ၵူၼ်းၸၢႆးၵူတ်ႉၶၢႆၵေႃႉၼိုင်ႈ ၺႃးၶႃႈတၢႆ 

ၵူၼ်းၶၢႆၼမ်ႉၶႅင်လွတ်ႇ (ယေႇၶႄးၶျွင်း) ယူႇၵူတ်ႉၶၢႆ ၵေႃႉၼိုင်ႈ ၺႃးၵူၼ်းဢမ်ႇႁူႉၾၢႆႇ ၶႃႈႁႅမ်တၢႆဝႆႉၶၢင်ႈတၢင်း။

မိူဝ်ႈၼႆႉ ဝၼ်းတီႈ 11/8/2023 ယၢမ်းၵၢင်ဝၼ်း 12 မူင်းၼႆႉ ထူပ်းႁၼ်တူဝ်တၢႆၵူၼ်းၸၢႆးၵေႃႉၼိုင်ႈ ၼိူဝ်သဵၼ်ႈ တၢင်းလူင် ၵူတ်ႉၶၢႆ – တႃႈမိူင်းငၢႆး ႁိမ်းဝၢၼ်ႈ မေႃႇႁၢၼ်ႇ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။

ၽူႈတူင်ႉၼိုင်ႈ ၼႂ်းၸုမ်းၸွႆႈတူင်ႇဝူင်းၵူၼ်းၵူတ်ႉၶၢႆ (ဗြဟ္မစိုရ်နှလုံးသား လူမှုကူညီရေးအသင်း) ၵေႃႉၼိုင်ႈ လၢတ်ႈ တီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉမိူဝ်ႈႁဝ်းၵႂႃႇ ဢဝ်တူဝ်တၢႆၼၼ်ႉ လႆႈႁၼ်ၸွမ်းၶေႃး မၼ်းၸိူဝ်းၼႆႉ မီးႁွႆးယိုဝ်းဝႆႉ ဢေႃႈ။တီႈႁူၺ်ႇတႃမၼ်းၵေႃႈ မီးႁွႆးဝႆႉ ။ တီႈဢူၵ်းၸိူဝ်းၼႆႉၵေႃႈ မီးႁွႆးမၢတ်ႇဝႆႉ ” – ဝႃႈၼႆ။

ၵေႃႉဢၼ်တၢႆၵႂႃႇၼႆႉ ၸိုဝ်ႈ ၵူဝ်ႇတဵင်းသူၺ်ႇ ဢႃယု 42 ပီ ပဵၼ်ၵူၼ်းလႄႇႁႃၶၢႆ ၼမ်ႉၶႅင်လွတ်ႇ(ယေႇၶႄးၶျွင်း) ၼႂ်းပွၵ်ႉၼႂ်းဢိူင်ႇ တီႈၸႄႈဝဵင်းၵူတ်ႉၶၢႆ။ ၼႂ်းၸႄႈဝဵင်းၵူတ်ႉၶၢႆ ၼႆႉ ၵူၼ်းၺႃးႁဵတ်းႁၢႆႉ မီးမႃးၶိူဝ်းယႂ်းလႄႈ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ  ဝႃႈၼႆ။

ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈၵူတ်ႉၶၢႆႁဝ်းၼႆႉ ၼိုင်ႈဝၼ်းလႂ် ၼိုင်ႈၵေႃႉ သွင်ၵေႃႉ တိုၼ်းၺႃးပိူၼ်ႈႁဵတ်းႁၢႆႉယူႇယဝ်ႉ ၵႂႃႇလႂ်ၵေႃႈ လႆႈၵူဝ်။ မိူၼ်ၼင်ႇ ၵေႃႉဢၼ်တၢႆၵႂႃႇၼႆႉၵေႃႈ  ပီႈၼွင်ႉမၼ်းပဵၼ်ၽႂ် မၼ်းယူႇလႂ် တေႉတေႉၼႆတႄႉ တိုၵ်ႉ ပိုၼ်ၽၢဝ်ႇႁႃဝႆႉယူႇ ” – ဝႃႈၼႆ။

ၶၢဝ်းတၢင်းသိုၵ်းမၢၼ်ႈ ယိုတ်းမိူင်းမႃးၼႆႉ ၵူၼ်း မိူင်းတႆး လၢႆးတီႈ ၵႆႉၺႃးၸုမ်းဢမ်ႇႁူႉၾၢႆႇ တီႉၺွပ်း ႁဵတ်းပဵၼ်တူဝ်ယိူဝ်ႇၵႂႃႇယွၼ်းငိုၼ်း၊ ပေႃႉထုပ်ႉႁဵတ်းႁၢႆႉ ၊   ၼႂ်းဝၢၼ်ႈၼႂ်းဝဵင်း ၵေႃႈ မီးလွင်ႈပိုတ်းယိုဝ်း ၶႃႈႁႅမ်ၵၼ်တၢႆ ၶိူဝ်းယႂ်း ။

မိူၼ်ၼင်ႇ မိူဝ်ႈဝၼ်းတီႈ 4/8/2023 ၼႆႉ   တီႈလႃႈသဵဝ်ႈ ၵူၼ်းႁိူၼ်းလဵဝ်ၵၼ် 2 ၵေႃႉ ၺႃးပေႃႉထုပ်ႉသေ တႅင်းတၢႆ  ဝႆႉၵေႃႉတီႈတီႈ ၵေႃႉၼိုင်ႈတၢႆၼႂ်းႁိူၼ်း ၵေႃႈၼိုင်ႈၵႂႃႇတၢႆၼွၵ်ႈဝၢၼ်ႈ။