ဝၢႆးပၢင်တိုၵ်း သိုၵ်းမၢၼ်ႈတင်း SSPP/ SSA ယဵၼ်လူင်း မွၵ်ႈ 5 ဝၼ်းၼႆႉ သိုၵ်းမၢၼ်ႈ ထႅမ်ႁႅင်းသိုၵ်း မုင်ႈၸူး တၢင်းဝဵင်း လၢႆးၶႃႈၼမ်မႃးထႅင်ႈ ႁဵတ်းႁႂ်ႈၵူၼ်းပိုၼ်ႉတီႈ မႆႈၸႂ်ၵူဝ်ပဵၼ်ပၢင်တိုၵ်းႁၢဝ်ႈႁႅင်း။

တႄႇဢဝ် ဝၼ်းတီႈ 6/8/2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ ယိုတ်းမိူင်း ထႅမ်ႁႅင်းသိုၵ်း မုင်ႈၸူး ဝဵင်း လၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း မႃးထႅင်ႈၼမ် တေလုၵ်ႉတၢင်းၼမ်ႉၸၢင် – လွႆလႅမ် – ပၢင်လူင် ၸိူဝ်းၼႆႉမႃး။

ၽူႈတူင်ႉၼိုင်ၵၢၼ်သိုၵ်း ၼႂ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ -“ဝၼ်းတီႈ 10 တင်း 11 ၶၢဝ်းတၢင်း 2 ဝၼ်း မႃးၼႆႉ သိုၵ်းမၢၼ်ႈ လုၵ်ႉၼမ်ႉၸၢင် ထႅမ်မႃးတီႈတၢင်းႁၢႆးသႅင် ၵႃးသိုၵ်းမွၵ်ႈ 6 လမ်း ႁူဝ်ၵူၼ်းတႄႉ ပႆႇႁူႉ။ ဢၼ် လုၵ်ႉတၢင်း လွႆလႅမ် – ပၢင်လူင် ၸိူဝ်းၼႆႉၵေႃႈ မႃးထႅမ်ၵေႃႈမီးထႅင်ႈ လႆႈငိၼ်းသၢႆၶၢဝ်ႇၼႂ်းပိုၼ်ႉတီႈပွင်ႇၸူးတႄႉ သိုၵ်းမၢၼ်ႈမႃးမူၵ်းဝႆႉ ၸွမ်းဝဵင်း ယဝ်ႉၵေႃႈ ႁၢင်ႈႁႅၼ်း မႃႉတၢင်ႇၶူဝ်း၊ ၶိူင်ႈၶူဝ်းသိုၵ်းၶဝ်ဝႆႉ ၼၼ်ႉၵေႃႈ ႁူဝ်ၵူၼ်းၶဝ်မီးၵႃႈႁိုဝ် ပႆႇႁူႉ”- ဝႃႈၼႆ။

လိူဝ်ၼၼ်ႉ သိုၵ်းမၢၼ်ႈ ယိုတ်းမိူင်း ဢၼ်လုၵ်ႉတၢင်း ဝဵင်းတၢင်ႉယၢၼ်း – မိူင်းသူႈ ၸိူဝ်းၼၼ်ႉမႃးထႅမ်ဝႆႉ တၢင်းဝဵင်းၶူဝ်လမ် ၸိူဝ်းၼၼ်ႉၵေႃႈ မီးဝႆႉထႅင်ႈ တႃႇႁၢင်ႈႁႅၼ်းမုင်ႈၸူးတၢင်းဝဵင်းလၢႆးၶႃႈ ဝႃႈၼႆ။

“ယၢမ်းလဵဝ် သၢႆသိုၵ်းမၢၼ်ႈ လုၵ်ႉတၢင်း တၢင်ႉယၢၼ်း- မိူင်းသူႈ မႃးထႅမ်ႁႅင်းပႂ်ႉဝႆႉ တီႈၶူဝ်လမ်ၵေႃႈ မီးဝႆႉထႅင်ႈ ၵူၺ်းၵႃႈ ဢဵၼ် ႁႅင်းၶဝ်မီးမွၵ်ႈႁိုဝ်တႄႉ ပႆႇႁူႉ။ ၸွမ်းၼင်ႇ သၢႆၶၢဝ်ႇႁဝ်း ပွင်ႇၸူးမႃးတႄႉ ၼိုင်ႈတီႈ တေမီး 40-50 ၵေႃႉ။ မၢင်တီႈ ဢမ်ႇယွမ်း 100 ။ လႆႈငိၼ်းဝႆႉထႅင်ႈတႄႉ သၢႆသိုၵ်းမၢၼ်ႈ ၵဵင်းတုင် – မိူင်းသၢတ်ႇ ၸၵၶ 14 ၸိူဝ်းၼၼ်ႉၵေႃႈ ၶဝ်ၶွၼ်ႈ ႁႅင်းၵၼ်ဝႆႉ တႃႇ တေမႃးထႅမ် တၢင်းၼႆႉထႅင်ႈ လွင်ႈၼၼ်ႉတႄႉ ႁဝ်းပႆႇယိုၼ်ယၼ်တႅတ်ႈတေႃး”- ၽူႈတူင်ႉၼိုင် ၵၢၼ်သိုၵ်း ၼႂ်းပိုၼ်ႉတီႈ သိုပ်ႇ လၢတ်ႈၼႄၼင်ႇၼႆ။

