မိူဝ်ႈၼႆႉ ဝၼ်းတီႈ 2/8/2023 တႄႇယၢမ်းၵၢင်ၼႂ် 10 မူင်းပၢႆ သိုၵ်းမၢၼ်ႈ ယူႇၾၢႆႇ 105 လၵ်းသေ ဝၢႆႇပၢၵ်ႇၵွင်ႈလူင် ယိုဝ်းသႂ်ႇ တၢင်းဝဵင်းၸေႊလၢၼ်ႉ ပွတ်းၼႂ်ၵူၺ်း ဢမ်ႇယွမ်း 10 ၵမ်း ။

ၵူၼ်းၼုမ်ႇ ၸေႊလၢၼ်ႉၵေႃႉၼိုင်ႈလၢတ်ႈ တီႈၽူႈတွႆႇႁွၵ်ႈဝႃႈ – “ ထွမ်ႇသဵင်မၼ်းတႄႉ သိုၵ်းမၢၼ်ႈၶဝ် ယူႇတၢင်း 105 လၵ်းပုၼ်ႉသေ ယိုဝ်းမႃးတၢင်းႁဝ်းၼႆႉၶႃႈဢေႃႈ ။ မႃးတူၵ်းသႂ်ႇ တၢင်းလွႆတေးမိူင်းၼၼ်ႉဢေႃႈ။ လွင်ႈတိူဝ်ႉမၢတ်ႇ လူႉတၢႆတႄႉ ပႆႇႁူႉၸွမ်းၶႃႈ ။ ၵမ်ႈၽွင်ႈၵေႃႈဝႃႈ မၢၵ်ႇလူင်ၼႆႉ လုၵ်ႉတၢင်းလွႆသူးတွင်းၼၼ်ႉသေ မႃးတူၵ်းတၢင်း လွႆတေးမိူင်းၼႆႉ။ သဵင်မၼ်းမေႃး ဢမ်ႇယွမ်း10 ၵမ်းယဝ်ႉ တေႃႇထိုင်မိူဝ်ႈလဵဝ် တိုၵ်ႉငိၼ်းယူႇ  ” – ဝႃႈၼႆ။

ၼႂ်းဝဵင်းမူႇၸေႊၵေႃႈ ၵူၼ်းၵႂႃႇမႃးဢမ်ႇၵိုၼ်းမိူၼ်တၢင်ႇဝၼ်း။ ၵူၼ်းမိူင်းလႆႈဢွၼ်ၵၼ်ၾၢင်ႉယူႇၾၢင်ႉၵိၼ်။

ၵူၼ်းၶၢႆၶူဝ်း ဝဵင်းမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈၵူႈပွၵ်ႈဢမ်ႇတွၼ်ႉယၢမ်ႈႁၼ် ပၢင်တိုၵ်း ပဵၼ်ယၢဝ်းၸိူင်ႉၼႆ။ ပွၵ်ႈၼႆႉလႆႈဝႃႈ ပဵၼ်ႁႅင်းဝႆႉ။ သဵင်ၵွင်ႈသဵင်မၢၵ်ႇလႆႈငိၼ်းဢမ်ႇထၢတ်ႇ။ ၵူၼ်းမိူင်းလႆႈၾၢင်ႉယူႇ ၾၢင်ႉၵိၼ် ၵူဝ်သိုၵ်းသွင်ၸုမ်း လမ်းလိုပ်ႈၵၼ်လူင်းမႃးတၢင်းဝဵင်း။ တူင်ႈၶၢၼ်ၼႆႉ ၸမ်ဝဵင်းၼႃႇ” ဝႃႈၼႆ။

ၼႂ်ၼႆႉၵူၺ်းၼင်ႇၵဝ်ႇတၢင်း ဢိူင်ႇတူင်ႈၶၢၼ်ၵေႃႈ မီးသဵင်ၵွင်ႈလူင်ၵွင်ႈဢွၼ်ႇတႅၵ်ႇ ၼႂ်းၵႄႈဝၢၼ်ႈတူင်ႈၶၢၼ်တႂ်ႈလႄႈ တူင်ႈၶၢၼ်ၼိူဝ်။ ၼၼ်ႉတႄႉပဵၼ်ၽႂ်ယိုဝ်းၽႂ်တႄႉဢမ်ႇလႆႈႁူႉၸွမ်း။ လႆႈငိၼ်းဝႃႈ မၢၵ်ႇၵွင်ႈလူင်တူၵ်းၼႂ်းႁိူၼ်းယေး ၵူၼ်းဝၢၼ်ႈတူင်ႈၶၢၼ်တႂ်ႈ ၼႆသေတႃႉ လွင်ႈမၢတ်ႇၸဵပ်းလူႉတၢႆ မီးၵႃႈႁိုဝ်ၵေႃႈဢမ်ႇလႆႈႁူႉၸွမ်း။

