႉ ယဝ်ႉၵႂႃႇယဝ်ႉ ပဵၼ်ၽွင်း ၸဝ်ႈ ၼႃးၶဝ် လူဝ်ႇသႂ်ႇၾုၼ်ႇထၢတ်ႈ၊ လူဝ်ႇၽဵဝ်ႈယိူဝ်ႈ၊ လူဝ်ႇတူၺ်းၼမ်ႉၼႃး ၸိူဝ်းၼႆႉ။ သိုၵ်းလွႆသမ်ႉႁၢမ်ႈၵူၼ်းဝၢၼ်ႈ ၵႂႃႇမႃးၸွမ်း ၼႂ်းၼႃး ၶဝ်ၵူဝ်ပၢင်တိုၵ်းၼႆႉ တေၵိူတ်ႇၶိုၼ်ႈမိူဝ်ႈလႂ် ဢမ်ႇႁူႉ ၼႆဝႃႇ။ ၶၢဝ်းတၢင်း 2-3 ဝၼ်းမႃးၼႆႉ သိုၵ်းမၢၼ်ႈတင်း သိုၵ်းလွႆ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ”- ဝႃႈၼႆ။

သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ၶဵင်ႈၶႅင်ၵၢၼ်သိုၵ်းၵၼ်ဝႆႉ ၼႂ်းၵႄႈသဵၼ်ႈတၢင်း ၼမ်ႉၶမ်း – မူႇ ၸေႊ တီႈဢိူင်ႇၼွင်သႅင် ၸိူဝ်းၼႆႉဝႆႉ တင်ႈတႄႇ ဝၼ်းတီႈ 16 ၼၼ်ႉမႃး တေႃႇထိုင်ယၢမ်းလဵဝ်။

လိူဝ်ၼၼ်ႉ သိုၵ်းတဢၢင်း TNLA ႁၢမ်ႈၵူၼ်းပိုၼ်ႉတီႈ ၼႂ်းဢိူင်ႇၸေႊလၢၼ်ႉဝႆႉ ယႃႇၵႂႃႇတၢင်းၾၢႆႇၸၢၼ်း လွႆတေမိူင်း ၸွမ်း ၼႂ်းထိူၼ်ႇၶိူဝ်း ၸိူဝ်းၼၼ်ႉ ယွၼ်ႉၵူဝ်ၽႃႇၺႃးမၢၵ်ႇမႅင်း။ ပေႃးတေၵႂႃႇၸိုင် ႁႂ်ႈပွင်ႇလၢတ်ႈပၼ်ၶဝ်ဝႆႉ လူင်ႈၼႃႈ ဝႃႈၼႆ။

ၵူၼ်းပိုၼ်ႉတီႈ ၼႂ်းဢိူင်ႇၸေႊလၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းလွႆသမ်ႉ ယူႇၾၢႆႇၸၢၼ်းၸေႊလၢၼ်ႉ တၢင်း ၶိုၼ်ႈလွႆ တေးမိူင်း။ သၢႆၼၼ်ႉ ပဵၼ်ထုင်ႉသိုၵ်းယူႇဝႆႉၼမ် ၶဝ်ၾင်မၢၵ်ႇႁႃႉ ဢမ်ႇၾင်ႁႃႉ ဢၼ်ဝႃႈၼၼ်ႉတႄႉ ႁဝ်းဢမ်ႇႁူႉ ၶဝ်ၵူဝ်ပိူၼ်ႈ ၵႂႃႇတၢင်းၼၼ်ႉသေ ႁၢမ်ႈၸိူင်ႉၼၼ်တိၵ်းတိၵ်းၵူၺ်း။ ၶဝ်ဝႃႈ ၵူဝ်ၽႃႇၺႃးမၢၵ်ႇၼႆဝႃႇ။ ၸဵမ်မိူဝ်ႈပၢင်တိုၵ်းသိုၵ်းမၢၼ်ႈ တင်း သိုၵ်းလွႆ မိူဝ်ႈႁၢင်လိူၼ်ၵျုႊလၢႆႊၼၼ်ႉမႃး ပေႃးၽႂ်ၵႂႃႇတၢင်းပုၼ်ႉ ပေႃးၶဝ်ႁၼ်ၸိုင် ၶဝ်တေလၢတ်ႈၵမ်ႈလဵဝ်။ ယၢမ်းလဵဝ် တၢင်းၸေႊလၢၼ်ႉၼႆႉ လွင်ႈၶဵင်ႈၶႅင်ၵၢၼ်သိုၵ်းၼႆႉ ၶႂ်ႈဝႃႈလူတ်းယွမ်းယဝ်ႉ ၶဝ်ၵႂႃႇၶဵင်ႈၶႅင်ၵၼ် တၢင်းဢိူင်ႇၼွင်သႅင် – ၼွင် လွင်း ပူၼ်ႉဢေႃႈ”- ဝႃႈၼႆ။

