ၵူၼ်းမိူင်းတီႈၸႄႈလၢၼ်ႉ ၺႃးမၢၵ်ႇလူင်တူၵ်းသႂ်ႇလင်ႁိူၼ်းလူႉၵွႆၼမ် ၵူၼ်းတိူဝ်ႉၸၢၵ်ႇမၢၵ်ႇမၢတ်ႇၸဵပ်း ဢမ်ႇယွမ်း 3 ၵေႃႉ။

ဝၼ်းတီႈ 2/8/2023 သိုၵ်းမၢၼ်ႈတင်း သိုၵ်း TNLA ပိုတ်းယိုဝ်းၵၼ်သုတ်းဝၼ်း မၢၵ်ႇလူင်သိုၵ်းမၢၼ်ႈ တူၵ်းသႂ်ႇႁိူၼ်းယေး ၵူၼ်းမိူင်းသေ မီးလွင်ႈလူႉၵွႆ ၵူၼ်းမၢတ်ႇၸဵပ်း ဢမ်ႇယွမ်း 3 ၵေႃႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈ ယိုဝ်းၵွင်ႈလူင်သႂ်ႇဝၢၼ်ႈ  ။ တိူဝ်ႉၺႃး 2 ၵေႃႉ  ၼၢႆးလၢၼ် ။ ၼၢႆးမၼ်းတႄႉ တိူဝ်ႉၺႃးတီႈမိုဝ်း  ။ လၢၼ်သမ်ႉတိူဝ်ႉၺႃး တီႈႁူဝ်ၶဝ်ႇ။ ၵူၼ်းဝၢၼ်ႈၶၢင်ၵေႃႉၼိုင်ႈၵေႃႈ မၢတ်ႇၸဵပ်း ” – ဝႃႈၼႆ။

သွင်ၵေႃႉၼၢႆးလၢၼ် ဢၼ်တိူဝ်ႉၸၢၵ်ႇမၢၵ်ႇမၢတ်ႇၸဵပ်းၼႆႉ ၵေႃႉပဵၼ်လၢၼ် ဢႃယု မီး 7 ၶူပ်ႇ ၊ ၵေႃႉပဵၼ်ၼၢႆး ၸိုဝ်ႈ ပႃႈဢွင်ႇပွႆး ဢႃယု 50 ပၢႆ  ။ မိူဝ်ႈလဵဝ်ယူတ်းယႃတူဝ်ဝႆႉ ယူႇတီႈႁူင်းယႃလူင်ၼမ်ႉၶမ်း  ။

ၼႂ်းပၢင်တိုၵ်းတီႈၸေႊလၢၼ်ႉၼႆႉ လိူဝ်သေ မီးၵူၼ်းမိူင်းတိူဝ်ႉၸၢၵ်ႇမၢၵ်ႇ မၢတ်ႇၸဵပ်းယဝ်ႉ မိူၼ်ၼင်ႇ ဝတ်ႉဝႃးၽႃသိူဝ်ႇလႄႈ ႁိူၼ်းၵူၼ်းမိူင်းၵေႃႈ မီးလွင်ႈ လူႉၵွႆၼမ်ဝႃႈၼႆ။

ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မၢၵ်ႇၵွင်ႈ ဢၼ်တူၵ်းသႂ်ႇ ၼႂ်းဝတ်ႉၵျွင်း ၵမ်ႇမထၢၼ်းၼၼ်ႉတႄႉ လႅပ်ႈတေပဵၼ်ၶွင် သိုၵ်းလွႆၶဝ် ။ လႅပ်ႈၶဝ်တေ ယူႇႁူဝ်ဝၢၼ်ႈလွႆၸိူဝ်းၼၼ်ႉသေ ယိုဝ်းလူင်း မႃး။ ယဝ်ႉၵေႃႈ ႁိူၼ်းႁဝ်းၵေႃႈ မၢၵ်ႇမႃးတူၵ်းသႂ်ႇဢေႃႈ ။ ၶူဝ်းႁိူၼ်းၶူဝ်းယေးၸိူဝ်းၼႆႉၵေႃႈ လူႉသုမ်း ဢၼ်ၼႆႉ တႄႉ ပႆႇႁူႉႁွႆးမိုဝ်းၽႂ် ။ ယွၼ်ႉပဵၼ်ၶၢဝ်းၾူၼ်လႄႈ ယၢပ်ႇဢေႃႈ ႁိူၼ်းသမ်ႉၵွႆႈဝႆႉၼမ်။ႁိူၼ်းဢၼ်ၺႃး မၢၵ်ႇလူင်တူၵ်းသႂ်ႇ လႅပ်ႈၼမ်ဢေႃႈ ၼႂ်းဝၢၼ်ႈၼႆႉ ၵူၺ်းၼႃႇ ၽႂ်ၵေႃႈ ဢမ်ႇႁတ်းၵႂႃႇတူၺ်းၽႂ် ၵွပ်ႈဝႃႈ သိုၵ်းၶဝ် တူင်ႉၼိုင် ၵႂႃႇမႃး ဝႆႉ” – ဝႃႈၼႆ။

တီႈၸႄႈလၢၼ်ႉၼႆႉ ပၢင်တိုၵ်းတိုၵ်ႉၶဵင်ႈၶႅင်ၵၼ်ဝႆႉသေဢမ်ႇၵႃး မၢၵ်ႇလူင်မၢၵ်ႇဢွၼ်ႇဢၼ်မႃးတူၵ်းၼႂ်းဝၢၼ်ႈ ၼႂ်းသူၼ်သေ ဢမ်ႇတႅၵ်ႇၸိူဝ်းၼၼ်ႉၵေႃႈ မီးၼမ်။  လွင်ႈၸိူဝ်းၼႆႉ ပႆႇမီးမူႇလႂ် ၸုမ်းလႂ် မႃးၵဵပ်းသိမ်းၽဵဝ်ႈလၢင်ႉပၼ် တေၵႂႃႇတေမႃးပေႃးယၢပ်ႇလူင်ဝႆႉ။ ၸိူဝ်းပၢႆႈၵေႃႈပၢႆႈ ၵမ်ႈၼမ် ၵူၼ်းထဝ်ႈၵူၼ်းၵႄႇတႄႉ ပၢႆႈၵႂႃႇယူႇ မူႇၸေႊမူတ်းယဝ်ႉ ၵိုတ်းၵူၼ်းၼုမ်ႇၵူၼ်းၵမ်ၵူၺ်း ဢၼ်တိုၵ်ႉပႂ်ႉတူၺ်းႁိူၼ်းယေးၽႂ်မၼ်း ပေႃးဢမ်ႇၼၼ် ၵူဝ်သိုၵ်းၶဝ် ၶဝ်ႈသွၵ်ႈတဝ် ၼႂ်းႁိူၼ်းၼႂ်းယေး။ ပေႃးပဵၼ်လႆႈတႄႉ ဢမ်ႇၶႂ်ႈႁႂ်ႈသိုၵ်း  မႃးယူႇၸွမ်းဝၢၼ်ႈၸွမ်းသူၼ်ႁဵတ်းၼႆ  ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄၼင်ႇၼႆ။