မေႃသွၼ် လိုဝ်ႈၵၢၼ်( အငြိမ်းစားကျောင်းဆရာ )  ဝဵင်းတူၼ်ႈတီး မွၵ်ႈ 10 ၵေႃႉ  ၺႃး လွၵ်ႇလႅၼ်ၵူႈငိုၼ်း ၼပ်ႉႁူဝ်ပၢၵ်ႇ သႅၼ်ပျႃးသေ ဢမ်ႇသၢႆႈတႅၼ်းၶိုၼ်း။

မေႃသွၼ်ၵူၼ်းဝဵင်းတူၼ်ႈတီး ၵေႃႉဢၼ် ၺႃးလွၵ်ႇလႅၼ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မီးမေႃသွၼ်ၵဝ်ႇ ၵေႃႉၼိုင်ႈတေတင်ႈႁူင်းႁဵၼ်းၼႆသေ မႃးၵူႈငိုၼ်းၸိူဝ်းမေႃသွၼ် ၵူၼ်းႁူႉၸၵ်း လၢႆလၢႆၵေႃႉ။ ၼိုင်ႈၵေႃႉၼပ်ႉႁူဝ်ပၢၵ်ႇ သႅၼ်ပျႃး။ ၵူႈဢဝ်ၵႂႃႇသၢင်ႈႁူင်းႁဵၼ်းသုၼ်ႇလဵဝ် ဢၼ်မီးၸိုဝ်ႈဝႃႈႁူင်းႁဵၼ်း ငူၺ်ႇဢဵင်ႇၼၢၼ်း ။ ၵူႈၵႂႃႇၸဵမ်မိူဝ်ႈပီ 2016 ပုၼ်ႉတေႃႇထိုင်ယၢမ်းလဵဝ် ဢမ်ႇတႅၼ်းၶိုၼ်း၊ ပႃးၸဵမ်ၵႃႈတီႈလိၼ်လႄႈ ၵႃႈၵေႃႇသၢင်ႈႁူင်းႁဵၼ်း ၸိူဝ်းၼႆႉဢမ်ႇၸၢႆႇပၼ် ပိူၼ်ႈ  ယၢမ်းလဵဝ် ဢမ်ႇၸၢင်ႈတႅၼ်းငိုၼ်းသေလႆႈ  ပၢႆႈမႅပ်းဝႆႉ။   ” – ဝႃႈၼႆ။

ႁူင်းႁဵၼ်းသုၼ်ႇလဵဝ်ဢၼ်လၢတ်ႈမႃးၼႆႉ တင်ႈယူႇဝႆႉၼႂ်းပွၵ်ႉၵၢၼ်ႇၵျီး ၸႄႈဝဵင်းတူၼ်ႈတီး ။ တႄႇၵေႃႇတင်ႈ မႃး မိူဝ်ႈပီႈ 2016 -17 ။ ထိုင်ပီ 2018 –  19 မႃး တႄႇပိုတ်ႇႁပ်ႉလုၵ်ႈႁဵၼ်းသွၼ်လိၵ်ႈပၼ်။ ၵူၺ်းၵႃႈ ပဵၼ်ၶၢဝ်းယၢမ်းတၢင်း ပဵၼ် ၶူဝ်ႊဝိတ်ႉ ၽႄႈလၢမ်းၶဝ်ႈမႃးလႄႈ ႁူင်းႁဵၼ်းထုၵ်ႇသင်ႇပိၵ်ႉ။ တေႃႇထိုင်ယၢမ်းလဵဝ် ဢမ်ႇလႆႈႁၼ်ပိုတ်ႇၶိုၼ်းလီလီ ၵူၼ်းၼႂ်းပိုၼ်ႉတီႈၵေႃႉၼိုင်ႈၵေႃႈလၢတ်ႈၽူႈတွႆႇႁွၵ်ႈၼင်ႇၼႆ။

