မိူဝ်ႈၼႆႉ ဝၼ်းတီႈ 16/8/2023 ယၢမ်းၵၢင်ဝၼ်း 11:19 မူင်း သိုၵ်းမၢၼ်ႈ ၶမယ 573 ဢၼ်ပၵ်းဝႆႉတီႈ ၼႂ်းၵၢင်ဝၢၼ်ႈမၢၵ်ႇလၢင်း တၢင်းၾၢႆႇဢွၵ်ႇဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼၼ်ႉ လၢၵ်ႈၵွင်ႈယိုဝ်းသႂ်ႇ ၽူႈၸၢႆးသွင်ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ် တၢႆ 1 ၵေႃႉ မၢတ်ႇ 1 ၵေႃႉ ။
ၽူႈတူင်ႉၼိုင် ၵၢၼ်သိုၵ်း ၼႂ်းထုင်ႉလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈ တပ်ႉၶမယ 573 ၼၼ်ႉ ယိုဝ်းၵူၼ်း ၶီႇရူတ်ႉ သွၼ်ႉၵၼ်မႃး 2 ၵေႃႉ တီႈၵၢင်ဝၢၼ်ႈမၢၵ်ႇလၢင်းၼၼ်ႉၵမ်းလဵဝ်။ ၵူၼ်း သွင်ၵေႃႉၼၼ်ႉ ဢမ်ႇၸႂ်ႈသိုၵ်း ၊ ၼုင်ႈၶူဝ်းၵူၼ်းမိူင်းမႃးၵူၺ်း။ ၵူၺ်းၵႃႈပဵၼ်ၽႂ် ယူႇတီႈလႂ် တႄႉဢမ်ႇႁူႉ တိုၵ်ႉၵူတ်ႇထတ်းတူၺ်းယူႇ။ ၵူၼ်းႁၼ်သိုဝ်ႈၼႃႈလၢတ်ႈဝႃႈ သိုၵ်းမၢၼ်ႈႁေႉရူတ်ႉၶိူင်ႈၶဝ် ၶဝ်ဢမ်ႇၵိုတ်းလႄႈ သိုၵ်းမၢၼ်ႈယိုဝ်းၶဝ်”- ဝႃႈၼႆ။
ယၢမ်းလဵဝ် တူဝ်ၵူၼ်းမိူင်း ဢၼ်ထုၵ်ႇသိုၵ်းမၢၼ်ႈ ယိုဝ်းတၢႆမၢတ်ႇၸဵပ်းၼၼ်ႉ ထုၵ်ႇသူင်ႇယူတ်းယႃတူဝ်ဝႆႉတီႈႁူင်း ယႃ လူင် ဝဵင်းလၢႆးၶႃႈဝႆႉယဝ်ႉ ဝႃႈၼႆ။
ၵူၼ်းမိူင်း 2 ၵေႃႉ ဢၼ်ထုၵ်ႇသိုၵ်းမၢၼ်ႈ တပ်ႉၶမယ 573 ယိုဝ်းသႂ်ႇၼၼ်ႉ ၶဝ်လုၵ်ႉၼႂ်းဝဵင်းလၢႆးၶႃႈသေ ဢွၵ်ႇမႃး တေၵႂႃႇ တၢင်းၵျွင်းဝူဝ်းလူင် ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 6/8/2023 ယၢမ်းၵၢင်ၼႂ် 6 မူင်းပၢႆ သိုၵ်းမၢၼ်ႈ ဢဵၼ်ႁႅင်းမွၵ်ႈ 70 ၵေႃႉ ႁႅၼ်းသိုၵ်းလေႃႇတိုၵ်း ပႃႇ တီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/ SSA) တီႈတပ်ႉပၢင်သဝ်း ၶၢႆးၽၵ်းၼၢမ် ၾၢႆႇဢွၵ်ႇဝၢၼ်ႈၼမ်ႉပွၵ်ႉ တၢင်း ၾၢႆႇ SSPP လူႉတၢႆ ၵေႃႉၼိုင်ႈ။ ထိုင်မႃး ယၢမ်းၵၢင်ၼႂ် 7 မူင်းၶိုင်ႈ SSPP ႁႅၼ်းသိုၵ်းလေႃႇတိုၵ်း သိုၵ်းမၢၼ်ႈ တီႈၾၢႆႇ ဢွၵ်ႇဝၢၼ်ႈမၢၵ်ႇလၢင်း ၾၢႆႇသိုၵ်းမၢၼ်ႈ လူႉတၢႆ 1 ၵေႃႉ မၢတ်ႇၸဵပ်း 6 ၵေႃႉ တီႉလႆႈတူဝ်လိပ်း 2 ၵေႃႉ ၵွင်ႈ 2 လဝ်းလႄႈ ၵႃး 1 လမ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