သိုၵ်းမၢၼ်ႈ ယိုတ်းမိူင်း ယိုဝ်းၵွင်ႈလူင် သႂ်ႇၼႂ်းဝၢၼ်ႈၵွင်းဝဵင်းသေ ႁဵတ်းႁႂ်ႈၵူၼ်းဝၢၼ်ႈ ဢွၼ်ၵၼ်ပၢႆႈၽေးသိုၵ်း မႃးသွၼ်ႈ ယူႇဝႆႉတီႈၵျွင်းၶရိတ်ႉယၢၼ်ႇ ဢမ်ႇယွမ်း 100 ။

မိူဝ်ႈဝႃး ဝၼ်းတီႈ 2/8/2023 ယၢမ်းဝၢႆးဝၼ်းမွၵ်ႈ 4 မူင်း ၵူၼ်းဝၢၼ်ႈၵွင်းဝဵင်း ဢွၼ်ၵၼ်ပၢႆႈၽေးသိုၵ်း မႃးသွၼ်ႈယူႇဝႆႉ တီႈၵျွင်းၶရိတ်ႉယၼ်ႇ ဝၢၼ်ႈၼမ်ႉဢုမ် ဝဵင်းမူႇၸေႊ ၸိုင်ႈတႆးပွတ်းႁွင်ႇ ယွၼ်ႉသိုၵ်းမၢၼ်ႈ ယိုတ်းမိူင်း ယိုဝ်းၵွင်ႈလူင် သႂ်ႇၼႂ်းမူႇဝၢၼ်ႈ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းလွႆသမ်ႉ ၶဝ်ႈမႃးၼႂ်းဝၢၼ်ႈ သိုၵ်းမၢၼ်ႈသမ်ႉ ယူႇတီႈ ၼွၵ်ႈသေ ယိုဝ်းၵွင်ႈလူင် ၶဝ်ႈမႃးၼႂ်းဝၢၼ်ႈလႄႈ ၵူၼ်းဝၢၼ်ႈၵူဝ် ဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈၵျွင်းၶရိတ်ႉယၼ်ႇ (ကချင် အသင်းတော်) ဢၼ်မီးဝႆႉ တီႈဝၢၼ်ႈၼမ်ႉဢုမ် ႁူဝ်ၵူၼ်းဢမ်ႇယွမ်း 100 လိူဝ်ၼၼ်ႉ ဢၼ်ပၢႆႈၵႂႃႇ ယူႇၸွမ်းႁိူၼ်းယေးပီႈၼွင်ႉ ၽႂ်မၼ်းၵေႃႈ မီးထႅင်ႈၼမ်ဢေႃႈ ၼၼ်ႉတႄႉ ဢမ်ႇလႆႈႁူႉႁူဝ်ယွႆႈမၼ်းၶႃႈ”- ဝႃႈၼႆ။

လိူဝ်ၼၼ်ႉ သိုၵ်းတဢၢင်း TNLA ဢဵၼ်ႁႅင်းမွၵ်ႈ 300 ၶဝ်ႈမႃးၼႂ်းဝၢၼ်ႈၼမ်ႉဢုမ်သေ ႁၢမ်ႈၵူၼ်းဝၢၼ်ႈ ဢွၵ်ႇႁိူၼ်းယေးၵၼ်။ ယွၼ်ႉသိုၵ်းတဢၢင်း ၶဝ်ႈယူႇဝႆႉၼႂ်းဝၢၼ်ႈလႄႈ သိုၵ်းမၢၼ်ႈ ယိုတ်းမိူင်းသမ်ႉ ယူႇတၢင်းၼွၵ်ႈ ယိုဝ်းၵွင်ႈလူင် ၶဝ်းၼႂ်းမူႇ ဝၢၼ်ႈ ၵူၺ်းၵႃႈ ပၢင်တိုၵ်း တင်းသွင်ၾၢႆႇတႄႉ ဢမ်ႇပဵၼ်။

