မိူဝ်ႈၼႆႉ ဝၼ်းတီႈ 27/7/2023 ၼႆႉ NUG  ဢွၵ်ႇလိၵ်ႈပိုၼ်ၽၢဝ်ႇ သၢၼ်ၶတ်းတေႃႇ သိုၵ်းမၢၼ်ႈယိုတ်းမိူင်း ဢၼ်ႁဵတ်းဢွၵ်ႇၶႅပ်းငိုၼ်းၸေႈ ဝႂ် 2 မိုၼ်ႇပျႃး ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉဝႃႈ – “ ငိုၼ်းဢၼ် သိုၵ်းမၢၼ်ႈယိုတ်းမိူင်း ႁဵတ်းဢွၵ်ႇမႂ်ႇ ဝႂ်ငိုၼ်း 2 မိုၼ်ႇပျႃးၼႆႉ ယူႇတီႈၸုမ်းလူင်ပွင်ၸိုင်ႈ NUG ဢမ်ႇႁၼ်လီၸွမ်း ” –  ဝႃႈၼႆဝႆႉ။

မိူဝ်ႈဝၼ်းတီႈ 23/7/2023 ၼၼ်ႉ သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဝႆႉ ပေႃးထိုင်မႃး ဝၼ်းတီႈ 31/7/2023 ၼႆႉ ယေးငိုၼ်းမိူင်းႁူမ်ႈတုမ် ဢၼ်သိုၵ်းမၢၼ်ႈယိုတ်းမိူင်း ၵုမ်းၵမ်ၼၼ်ႉ တေပိုၼ်ၽႄႈ ၶႅပ်းငိုၼ်းၸေႈ ဝႂ် 2 မိုၼ်ႇ ( 20000 ) ပျႃး။

ၼႂ်းလိၵ်ႈပိုၼ်ၽၢဝ်ႇလိၵ်ႈသၢၼ်ၶတ်းၼၼ်ႉ ပႃးဝႆႉထႅင်ႈဝႃႈ “ ၸၵၸ  ႁဵတ်းဢွၵ်ႇ ဝႂ်ငိုၼ်းမႂ်ႇၼႆႉ မၼ်းပဵၼ်လွၵ်း တႃႇသိုၵ်းမၢၼ်ႈၶဝ် ယူႇလွတ်ႈၵႂႃႇလႆႈ ၶၢဝ်းယၢဝ်း။ၼင်ႇႁိုဝ်ၶဝ် တေပေႉပုၼ်ႈၵူၼ်းမိူင်းၼၼ်ႉ ၶဝ်ၸင်ႇႁဵတ်းဢွၵ်ႇ ဝႂ်ငိုၼ်းမႂ်ႇ။ လိူဝ်ၼၼ်ႉ ႁဵတ်းႁႂ်ႈ ငိုၼ်းလိူဝ်ၽိူဝ်ႈ မႃး ထႅင်ႈ ။ တေႁဵတ်းႁႂ်ႈ တုမ်ႉတိူဝ်ႉ ၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်းထႅင်ႈ ” –  ဝႃႈၼႆ။

ငိုၼ်းဝႂ် 2 မိုၼ်ႇပျႃးၼႆႉ တၢင်းယၢဝ်းမီး 15 သိၼ်ႊတီႊမီႊတိူဝ်ႊ တၢင်းၵႂၢင်ႈမီး 7 သိၼ်ႊတီႊမီႊတိူဝ်ႊ ပဵၼ်ဝႂ်သီၶဵဝ်ၼုမ်ႇဝႆႉ။ၾၢႆႇၼႃႈ မီးႁၢင်ႈၸၢင်ႉၽိူၵ်ႇသေ ၾၢႆႇလင် မီးႁၢင်ႈ ၶူဝ်ၶၢမ်ႈၸႄႈၵႅင်းလႄႈ ၶူဝ်ၶၢမ်ႈဢေႇရႃႇဝတီႇ။

ၼႂ်းၶေႃႈပိုၼ်ၽၢဝ်ႇသိုၵ်းမၢၼ်ႈၼၼ်ႉ ပႃးဝႆႉဝႃႈ ၵၢၼ်ႁဵတ်းဢွၵ်ႇငိုၼ်းပွၵ်ႈၼႆႉ တႃႇပဵၼ်တီႈမၢႆတွင်း ဢၼ်မိၼ်းဢွင်ႇလႅင်ႇ ဢဵၼ်းဢၢၼ်းတႃႇ ဝၢၼ်ႈမိူင်းၵတ်းယဵၼ်သေ သၢင်ႈဝႆႉ ႁုၼ်ႇႁၢင်ႈၽြႃးမႃႇရႃႉဝိၸယ လႄႈ ႁုၼ်ႇႁၢင်ႈၸၢင်ႉၽိူၵ်ႇ ရထၼၼ်ႇတၵ ၶွပ်ႈၶူပ်ႇ ၼိုင်ႈပီၼၼ်ႉ ဝႃႈၼႆဝႆႉ။