ဝၢႆးပဵၼ်ပၢင်တိုၵ်းယဝ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းမႃးပၼ်ႇလဵပ်ႈဝဵင်းလၢႆးၶႃႈထႅင်ႈ ပဵၼ်လၢႆပွၵ်ႈ မိူဝ်ႈဝၼ်းတီႈ 9/8/2023 ယၢမ်းၵၢင်ၼႂ် 10:26 မူင်းၼၼ်ႉ ပွၵ်ႈၼိုင်ႈ။ ယၢမ်းၵၢင်ဝၼ်း 11:55 မူင်းၼၼ်ႉ ပွၵ်ႈၼိုင်ႈ ၶိူင်ႈမိၼ်တိုၵ်း ဢၼ်မႃးပၼ်ႇၼႆႉ တေလုၵ်ႉတၢင်းၼမ်ႉၸၢင်မႃး။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 10 ယၢမ်းၵၢင်ဝၼ်းၼႆႉ ၶိူင်ႈမိၼ်မႅင်းမီႈၶဝ် မႃးပၼ်ႇ တၢင်းလၢႆးၶႃႈၼႆႉ ၵမ်ႉၼိုင်ႈ။ ၶဝ်မႃးသူင်ႇၵူၼ်းႁႃႉ ၶဝ်ႈၼမ်ႉတၢင်းၵိၼ်ၵူၼ်းသိုၵ်းၶဝ်ႁႃႉ ဢမ်ႇႁူႉ။ ႁဝ်းၶႃႈ ၵူၼ်းမိူင်းတႄႉ မႆႈၸႂ်ဝႆႉဢေႃႈ ၵူဝ်ၶဝ်ပဵၼ်ပၢင်တိုၵ်းၵၼ်။ ၼႂ်းဝဵင်းၼႆႉ ပေႃးၵၢင်ၶမ်ႈ – ၵၢင်ၶိုၼ်းမႃးၼႆ ယဵၼ်သီႇဝႆႉ ၵူဝ်ၶႃႈ ဢေႃႈ။ တႄႇဢဝ် ယၢမ်းၵၢင်ၶမ်ႈ 6 မူင်းထိုင် 6 မူင်းၵၢင်ၼႂ် ယွၼ်ႉမီးဝႆႉ ပိူင်ၶဝ်ဢွၵ်ႇဝႆႉ ႁၢမ်ႈဢွၵ်ႇႁိူၼ်းယေး ၼၼ်ႉၵေႃႈ တေပႃး”- ဝႃႈၼႆ။

ပၵ်းပိူင် ႁၢမ်ႈၵူၼ်းပိုၼ်ႉတီႈ ဝဵင်းလၢႆးၶႃႈ ဢွၵ်ႇႁိူၼ်းယေး ယၢမ်းၵၢင်ၶမ်ႈ – ၵၢင်ၶိုၼ်းၼႆႉ သိုၵ်းမၢၼ်ႈ တႄႇဢွၵ်ႇမႃး မိူဝ်ႈ ဝၼ်းတီႈ 7/8/2023 ဝၢႆးပဵၼ်ပၢင်တိုၵ်းၵၼ်တင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA တီႈၶၢႆး ၽၵ်းၼၢမ် ၾၢႆႇဢွၵ်ႇဝၢၼ်ႈၼမ်ႉပွၵ်ႉလႄႈ တီႈဝၢၼ်ႈမၢၵ်ႇလၢင်း ၸိူဝ်းၼႆႉ။ ယၢမ်းလဵဝ် သဵင်ၵွင်ႈယဵၼ်လူင်းဝႆႉသေတႃႉ တင်းသွင် ၾၢႆႇတႄႉ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ။

လိူဝ်သေ သိုၵ်းမၢၼ်ႈ ဢဝ်ၶိူင်ႈမိၼ်မႅင်းမီႈမႃးပၼ်ႇ တၢင်းပွတ်းလၢႆးၶႃႈယဝ်ႉ မိူၼ်ၼင်ႇ တၢင်းၸႄႈဝဵင်းၼမ်ႉတူႈ – ၼမ်ႉၶမ်း ၸိူဝ်းၼႆႉၵေႃႈ မႃးပၼ်ႇလဵပ်ႈ မိူၼ်ၵၼ်။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 10 ၼႆႉ သိုၵ်းမၢၼ်ႈ ဢဝ်ၶိူင်ႈမိၼ်မႅင်းမီႈ မႃးပၼ်ႇ တၢင်းဝဵင်း တၢင်းသၶၢၼ်းတိပ်ႉ ၸိူဝ်းၼႆႉ ၶဝ်တေႃႉၶူဝ်းမႃးႁႃႉၵေႃႈ ဢမ်ႇႁူႉ ၶဝ်မိၼ်တႅမ်ႇတႅမ်ႇၵူၺ်းဢေႃႈ”- ဝႃႈ ၼႆ။

ယဝ်ႉၵေႃႈ တၢင်းဝဵင်းၼမ်ႉတူႈၼၼ်ႉၵေႃႈ မိူဝ်ႈဝႃး ဝၼ်းတီႈ 11/8/2023 ယၢမ်းဝၢႆးဝၼ်းမွၵ်ႈ 3 မူင်း သိုၵ်းမၢၼ်ႈ ဢဝ်ၶိူင်ႈမိၼ်မႅင်းမီႈ လမ်းၼိုင်ႈ မႃးပၼ်ႇတၢင်းၼႂ်းဝဵင်းသေ မိၼ်ဢွၵ်ႇၵႂႃႇတၢင်းၾၢႆႇတူၵ်းမၢၼ်ႈၸၢမ် ၵူၼ်းပိုၼ်ႉတီႈ ၼမ်ႉတူႈ လၢတ်ႈ။