ၸဝ်ႈသၢင်ႇဢွၼ်ႇ ထမ်ႇမိၵ မိူင်းပၼ်ႇ ဢၼ်ၶူးဝႃးဝုၼ်းၸုမ်ႉ တၵ်ႉၼၢႆ မီးၾၢင်ႇႁၢင်ႈ ၽူႈမျၢတ်ႈၵူၼ်းလီၼၼ်ႉ ပီၼႆႉ တေၾိုၵ်းၵမ်သိလ် ၼႂ်းဝႃႇသႃ 3 လိူၼ်။
ပေႃးထိုင်မႃး ဝၼ်းတီႈ 3/8/2023 ၸဝ်ႈသၢင်ႇဢွၼ်ႇထမ်ႇမိၵ တေၶဝ်ႈၾိုၵ်းတိုဝ်းၵမ်သိလ် ဢဝ်ဝႃႇသႃ ၸွမ်းၸဝ်ႈၶူး ဢႃႇၸိင်ႇၼ ၸဝ်ႈမိူင်းမိတ်ႈ (ၽူႈၼႄတြႃး) တီႈမႆႉၼိဝ်ႉၵျွင်းၵမ်ႇမထၢၼ်း ဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း တႃႇၼႂ်းဝႃႇသႃ 3 လိူၼ် ၼႆယဝ်ႉ။
ၸဝ်ႈၶူး ဢႃႇၸိင်ႇၼ (ၸဝ်ႈမိူင်းမိတ်ႈ) ၽူႈၼႄတြႃး တီႈဝတ်ႉ/ ၵျွင်းၵမ်ႇမထၢၼ်း ဝိပသ်ႉသႃႇၼႃႇ ဝဵင်းလၢင်းၶိူဝ်း လၢတ်ႈတီႈ ၽူႈတွႆႇႁွၵ်ႈဝႃႈ – “ၼႂ်းဝႃႇသႃ ပီ 2023 ၼႆႉ ၸဝ်ႈမႅတ်ႈဢွၼ်ႇသၢင်ႇထမ်ႇမိၵ တေမႃးဢဝ်ဝႃႇသႃ ၸွမ်းၸဝ်ႈႁဝ်း တႃႇၶၢဝ်း တၢင်းၼႂ်းဝႃႇ 3 လိူၼ် တမ်ႈတီႈမႆႉၼိဝ်ႉ ၵျွင်းၵမ်ႇမထၢၼ်း မိူင်းပၼ်ႇၼႆႉ ၸဝ်ႈႁဝ်း တေသွၼ်ပၼ်လွင်ႈၵျၢင်ႉၵမ်ထမ်းလႄႈ လွင်ႈႁေႃးတြႃး ၸိူဝ်းၼႆႉၵႂႃႇ။ ယဝ်ႉၵေႃႈ တေသုင်းသၢၵ်ႈလွတ်ႈပႃးထႅင်ႈ”- ဝႃႈၼႆ။
ၸဝ်ႈသၢင်ႇဢွၼ်ႇ ထမ်ႇမိၵၼႆႉ ထုၵ်ႇၸဝ်ႈသိလ်ထမ်း ၶူးဝႃးဝုၼ်းၸုမ်ႉ တၵ်ႉၼၢႆၸဝ်ႈဝႆႉဝႃႈ တေပဵၼ်ၸဝ်ႈသိလ်ထမ်း တူၼ်မႂ်ႇ ဝၼ်းမိူဝ်းၼႃး ဝႃႈၼႆဝႆႉ မိူဝ်ႈၸဝ်ႈသိလ်ထမ်းၶူးဝႃးဝုၼ်းၸုမ်ႉ လုၵ်ႉတီႈဝဵင်းမိူင်းတူၼ် ယေႃးမုၼ်ႁွတ်ႈထိုင်မႃးတီႈဝတ်ႉမူၺ်ႇ တေႃႇ ဝဵင်းမိူင်းပၼ်ႇ ပူၼ်ႉမႃး မိူဝ်ႈဝၼ်းတီႈ 6/8/2022 ယၢမ်းႁူဝ်ၶမ်ႈ 5 မူင်းၼၼ်ႉ ဝႃႈၼႆ။
ၸဝ်ႈသၢင်ႇဢွၼ်ႇ ထမ်ႇမိၵၼႆႉ ပဵၼ်လုၵ်ႈၸၢႆး ၸၢႆးၵျေႃႇၵျေႃႇ (ပေႃႈတႄႉ လူႉသဵင်ႈယဝ်ႉ) မႄႈၼၢင်းၸိင်ႇ ယူႇပွၵ်ႉ 1 (ပွၵ်ႇရႃႇ ၸႃႇ) ဝဵင်းမိူင်းပၼ်ႇ။ ပူႇတႄႉ ႁွင်ႉဝႃႈ လုင်းပုင်ႇၺလႄႈ ပႃႈၸိုၼ်ႈ။
လိူဝ်ၼၼ်ႉ မိူဝ်ႈၽွင်းၶဝ်ႈဝႃႇသႃ တီႈမႆႉၼိဝ်ႉ ၵျွင်းၵမ်ႇမထၢၼ်း 3 လိူၼ်ၼႆႉ တေမီးပႃး ပၢင်ပိုတ်ႇတြႃးထႅင်ႈ တႃႇၶၢဝ်းတၢင်း 100 ဝၼ်း တႄႇဢဝ် ဝၼ်းတီႈ 3/8/2023 ၼႆႉၵႂႃႇ။ ယဝ်ႉၵေႃႈ တေၸႅၵ်ႇႁဵတ်းလၢႆၸုပ်ႈ။ 1 ၸုပ်ႈလႂ် တေႁပ်ႉ ၽူႈၶဝ်ႈတိုဝ်း ၵမ်သိလ် 40 ၵေႃႉ။ 1 ၸုပ်ႈလႂ် တေၵျၢင်ႉၵမ်ႁိုင် 10 ဝၼ်း ၼႆယဝ်ႉ။
