ၸဝ်ႈႁိူၼ်း ႁူင်းယႃႈယႃ တႆး မိၵ်ႈမႃႉၶၢဝ် 2 တူဝ်(မျိၼ်းၽိဝ်ႇၼၵွင်ႇ) ပွၵ်ႉၵၢၼ်ႇတႃႇ ဝဵင်းလူင်တူၼ်ႈတီး ၺႃးၵူၼ်းႁၢႆႉၶဝ်ႈႁိူၼ်းၶႃႈႁႅမ်တၢႆ တင်း 4 ၵေႃႉ။ လုၵ်ႈဢွၼ်ႇလဵၵ်ႉၶဝ် ဢႃယု တိုၵ်ႉလႆႈ 7 လိူၼ်ၵူၺ်းၵေႃႈၺႃးၶႃႈတၢႆ။
ဝၼ်းတီႈ 28 ယၢမ်းၵၢင်ၼႂ် ၵူၼ်းႁိမ်းၶၢင်ႈႁိူၼ်းႁၼ်လိူတ်ႈၼွင်းဢွၵ်ႇႁိူၼ်းမႃးလႄႈ ၵႂႃႇတူၺ်း လႆႈႁၼ်ၸဝ်ႈႁိူၼ်းၺႃးၶႃႈတၢႆဝႆႉတင်း 4 ၵေႃႉ။ ၸဝ်ႈၼႃႈတီႈပလိၵ်ႈမႃးၵူတ်ႇထတ်းတူၺ်းတႄႉလၢတ်ႈဝႃႈ လႅပ်ႈတေၺႃးၶႃႈတၢႆၸဵမ်မိူဝ်ႈၶမ်ႈဝႃးဝႃႈၼႆ။
ၵူၼ်းယူႇႁိမ်းၵိၼ်ၸမ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ပလိၵ်ႈလၢတ်ႈဝႃႈ လႅပ်ႈတေမႃးၶႃႈတၢႆၸဵမ်မိူဝ်ႈၵၢင်ၶိုၼ်း။ ယွၼ်ႉဝႃႈလိူတ်ႈၶဝ်ပေႃးႁႅင်ႈယဝ်ႉ။ ၵူၼ်းႁိူၼ်း 4 ၵေႃႉၺႃးၶႃႈတၢႆမူတ်းၶႃႈ။ မႄႈထဝ်ႈလႄႈ မႄႈပႃႈၶဝ်တႄႉ ၵႂႃႇပွႆးတီႈပၢင်လူင်လႄႈ ဢဝ်လွတ်ႈၵႂႃႇ။ ဢမ်ႇပႃးၼႂ်းၺႃးၶႃႈတၢႆ။ ဢၼ်လီတိူဝ်ႉၸႂ်ၼႃႇၼႆႉလုၵ်ႈဢွၼ်ႇၶဝ်ဢႃႇယုတိုၵ်ႉလႆႈ 7 လိူၼ်ၵူၺ်းၵေႃႈ ၺႃးၶႃႈတၢႆၸွမ်းပႃးဢေႃႈ။ ”- ဝႃႈၼႆ။
ၽူႈၵွၼ်းပလိၵ်ႈ ၸေႈဝဵင်း ဝဵင်းလူင်တူၼ်ႈတီးလၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ယွၼ်ႉသင်လႄႈၶႃႈတၢႆ၊ ပဵၼ်ၼမ်ႉမိုဝ်းၽႂ်ၼႆ ယင်းပႆႇလၢတ်ႈလႆႈ။ တေၵူတ်ႇထတ်းတူၺ်းလွင်ႈပိူင်ပဵၼ်လူးၵွၼ်ႇ” – ဝႃႈၼႆ။
