သိုၵ်းမၢၼ်ႈ ယိုတ်းမိူင်း ပိၵ်ႉဢိုတ်း သဵၼ်ႈတၢင်း လၢႆးၶႃႈ – မိူင်းၼွင်မႃး မီးၶၢဝ်းတၢင်း 5 ဝၼ်းယဝ်ႉ ပႆႇပိုတ်ႇပၼ်ၶိုၼ်း ႁဵတ်းႁႂ်ႈတုမ်ႉတိူဝ်ႉ ၵူၼ်းမိူင်းၵႂႃႇမႃးႁႃၵိၼ်လဵင်ႉတွင်ႉ ယၢပ်ႇၽိုတ်ႇႁႅင်း။
တႄႇဢဝ် ဝၼ်းတီႈ 6/8/2023 ၼၼ်ႉမႃး သိုၵ်းမၢၼ်ႈတင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/ SSA) ပဵၼ်ပၢင်တိုၵ်းၵၼ် တၢင်းၾၢႆႇဢွၵ်ႇဝဵင်းလၢႆးၶႃႈ ၼၼ်ႉမႃးသေ သိုၵ်းမၢၼ်ႈ ၸၵၶ 2 မိူင်းၼွင် သင်ႇပိၵ်ႉဢိုတ်းသဵၼ်ႈတၢင်း တီႈတၢင်းၽႄ မိူင်းၼွင် – ၵေးသီး – လၢႆးၶႃႈ ၼႂ်းၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ပႆႇပၼ်ၵူၼ်းမိူင်းၵႂႃႇမႃး ၼႆယဝ်ႉ။
ၸဝ်ႈၵႃး လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၶဝ် တေၵူတ်ႇထတ်း ၼႂ်းၵႃးပေႃးႁၼ်တၢင်ႇၶဝ်ႈသၢၼ်ဝႆႉၸိူဝ်းၼႆႉ ၶဝ် ဢမ်ႇ ပၼ်ၵႂႃႇ ၶဝ်ပွင်ႇၸႂ်ဝႃႈ ၵူဝ်ပိူၼ်ႈဢဝ်ၶဝ်ႈသၢၼ် ၸိူဝ်းၼၼ်ႉ သူင်ႇၸူးၸုမ်းယိပ်းၵွင်ႈၵၢင်ႇ ႁိုဝ်ဢမ်ႇ ႁူႉ။ ၶဝ်တေ ၸႅတ်ႈထၢမ်ဝႃႈ လုၵ်ႉလႂ်မႃး တေၵႂႃႇလႂ် ၸိူဝ်းၼႆႉ၊ ယဝ်ႉၵေႃႈ တေၵူတ်ႇထတ်းၼႂ်းရူတ်ႉၼႂ်းၵႃး ႁၢဝ်ႈႁႅင်း ပေႃးၵႂႃႇသဵၼ်ႈ တၢင်းလၢႆးၶႃႈ – မိူင်းၼွင်ၼႆႉ” – ဝႃႈၼႆ။
ပေႃးဢဝ် သဵၼ်ႈတၢင်းလၢႆၶႃႈ – မိူင်းၼွင် – မိူင်းသူႈ ဝႃႈၸိုင် တေယၢၼ်ၵႆၵၼ် 81 လၵ်း။ သင်ဝႃႈ လုၵ်ႉလၢႆးၶႃႈ ၵႂႃႇတၢင်း မိူင်းၵိုင် – ၵေးသီး – မိူင်းၼွင်- မိူင်းသူႈၸိုင် သဵၼ်ႈတၢင်းၼၼ်ႉ တေၵူတ်ႉ တေလႆႈၸႂ်ႉၶၢဝ်းယၢမ်းႁိုင်။
“လၢႆးၶႃႈ – မိူင်းသူႈၼႆႉ ၵႆၵၼ် 81 လၵ်း သဵၼ်ႈတၢင်းၼႆႉ တေၸမ်သေသိုဝ်ႈ။ လၢႆးၶႃႈ – မိူင်းၼွင်ၼႆႉ တေၵႆၵၼ် 2 ၸူဝ်ႈ မူင်း၊ မိူင်းၼွင် – မိူင်းသူႈသမ်ႉ 1 ၸူဝ်ႈမူင်း။ သင်ဝႃႈ လုၵ်ႉလၢႆးၶႃႈ ၵႂႃႇတၢင်း မိူင်းၵိုင် – ၵေးသီး – မိူင်းၼွင် – မိူင်းသူႈၸိုင် သဵၼ်ႈတၢင်းၼၼ်ႉ တေၵူတ်ႉ တေလႆႈၸႂ်ႉၶၢဝ်းယၢမ်းႁိုင်မွၵ်ႈ 6 ၸူဝ်ႈမူင်း။ မိူၼ်ၼင်ႇ လၢႆးၶႃႈ – မိူင်းၵိုင် 1 ၸူဝ်ႈမူင်း၊ မိူင်း ၵိုင် – ၵေးသီး 2 ၸူဝ်ႈမူင်း၊ ၵေးသီး – မိူင်းၼွင် 2 ၸူဝ်ႈမူင်း၊ မိူင်းၼွင် – မိူင်းသူႈ 1 ၸူဝ်ႈမူင်း”- ၸဝ်ႈၵႃး သိုပ်ႇလၢတ်ႈၼႄ ၼင်ႇၼႆ။