 “ၶဝ်ၵေႃႈယုမ်ႇယမ်ၵၼ်လႄႈ ၸင်ႇပၼ်ၵၼ်ၵူႈငိုၼ်း ။ ၵူၺ်းၼႃႇ ႁူင်းႁဵၼ်းဢၼ်ၼၼ်ႉၵေႃႈ ၸဵမ်မိူဝ်ႈ ၶူဝ်ႊဝိတ်ႉ ၽႄႈလၢမ်းသေၵေႃႈ လႆႈပိၵ်ႉဢိုတ်းဝႆႉ။ ႁဵတ်းၼၼ်သေ လႅပ်ႈဢမ်ႇမီးငိုၼ်းတႅၼ်း ၶိုတ်းတၼ်းၶၢဝ်းယၢမ်း ” – ဝႃႈၼႆ။

ၵူၼ်းဢၼ်ၺႃး ၵူႈငိုၼ်းသေ ဢမ်ႇလႆႈၵႃႈသၢႆတႅၼ်းၶိုၼ်းၼႆႉ လိူဝ်သေ မေႃသွၼ်လိုဝ်ႈၵၢၼ်ယဝ်ႉ  ၵူၼ်းၼႂ်းပိုၼ်ႉတီႈ ၵမ်ႈၽွင်ႈၵေႃႈ ၺႃးလႅၼ်၊ ၵူၺ်းၵႃႈဢမ်ႇၸၢင်ႈပိုင်ႈဢိင်ၸႂ်ယႂ်ႇၽႂ်လႄႈဢမ်ႇၸၢင်ႈၵႂႃႇလၢတ်ႈတီႈၽႂ် ဝႃႈၼႆ။

မေႃသွၼ်တူၼ်ႈတီးဢၼ်ၺႃးလွၵ်ႇလႅၼ်ၵေႃႉၼိုင်ႈ လၢတ်ႈဝႃႈ – “ငိုၼ်းဢၼ်ၺႃးလႅၼ်ၼႆႉ တင်းမူတ်း  လႅပ်ႈတေမီးမွၵ်ႈ   7 ႁဵင်သႅၼ်ၼႆႉ ။  ၽွင်းဝၢၼ်ႈမိူင်းသုၵ်ႉ ငိုၼ်းတွင်းႁႃယၢပ်ႇ သမ်ႉၺႃးလႅၼ်ၵိၼ်ၸိူင်ႉၼႆပဵၼ်ဢၼ်ၵိၼ်းၸႂ်တႄႉတႄႉ ။ မၼ်းၼၢင်းၼႆႉ ပဵၼ်မေႃသွၼ်ဢၼ်လူင်းႁူင်းႁဵၼ်း ၸၼ်ႉၸွမ်ၸႄႈၵႅင်း၊၊ ယၢမ်းလဵဝ်ပၢႆႈလွတ်ႈဝႆႉ  ”- ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၽူႈတွႆႇႁွၵ်ႈသေ ၶတ်းၸႂ်ႁႃလၢႆးတၢင်းတႃႇတိတ်းတေႃႇမေႃသွၼ် ၸဝ်ႈၶွင်ႁူင်းႁဵၼ်းၼၼ်ႉယူႇၵေႃႈ ဢမ်ႇလႆႈလႄႈ ဢမ်ႇၸၢင်ႈလႆႈတွင်ႈထၢမ်  လွင်ႈတၢင်းႁူဝ်ယွႆႈတႅတ်ႈတေႃး။

ဝၢႆးသိုၵ်းမၢၼ်ႈယိုတ်းမိူင်းမႃး ၵၢၼ်ႁႃၵိၼ်လဵင်ႉတွင်ႉ ယၢပ်ႇၽိုတ်ႇ ၊ ပၢႆးမၢၵ်ႈမီးတူၵ်းလႄႈ လွင်ႈလွၵ်ႇၵိၼ်ၵဝ်းၵိၼ်ငိုၼ်းၵၼ်ၵေႃႈ လၢႆးမၼ်းမီးၸေး  ။ ပေႃးၺႃးလႅၼ်ၵေႃႈ ဢမ်ႇၸၢင်ႈၵႂႃႇတိူင်ႇၵႂႃႇလၢတ်ႈတီႈလႂ် ။