မိူဝ်ႈႁၢင်လိူၼ်ၵျုႊလၢႆႊပူၼ်ႉမႃးၼၼ်ႉ သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းဢိူင်ႇ ၸေႊလၢၼ်ႉၼႆႉသေ ဝၢႆးပၢင်တိုၵ်းယဝ်ႉ ၵူၼ်းဝၢၼ်ႈၼမ်ႉၵတ်း ၽူႈၸၢႆး ၸၢဝ်းတဢၢင်းၵေႃႉၼိုင်ႈ တေၵႂႃႇႁႃၼေႃႇမႆႉသေ ၽႃႇၺႃး မၢၵ်ႇမႅင်းၾင်လိၼ် တၢင်းၼွၵ်ႈဝၢၼ်ႈ လႆႈတိူဝ်ႉမၢတ်ႇၸဵပ်း။

“ၸႂ်ႈၶႃႈဢေႃႈ ပဵၼ်ၽူႈၸၢႆး ၸၢဝ်းလွႆ ၵေႃႉၼိုင်ႈ ၽႃႇၺႃးမၢၵ်ႇမႅင်း သိုၵ်းလွႆၶဝ် ႁၢင်ႈဝႆႉၼၼ်ႉ လႆႈတိူဝ်ႉမၢတ်ႇၸဵပ်း ဢေႃႈ။ ပဵၼ်ၵူၼ်းဝၢၼ်ႈၼမ်ႉၵတ်း ၵူၺ်းၵႃႈ ၽူႈၸၢႆးၵေႃႉၼၼ်ႉတႄႉ လႆႈဢဝ်ၵႂႃႇယူတ်းယႃဝႆႉတီႈလႂ်တႄႉ ပႆႇႁူႉ။ ၵွပ်ႈၼႆလႄႈ ၵူၼ်း မိူင်းၸေႊလၢၼ်ႉႁဝ်းၶႃႈတႄႉ မႆႈၸႂ်ဢေႃႈ ၵူဝ်ၽႃႇၺႃးမၢၵ်ႇတႅၵ်ႇ ၸိူဝ်းၼႆႉ။ ၵမ်ႈၼမ် ပေႃးၵႂႃႇမႄး ၼမ်ႉ ၼိူဝ်လွႆၸိုင် ႁဝ်းၶႃႈ လႆႈပွင်ႇၸူးသိုၵ်းလွႆသေ ႁႂ်ႈၶဝ်ဢွၼ်ၵႂႃႇဢေႃႈ။ သင်ပဵၼ်လႆႈ မၢၵ်ႇမႅင်းဢၼ်ၶဝ်ၾင်ဝႆႉ ၸိူဝ်းၼၼ်ႉ လူဝ်ႇၽဵဝ်ႈၶိုၼ်းမူတ်း မူတ်းဢေႃႈ ”- ၵူၼ်းပိုၼ်ႉတီႈ ၼႂ်းဢိူင်ႇၸေႊလၢၼ်ႉ သိုပ်ႇလၢတ်ႈၼႄၼင်ႇၼႆ။

တၢင်းပွတ်းတွၼ်ႈၼႂ်းဢိူင်ႇၸေႊလၢၼ်ႉၼႆႉ တေမီးသိုၵ်းမၢၼ်ႈ ယိုတ်းမိူင်း၊ သိုၵ်းတဢၢင်း TNLA လႄႈ သိုၵ်းတႆး SSPP ၸိူဝ်းၼႆႉ တူင်ႉၼိုင်ဝႆႉ။

ဢိူင်ႇၸေႊလၢၼ်ႉတင်း ဢိူင်ႇၼွင်သႅင်ၼႆႉ မီးၾၢႆႇတူၵ်းဝဵင်းမူႇၸေႊ ပေႃးဢဝ်ၸေႊလၢၼ်ႉ – မူႇၸေႊဝႃႈၸိုင် တေယၢၼ်ၵၼ် မွၵ်ႈ 6 လၵ်း။ ပေႃးဢဝ် ဢိူင်ႇၼွင်သႅင် – မူႇၸေႊသမ်ႉ တေယၢၼ်ၵၼ်မွၵ်ႈ 8 လၵ်း။ ပေႃးဢဝ် ၼမ်ႉၶမ်း – မူႇၸေႊ ဝႃႈၸိုင် တေယၢၼ်ၵၼ် 19 လၵ်း ၼႆယဝ်ႉ။