သႆႈၵွၵ်ႇသီလႅင်လႅင်မိူင်းၶႄႇ  ဢၼ်ၵူၼ်းမိူင်းတႆး သူင်ၵိၼ် သႂ်ႇၸွမ်းတၢင်းၵိၼ်မႃႇလႃႇ  ၼၼ်ႉ ဢမ်ႇလီတေႃႇပၢႆးယူႇလီၼႆ ၸဝ်ႈၼႃႈတီႈထႆး ပိုၼ်ၽၢဝ်ႇဢွၵ်ႇဝႆႉ။

သႆႈၵွၵ်ႇသီလႅင် မိူင်းၶႄႇ ဢၼ်သႂ်ႇလေႃးမႃးၸွမ်း ထူင်ၶဝ်ႈသွႆး၊ ထူင်ၶိူင်ႈႁဵတ်း မႃႇလႃႇ ၸိူဝ်းၼၼ်ႉ ဢမ်ႇမီးလွင်ႈႁဵတ်းၸွမ်းလၵ်းၸဵင် ၵၢၼ်ႁဵတ်းဢွၵ်ႇ တၢင်းၵိၼ် လႄႈ ၽိူဝ်ႇႁွင်ႈၵၢၼ်ၾၢႆႇတၢင်းၵိၼ်လႄႈယႃႈယႃမိူင်းထႆး လႆထတ်းတူၺ်း ထူပ်း ႁၼ် ၸိူဝ်ႉမႅင်းပႅတ်ႊထီႊရီႊယႃႊတင်းၼမ်။ သင်ၵိၼ်ၺႃးမႅၼ်ႈ ၸၢင်ႈပဵၼ် ၽေးတေႃႇ ပၢႆးယူႇလီ ၊ ၵွပ်ႈၼႆလႄႈ ၾၢႆႇတၢင်းမိူင်းထႆးပိုၼ်ၽၢဝ်ႇမိူဝ်ႈဝၼ်းတီႈ 16 လိူၼ်ၵျူႊလၢႆႊၼႆႉဝႃႈ ႁၢမ်ႈသိုဝ်ႉၶၢႆ သိုဝ်ႉၵိၼ်ဝႃႈၼႆ။

ၼႂ်းၶေႃႈပိုၼ်ၽၢဝ်ႇၶွင် ၾၢႆႇတၢင်းၵိၼ်လႄႈယႃ မိူင်းထႆးၼၼ်ႉတႅမ်ႈဝႆႉဝႃႈ – “ ပေႃးႁၼ် ၽႂ်သိုဝ်ႉၶၢႆ သိုဝ်ႉၵိၼ်ယႅမ်ႉ  ၸိုင် ႁႂ်ႈပွင်ႇၶၢဝ်ႇပၼ်ၽူႈမီးပုၼ်ႈၽွၼ်း ၵမ်းသိုဝ်ႈ- တေၶဝ်ႈၵူတ်ႇထတ်းဢဝ်လိူင်ႈပၼ်တူတ်ႈတၢမ်ႇ ငိုၼ်း 2 သႅၼ်ဝၢတ်ႇ တူတ်ႈတၢမ်ႇၶွၵ်ႈ 2 ပီ ဝႃႈၼႆဝႆႉ။

ၾၢႆႇမိူင်းထႆး ပိုၼ်ၽၢဝ်ႇႁၢမ်ႈသိုဝ်ႉၶၢႆ ၵိၼ်ယမ်ႉတၢင်းၵိၼ်ၶႄႇၼႆႉသေတႃႉ ၾၢႆႇတၢင်းမိူင်းမၢၼ်ႈတႄႉ ဢမ်ႇမီးလွင်ႈၵူတ်ႇထတ်းႁၢမ်ႈႁႄႉသင်။  

ၼႂ်းၶၢဝ်းတၢင်းဢၼ်မိူင်းၶႄႇမႃးလူင်းတိုၼ်း ဢဝ်ၶူဝ်းၶွင်ၼႂ်းမိူင်းမၢၼ်ႈမိူင်းတႆးမႃး ၶၢဝ်းတၢင်း 10 ပီၼႆႉ တၢင်းၵိၼ်မိူင်းၶႄႇၵေႃႈ လၢမ်းၽႄႈၶဝ်ႈမႃးၼႂ်းမိူင်းတႆး။ မွၵ်ႈ 90 ပိူဝ်းသႅၼ်း ပဵၼ်တၢင်းၵိၼ်ၶႄႇလွၼ်ႉလွၼ်ႉ။ ၵူၼ်းမိူင်းတႆး ၸဵမ်လဵၵ်ႉယႂ်ႇၼုမ်ႇထဝ်ႈ သူင်ၵိၼ် ။

မိူၼ်ၼင်ႇသႆႈၵွၵ်ႇသႅၼ်းၼႆႉ တေၵႆႉလႆႈႁၼ်ၸွမ်းႁၢၼ်ႉတၢင်းၵိၼ်လၢႆလၢႆတီႈ မိူၼ်ၼင်ႇ ႁၢၼ်ႉမႃႇလႃႇ ၊ ႁၢၼ်ႉႁွတ်ႉပွတ်ႉ ၊ ႁၢၼ်ႉပိင်ႈယၢင်ႈ ၸိူဝ်းၼႆႉ ၵမ်ႈၼမ်ပဵၼ်ႁၢၼ်ႉၸၢဝ်းၶႄႇ။

ၼင်ႇၵႂၢမ်းထုင်းမီးဝႆႉဝႃႈ “ ၵႂႃႇဢမ်ႇထုၵ်ႇၼိုင်ႈယၢင်ႈ ၵိၼ်ဢမ်ႇထုၵ်ႇၼိုင်ႈၵမ်း ၸၢင်ႈပဵၼ်ၽေးတေႃႇတူဝ် ” ၼႆၼၼ်ႉ သင်ႁဝ်းဢမ်ႇၾၢင်ႉသေ ၵိၼ်ၵႂႃႇၵူႈသမ်ႇၵူႈပိူင်ၸိုင် သၢႆၸႂ်ၸၢင်ႈလူႉၵွပ်ႈမၼ်းဢမ်ႇႁၢင်ႉ။

မိူၼ်ၼင်ႇသႆႈၵွၵ်ႇသီလႅင်မိူင်းၶႄႇ ၼႆႉ ၸဵမ်လုၵ်ႈဢွၼ်ႇၵူၼ်းလူင် သူင်ၵိၼ်ယႅမ်ႉမႃးၼမ်လႄႈ ယူႇတီႈၽူႈႁူႉႁၼ်ၶဝ် ထုၵ်ႇလီႁၢမ်ႈသီးၵၼ်ယူႇ။

လုၵ်ႈႁဵၼ်းမိူင်းႁူမ်ႈတုမ် ၵိၼ်သႆႈၵွၵ်ႇသႅၼ်းၼိုင်ႈ( ဢၼ်ဢွၵ်ႇမိူင်းထႆး ) ဢၼ်မီးပႃးမိၵ်ႈၵႆႇၼၼ်ႉသေ ပဵၼ်ၵွင်ႉလူႉတၢႆယဝ်ႉၵေႃႉၼိုင်ႈ လိူဝ်ၼၼ်ႉ ဢၼ်ၵိၼ်ၶဝ်ႈမုၼ်းသႅၼ်းၼိုင်ႈ ဢၼ်မႃးတၢင်းမိူင်းၶႄႇၼၼ်ႉသေ လူႉတၢႆၵေႃႉၼိုင်ႈ။