ၵူၼ်းႁိူၼ်းဢၼ်ၺႃးၶႃႈတၢႆ 4 ၵေႃႉၼၼ်ႉပဵၼ် – ၸၢႆးသိူဝ်မူၼ်း (ဢႃယု 27 ပီ)၊ ၼၢင်းၶမ်းလႅင် (ဢႃႇယု 23 ပီ) ၊ၸၢႆးၾႃႉၾႃႉ ဢႃယု 7 လိူၼ်လႄႈ ၵူၼ်းႁဵတ်းၵၢၼ်ႁိူၼ်း မႃႉဢေးမူဝ်း (ဢႃယု 17 ပီ) ။
ၺႃးမိတ်ႈတႅင်းၶႃႈတၢႆ ၼႂ်းႁိူၼ်း၊ ၼိူဝ်ႁိူၼ်းလႄႈ ၼႂ်းႁွင်ႈဝႆႉလူတ်ႉ ႁိမ်းလူတ်ႉၵႃး ၸိူဝ်းၼႆႉသေ လုၵ်ႈဢွၼ်ႇတႄႉ ၺႃးဢဝ်မွၼ်ႁူဝ်တဵင်သေၶႃႈတၢႆဝႆႉ – ပလိၵ်ႈတူၼ်ႈတီးတႄႉ ပိုၼ်ၽၢဝ်ႇဝႆႉၼင်ႇၼႆ။
ၵူၼ်းႁိမ်းႁိူၼ်းလၢတ်ႈထႅင်ႈဝႃႈ – “ မႃၶဝ်ၵေႃႈ ၵၢင်ၼႂ်ၼႆႉ သဵင်ဢမ်ႇဢွၵ်ႇယဝ်ႉၶႃႈ။ ၶမ်ႈဝႃးၵေႃႈဢမ်ႇငိၼ်းသဵင်သင်။ ၾႆးတႄႉ မွတ်ႇတေႃႇထိုင်တဵင်ႈၶိုၼ်းၸၢႆႉပုၼ်ႉဢေႃႈ။ တီႈတႄႉမၼ်း ႁိူၼ်းၶဝ်ၼၼ်ႉ မီးႁူဝ်ႉဝၢင်းပဵၼ်လၢႆၸၼ်ႉလူး။ ၶဝ်ႈယၢပ်ႇဢွၵ်ႇယၢပ်ႇ။ လွင်ႈႁူမ်ႇလူမ်ႈၼႆႉၵျႃႉလိူဝ်တၢင်ႇႁိူၼ်းၵွၼ်ႇၶႃႈဢေႃႈ။ လႆႈငိၼ်းပလိၵ်ႈဝႃႈ မီးႁွႆးၵူၼ်းႁၢႆႉ ၶဝ်ႈႁွင်ႈၼမ်ႉ( ၶိုၼ်ႈထၢင်) ၵႂႃႇလူးၵွၼ်ႇ ”- ဝႃႈၼႆ။
ၶၢဝ်းယၢမ်းၵၢင်ဝၼ်း 11 မူင်းတႄႉ လူတ်ႉၵႃးတၢင်ႇၵူၼ်းပဵၼ် မႃးဢဝ်တူဝ်တၢႆၸဝ်ႈႁိူၼ်ၵႂႃႇယဝ်ႉ ဝႃႈၼႆ။
တီႈဝဵင်းတူၼ်ႈတီးၼႆႉ မိူဝ်ႈပီၵၢႆ လိူၼ်ဢေႃးၵၢတ်ႉသ် ၵေႃႈမီးလွင်ႈၶႃႈႁႅမ်ၵၼ်တၢႆတင်းႁေႃတင်းႁိူၼ်း (ၵူၼ်း 4 ၵေႃႉ)တီႈၼႂ်းတပ်ႉတိူင်း ယပၶ။ မိူဝ်ႈႁူဝ်ပီၼႆႉ လိူၼ်ၾႅပ်ႇပိဝ်ႊရီၵေႃႈ သင်ၶၸဝ်ႈ 2 တူၼ်ဢၼ်မႃးလိုဝ်ႈသဝ်းတီႈတၢင်းၶိုၼ်ႈလွႆၵျွင်း သူၺ်ႇမေႃႇတေႃးၵေႃႈ ၺႃးၶႃႈႁႅမ်တၢႆ။ တေႃႇထိုင်ဝၼ်းမိူဝ်ႈၼႆႉဢမ်ႇလႆႈႁူႉပဵၼ်ၼမ်ႉမိုဝ်းၽႂ်၊ ၵူၼ်းႁၢႆႉပဵၼ်ၽႂ် ။
