ရူတ်ႉၶိူင်ႈသွင်လမ်း ၽႃႇၵၼ်တီႈတႃႈၶီႈလဵၵ်း မီးၵူၼ်းမၢတ်ႇၸဵပ်း 1 တၢႆ 1 ။
မိူဝ်ႈဝၼ်းတီႈ 12/8/2023 ရူတ်ႉၶိူင်ႈ 2 လမ်းၽႃႇၵၼ်တီႈ ႁိမ်းဝၢၼ်ႈယၢၼ်ႇသျိၼ်း မၢႆ 4 ဢိူင်ႇမိူင်းၵူဝ်း တၢႆၵေႃႉၼိုင်ႈ မၢတ်ႇၸဵပ်း ႁၢဝ်ႈႁႅင်းၵေႃႉၼိုင်ႈ။
ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းဢူးလႃႉမူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ ၶဝ်ႈတေႁေႃႈၽႂ်းၼႃႇၵေႃႈ ပိူင်ၼိုင်ႈ၊ ယဝ်ႉၵေႃႈ ၶိင်ႇၼၼ်ႉ ၶမ်ႈယဝ်ႉလႄႈ တေဢမ်ႇႁၼ်ၵၼ်ၵေႃႈ ပိူင်ၼိုင်ႈ ၸင်ႇ ၽႃႇၵၼ် ။ ၵေႃႉၼိုင်ႈ တေၶဝ်ႈဝဵင်း ၵေႃႉၼိုင်ႈ တေဢွၵ်ႇဝဵင်းႁဵတ်းၼႆဢေႃႈၼၼ်ႉ ။ဢၼ်ၶဝ်ပဵၼ်တႄႉ ၵၢင်ၶမ်ႈ ဝၼ်းထီႉ 11 ။ ၵူၺ်းၼႃႇ ၵေႃႉၼိုင်ႈတႄႉ ၵွၵ်းႁူဝ်တႅၵ်ႇ လိူတ်ႈဢွၵ်ႇၼမ်ႁေ တၢႆတီႈႁူင်းယႃ ဝၼ်းထီႉ 12 ဢေႃႈ ။ ထႅင်ႈၵေႃႉၼိုင်ႈတႄႉ မၢတ်ႇၸဵပ်းၸွမ်းၼႃႈ ၸွမ်းတႃၼႆႉဢေႃႈ ” – ဝႃႈၼႆ။
ၵေႃႉဢၼ် တၢႆၵႂႃႇၼႆႉ ၸိုဝ်ႈ ဢူးလေႃးၽႃး ဢႃယု 45 ပီ ယူႇဝၢၼ်ႈယၢၼ်ႇသျိၼ်း မၢႆ 3 ဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း ၾၢႆႇၸွႆႈတူင်ႇဝူင်းၵူၼ်း ၸွႆႈထႅမ် ပူၼ်ႉၶၢပ်ႈတူဝ်ယဝ်ႉလီငၢမ်း။
ၽူႈၶဝ်ႈၸုမ်းၸွႆႈတူင်ႇၵူၼ်းဢူးလႃႉမူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ ပိူင်လူင်မၼ်းတႄႉ ၶဝ် ဢမ်ႇတိုဝ်းမၢၵ်ႇႁူဝ်ရူတ်ႉၶိူင်ႈလႄႈ ၸင်ႇဝႃႈတၢႆငၢႆႈ ။ ထိုင်တီႈ ဢမ်ႇတၢႆၵေႃႈ မၼ်းဢမ်ႇမိူၼ်ပၵ်းၵဝ်ႇပိူင်ၵဝ်ႇလႆႈယဝ်ႉ ။ ပေႃးပဵၼ်လႆႈတႄႉ ဢမ်ႇဝႃႈၶၢဝ်းတၢင်းၸမ်ၵႆ ၵူႈၵေႃႉ လီတိုဝ်းမၢၵ်ႇႁူဝ်ရူတ်ႉၶိူင်ႈ တႃႇသေႇ ” – ဝႃႈၼႆ။
မိူဝ်ႈလိူၼ်ပူၼ်ႉမႃးၼႆႉၵေႃႈ ၵႃးၽႃႇၺႃး ၵူၼ်းၵိၼ်ၼွၼ်းၶၢင်ႈတၢင်း 3 ၵေႃႉ တီႈတၢင်းၶဝ်ႈဝဵင်း တႃႈၶီႈလဵၵ်း ႁိမ်းၵွင်းပိဝ်ႇႁႃႇ မၢတ်ႇၸဵပ်းႁႅင်း 1 တၢႆ 2 ၵေႃႉ ၵူၼ်းႁေႃႈၵႃး ပၢႆႈလွတ်ႈဝႆႉ ၼႆယဝ်ႉ။
