ႁူဝ်လိူၼ်ဢေႃႊၵတ်ႉသ်ၼႆႉ ငိုၼ်းၶႄႇ 100 ယႂၼ်ႊ လႆႈသိုဝ်ႉပဵၼ် 5 မိုၼ်ႇပျႃးငိုၼ်းမၢၼ်ႈ။
ဝၢႆးသေ သိုၵ်းမၢၼ်ႈ ႁဵတ်းဢွၵ်ႇ ၶႅပ်းငိုၼ်းဝႂ်မႂ်ႇ 2 မိုၼ်ႇပျႃးၼႆႉမႃး ႁဵတ်းႁႂ်ႈ ငိုၼ်းလိူဝ်ၽိူဝ်ႈမႃးလိူဝ်ၵဝ်ႇ ငိုၼ်းၶႄႇ ငိုၼ်းထႆး ပုင်ႈၶိုၼ်ႈသုင်သေ ၶၼ်ငိုၼ်းမၢၼ်ႈ တူၵ်းမႃး ၵူႈမိုဝ်ႉၵူႈဝၼ်း ။
ၼၢင်းယိင်းၸဝ်ႈႁၢၼ်ႉၶၢႆၵုၼ်ႇၼႂ်းဝဵင်းမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ် တီႈႁဝ်းၼႆႉ ငိုၼ်းၶႄႇ 100 လႂ် ငိုၼ်းမၢၼ်ႈ 47000 ပၢႆ ၶိုၼ်ႈသုင်ၵႂႃႇ ၸမ် 5 မိုၼ်ႇ။တၢင်ႇဝၼ်းမႃး တေၶိုၼ်ႈထႅင်ႈႁိုဝ် ဢမ်ႇႁူႉ” – ဝႃႈၼႆ။
ယွၼ်ႉၶၼ်ငိုၼ်းၶႄႇ ၵိုင်ႉၵၢင်ႉပုင်ႈၶိုၼ်ႈသုင်မႃးလႄႈ ၶၼ်ၵုၼ်ႇဢၼ်ဢွၵ်ႇမႃးတၢင်းမိူင်းၶႄႇၵေႃႈ ၶိုၼ်ႈသုင်ၸွမ်း ထႅင်ႈၾၢႆႇၼိုင်ႈၵေႃႈ ႁဵတ်းႁႂ်ႈငိုၼ်းမၢၼ်ႈလိူဝ်ၽိူဝ်ႈမႃးထႅင်ႈ။ မိူဝ်ႈလဵဝ် ၵူၼ်းမိူင်းမႆႈၸႂ် ၵူဝ်ၵႃႈၶၼ်ၶူဝ်းၵုၼ်ႇၸႂ်ႉသွႆႈ ၼႂ်းၼႃႈႁိူၼ်း ၶိုၼ်ႈသုင်မႃးၶိူဝ်းယႂ်းၵူၺ်းယဝ်ႉ ဝႃႈၼႆ။
ဢိင်ၼိူဝ်လွင်ႈၼႆႉ မႄႈၸဝ်ႈႁိူၼ်းၼုမ်ႇၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ်ၼႆႉ ၼမ်ႉမၼ်းၵိၼ် ၼိုင်ႈလိတ်ႉ ပဵၼ် 2 မိုၼ်ႇပၢႆယဝ်ႉ။ ၶဝ်ႈၵေႃႈ ၼိုင်ႈထူင်(100 ၵီႊလူဝ်ႊ)လႂ် 9 မိုၼ်ႇယဝ်ႉ တႃႇတေသိုဝ်ႉၵိၼ် ၼႃႈႁိူၼ်းၵူၺ်းၵေႃႈ ယၢပ်ႇၸႂ်ၵိၼ်းၸႂ်တေႉယဝ်ႉ ” – ဝႃႈၼႆ။
ဝၢႆးသေ သိုၵ်းမၢၼ်ႈ ႁဵတ်းဢွၵ်ႇ ငိုၼ်းၶႅပ်းဝႂ် 20000 ပျႃး ယဝ်ႉ ၶၼ်ၵုၼ်ႇ ၊ ၶၼ်ၶမ်း ၊ ၶၼ်ၵူႈၸိူဝ်ႉၵူႈလွင်ႈ ၶိုၼ်ႈသုင်မႃးလႄႈ ၵူၼ်းမိူင်းဢမ်ႇထုၵ်ႇၸႂ်ၼိူဝ် ၶႅပ်းဝႂ် ငိုၼ်းမႂ်ႇ။
ဢိင်ၼိူဝ်လွင်ႈၼႆႉ မႄႈၸဝ်ႈႁိူၼ်းၼုမ်ႇၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၶဝ် ႁဵတ်းဢွၵ်ႇဝႂ်ငိုၼ်းမႂ်ႇၼၼ်ႉ ပႆႇႁၼ်ၽႂ် ယိပ်းၼမ်။ႁဝ်းတႄႉ ၵူဝ်မႃးထိုင် ၼႂ်းမိုဝ်းႁဝ်းၵူၺ်းယဝ်ႉ။ပေႃးဝႂ်ငိုၼ်းမႂ်ႇ ဢွၵ်ႇမႃးထႅင်ႈ ၶႅၼ်းတေႁဵတ်းႁႂ်ႈ ၶၼ်ၵုၼ်ႇၵူႈလွင်ႈ ၶိုၼ်ႈသုင်ယဝ်ႉ။ၵူၼ်းမိူင်း ၶႅၼ်းတေလႆႈ တုၵ်ႉၶယဝ်ႉ” – ဝႃႈၼႆ။
မိူၼ်ၼင်ႇ ၼႂ်းၸႄႈဝဵင်းတႃႈၶီႈလဵၵ်း လႅၼ်လိၼ် တႆး – ထႆး ၼၼ်ႉၵေႃႈ ဝၢႆးငိုၼ်းဢွၵ်ႇမႂ်ႇယဝ်ႉ ငိုၼ်းထႆး 1 ဝၢတ်ႇၵူၺ်း ပဵၼ်ၵႂႃႇငိုၼ်းမၢၼ်ႈ 100 ပျႃး၊ ပေႃး ငိုၼ်းထႆး 100 ဝၢတ်ႇၵေႃႈ တေပဵၼ်ၵႂႃႇ 1 မိုၼ်ႇ ငိုၼ်းမၢၼ်ႈလႄႈ ၵူၼ်းၵႃႉၸွမ်းလႅၼ်လိၼ်ထႆးၵမ်ႈၽွင်ႈ မႆႈၸႂ်လၢႆလွင်ႈသေ ပိၵ်ႉဢိုတ်းၵၢၼ်ၽႂ်မၼ်းဝႆႉ လႆႈႁူႉၼင်ႇၼႆ။