တၢင်းဝၢၼ်ႈၼမ်ႉမူၼ်း ၼၼ်ႉ တေႃႇထိုင်ယၢမ်းဝၢႆးဝၼ်းၼႆႉ သဵင်ပိုတ်းယိုဝ်းၵၼ်ဢမ်ႇပႆႇထၢတ်ႇ။ မၢၵ်ႇၵွင်ႈတူၵ်းထိုင် ၼႂ်းႁိူၼ်းယေးၵူၼ်းဝၢၼ်ႈ။ ၵူၼ်းဝၢၼ်ႈႁၼ်သိုၵ်းလွႆလူင်းမႃးတၢင်းဝၢၼ်ႈလႄႈ ၵူဝ်ပၢင်တိုၵ်းပဵၼ်ၼႂ်းဝၢၼ်ႈ ဢွၼ်ၵၼ်တူၵ်းၸႂ်။

ၼႂ်းႁၢင်လိူၼ်ၵျူႊလၢႆႊ ပူၼ်ႉမႃးၼႆႉၵူၺ်းၵေႃႈ သိုၵ်းမၢၼ်ႈ လႄႈ တပ်ႉသိုၵ်း ၵူၼ်းမိူင်း ပျီႇတူႉၸိတ်ႉႁူမ်ႈ ၵၼ်ၶိုၼ်ႈယိုဝ်း TNLA  တီႈလွႆတေးမိူင်း သၼ်လွႆၼမ်ႉမူၼ်း ဢိူင်ႇၸေႊလၢၼ်ႉ ၸႄႈဝဵင်မူႇၸေႊၼၼ်ႉသေ ၵူၼ်းဝၢၼ်ႈ ၸိူဝ်းယူႇတိၼ်လွႆ လႆႈၶၢႆႉပၢႆႈ သွၼ်ႈယူႇဝႆႉ ၼႂ်းဝတ်ႉၵျွင်းဢၼ်မီးၼႂ်းၸႄႈလၢၼ်ႉၼႆယဝ်ႉ။

ၵူၼ်းၼုမ်ႇ ၼႂ်းပိုၼ်ႉတီႈၸေႊလၢၼ်ႉၵေႃႉၼိုင်ႈသိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ယိုဝ်းၵၼ်ႁေ ၵူၼ်းဝၢၼ်ႈ ၸိူဝ်းၼၼ်ႉ ပၢႆႈယဝ်ႉပွၵ်ႈၼိုင်ႈ ။ ၵူၼ်းဝၢၼ်ႈၶဝ် တိုၵ်ႉႁႃမိူဝ်းၸႂ်းႁိူၼ်းၶိုၼ်းမိူဝ်ႈဝႃးၵူၺ်း ပေႃးတေလႆႈ ပၢႆႈထႅင်ႈ ယဝ်ႉယူဝ်ႉမိူဝ်ႈၼႆႉ။ၶဝ်ၶၢႆႉမႃးယူႇဝႆႉၸွမ်း ဝတ်ႉၵျွင်းၵမ်မထၢၼ်းၸေႊလၢၼ်ႉၼႆႉၸူဝ်ႈၶၢဝ်း ဢေႃႈၼၼ်ႉ ” – ဝႃႈၼႆ။

တီႈတိၼ်လွႆတေးမိူင်း ၼႂ်းၸေႊလၢၼ်ႉၼႆႉ မီးလၢႆဝၢၼ်ႈ မိူၼ်ၼင်ႇ ဝၢၼ်ႈၼမ်ႉၵတ်း ၊ ဝၢၼ်ႈမႆႉသၵ်း ၊ မၢၼ်ႈၵၢင် လႄႈ မၢၼ်ႈထမ်ႈ ၸဵမ်ၸိူဝ်းၼႆႉ ။ ယွၼ်ႉငဝ်းလၢႆးၵၢၼ်သိုၵ်းသိူဝ်ၸိူဝ်းၼႆႉသေ ၵူၼ်းဝၢၼ်ႈလႆႈၶၢႆႉပၢႆႈ သွၼ်ႈဝႆႉၼႂ်း ၸေႊလၢၼ်ႉ လႄႈ မူႇၸေႊ ၼႂ်းၼၼ်ႉ ၵူၼ်းမၢၼ်ႈထမ်ႈတႄႉ ဢွၼ်ၵၼ်ၶၢႆႉပၢႆႈသွၼ်ႈဝႆႉ တီႈဝတ်ႉၵျွင်းၵမ်ႇမထၢၼ်း ၸေႊလၢၼ်ႉ ႁူဝ်ၵူၼ်း ဢမ်ႇယွမ်း 30  လႆႈႁူႉၼင်ႇၼႆ။