မိူဝ်ႈၼႆႉ ဝၼ်းတီႈ 3/8/2023 ပဵၼ်ဝၼ်းၵၢတ်ႇၼမ်ႉဢုမ် ယွၼ်ႉသိုၵ်းမၢၼ်ႈတင်း သိုၵ်းတဢၢင်း ၶဵင်ႈၶႅင်ၵၢၼ်သိုၵ်း ၵၼ် ႁၢဝ်ႈႁႅင်းလႄႈ ႁဵတ်းႁႂ်ႈၵၢတ်ႇၼမ်ႉဢုမ် ဢမ်ႇမီးၵူၼ်းၶဝ်ႈသိုဝ်ႉၸၢႆႇ ႁၢၼ်ႉၶၢႆၶူဝ်း ၸိူဝ်းၼႆႉၵေႃႈ ဢမ်ႇမီးၽႂ်ႁတ်းပိုတ်ႇ ယွၼ်ႉၵူဝ်ပဵၼ် ပၢင်တိုၵ်း။

ၼွၵ်ႈလိူဝ်ၼၼ်ႉ ၵူၼ်းဝၢၼ်ႈထမ်ႈတင်း ပွၵ်ႉၸၢၼ်း ၼႂ်းဢိူင်ႇၸေႊလၢၼ်ႉ ႁူဝ်ၵူၼ်း 50 ပၢႆ ဢွၼ်ၵၼ်ပၢႆႈၽေးသိုၵ်း မႃး သွၼ်ႈဝႆႉ တီႈတိူၵ်ႈၵမ်ႇမထၢၼ်း ၸေႊလၢၼ်ႉ မီး 13 ဝၼ်း ပႆႇၸၢင်ႈပွၵ်ႈ ယွၼ်ႉသိုၵ်းမၢၼ်ႈတင်း သိုၵ်းတဢၢင်း တိုၵ်ႉၶဵင်ႈၶႅင် ၵၢၼ်သိုၵ်းၵၼ်ယူႇ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၸေႊလၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ပၢႆႈမႃးသွၼ်ႈဝႆႉ တီႈၵျွင်းၵမ်ႇမထၢၼ်း ၸေႊလၢၼ်ႉၼႆႉ ပဵၼ်ၵူၼ်းဝၢၼ်ႈထမ်ႈ ႁူဝ်ၵူၼ်းမွၵ်ႈ 30 ၵေႃႉ လႄႈၵူၼ်းဝၢၼ်ႈပွၵ်ႉၸၢၼ်း မွၵ်ႈ 20 ၵေႃႉ သွင်တီႈႁူမ်ႈၵၼ် တေမီးႁူဝ်ၵူၼ်းမွၵ်ႈ 50 ။ ဝၢၼ်ႈၶဝ်ၸမ်ပၢင်တိုၵ်း တီႈႁိမ်းလွႆတေးမိူင်းၼၼ်ႉလႄႈ ဢွၼ်ၵၼ်ပၢႆႈမႃး ၸဵမ်မိူဝ်ႈဝၼ်းတီႈ 23/7/2023 ႁၢၼ်ႉတေႃႇထိုင်ယၢမ်းလဵဝ် မီး 13 ဝၼ်းယဝ်ႉ။ ယၢမ်းလဵဝ် သိုၵ်းတင်းသွင်ၾၢႆႇ တိုၵ်ႉထႅမ်ႁႅင်းသိုၵ်းၼင်ႇၵၼ်ယူႇ”- ဝႃႈၼႆ။

လိူဝ်ၼၼ်ႉ ၵူၼ်းၼႂ်းဢိူင်ႇၸေႊလၢၼ်ႉ ၵူၼ်းဝၢၼ်ႈၼမ်ႉၵတ်း၊ ဝၢၼ်ႈမႆႉသၵ်းလႄႈ မၢၼ်ႈၵၢင် ၸိူဝ်းၼႆႉၵေႃႈ ဢွၼ် ၵၼ်ပၢႆႈ ၽေးသိုၵ်း မႃးသွၼ်ႈဝႆႉၸွမ်းပီႈၼွင်ႉၽႂ်မၼ်း ၼႂ်းဝဵင်းမူႇၸေႊလႄႈ ၼမ်ႉၶမ်း ၸိူဝ်းၼႆႉထႅင်ႈ တင်းၼမ် ၼၼ်ႉတႄႉ ႁူဝ်ၵူၼ်း မီးၵႃႈႁိုဝ်တႄႉ ပႆႇႁူႉ။