ဢိင်ၼိူဝ် လွင်ႈသိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်းၼႆႉသေ တုမ်ႉတိူဝ်ႉ ၸဝ်ႈၵႃး – ၵူၼ်းမိူင်းဢွၵ်ႇတႃႈပႆတၢင်းၵူၺ်း ဢမ်ႇၵႃး တုမ်ႉတိူဝ်ႉပႃး ၵူၼ်းၵႃႉၶၢႆၽၵ်းၶဵဝ် တၢင်းဝဵင်းပၢင်လူင် ဢၼ်တေႃႉၵႂႃႇၶၢႆတၢင်း မိူင်းၼွင် – ဝၢၼ်ႈႁႆး – မိူင်းသူႈ ၸိူဝ်းၼၼ်ႉ ထူပ်းတၢင်းယၢပ်ႇၽိုတ်ႇၸွမ်း ႁၢဝ်ႈႁႅင်းထႅင်ႈ။
ၵူၼ်းၵႃႉၽၵ်းၶဵဝ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ သင်ဝႃႈ သိုၵ်းမၢၼ်ႈၶဝ် ပိၵ်ႉဢိုတ်းသဵၼ်ႈတၢင်းၼၼ်ႉၸိုင် ႁဝ်းၶႃႈ ထူပ်းတၢင်းယၢပ်ႇၽိုတ်ႇႁႅင်းတႄႉဢေႃႈ ယွၼ်ႉလႆႈၸႂ်ႉၶၢဝ်းယၢမ်းႁိုင် ၵူႈပွၵ်ႈႁဝ်းတေၸႂ်ႉၶၢဝ်းယၢမ်း 2 – 3 ၸူဝ်ႈမူင်း။ ယၢမ်းလဵဝ်သမ်ႉ ယွၼ်ႉလႆႈၵႂႃႇတၢင်းမိူင်းၵိုင်လႄႈ လႆႈၸႂ်ႉၶၢဝ်းယၢမ်းႁိုင် 5-6 ၸူဝ်ႈမူင်းၼႆႉ” – ဝႃႈၼႆ။
လိူဝ်ၼၼ်ႉ တပ်ႉသိုၵ်းမၢၼ်ႈ ဢၼ်ပၵ်းဝႆႉတီႈတၢင်းဝဵင်းလၢႆးၶႃႈၼၼ်ႉ သင်ဝႃႈ ရူတ်ႉၵႃး ၵူၼ်းမိူင်း လုၵ်ႉတၢင်းဝဵင်းပၢင်လူင်မႃးၸိုင် ၶဝ်တေႁႄႉရူတ်ႉၵႃး ၵိုတ်းသေ မွၵ်ႇလၢတ်ႈ ႁၢမ်ႈၵႂႃႇတၢင်း မိူင်းၼွင် ယွၼ်ႉသဵၼ်ႈတၢင်းၼၼ်ႉ ထုၵ်ႇပိၵ်ႉဢိုတ်းဝႆႉ ပေႃးၵႂႃႇ မိူင်းၼွင် – မိူင်းသူႈၸိုင် ၶဝ်တေၼႄႉၼမ်းၵႂႃႇတၢင်းပုၼ်ႉ တၢင်းၼၼ်ႉ – ၸဝ်ႈၵႃး သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် သဵၼ်ႈတၢင်းသၢႆႁွင်ႇ မိူၼ်ၼင်ႇ လုၵ်ႉလၢႆးၶႃး – မိူင်းၵိုင် – ၵေးသီး – မိူင်းၼွင် – မိူင်းသူႈ သဵၼ်ႈတၢင်းသၢႆ ၼၼ်ႉတႄႉ ၵႂႃႇမႃးလႆႈ။ သင်ဝႃႈ သဵၼ်ႈတၢင်းသၢႆၵၢင် မိူၼ်ၼင်ႇ လၢႆၶႃႈ – မိူင်းၼွင် – မိူင်းသူႈ ၼႆႉတႄႉ သိုၵ်းမၢၼ်ႈ ၸၵၶ 2 မိူင်းၼွင် ပိၵ်ႉဢိုတ်းဝႆႉ။ လိူဝ်ၼၼ်ႉ သဵၼ်ႈတၢင်းသၢႆၸၢၼ်း မိူၼ်ၼင်ႇ မိူင်းသူႈ – ၶူဝ်လမ် – ၼမ်ႉၸၢင် – လွႆလႅမ် ၼၼ်ႉတႄႉ ၵႂႃႇမႃးလႆႈ ဝႃႈၼႆ။
