သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇသႂ်ႇတီႈဝၢၼ်ႈဢီႇၼၢႆး ၸႄႈဝဵင်းလႃႈသဵဝ်ႈ ႁိူၼ်းယေးၵူၼ်းဝၢၼ်ႈလူႉၵွႆ

သိုၵ်းမၢၼ်ႈလႄႈသိုၵ်းတဢၢင်း TNLA ၶဵင်ႈၶႅင်ၵၢၼ်သိုၵ်းတေႃႇၵၼ်ပိုတ်းယိုဝ်းတိုၵ်းတေႃးၵၼ်မႃးၶိူဝ်းယႂ်း၊ ဝၼ်းတီႈ 27/07/2023 ယၢမ်းၵၢင်ၼႂ်မွၵ်ႈ 10 မူင်းသိုၵ်းမၢၼ်ႈဢဝ်ၶိူင်ႈမိၼ်ယိုဝ်းသိုၵ်းမႃးပွႆႇမၢၵ်ႇသႂ်ႇသိုၵ်းတဢၢင်းၼႂ်းဢိူင်ႇဢီႇၼၢႆး တိူဝ်ႉပႃးႁိူၼ်းယေးၵူၼ်းဝၢၼ်ႈ။

ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းတဢၢင်းမႃးပုတ်ႈယူႇသဝ်းတီႈတပ်ႉပၢင်သဝ်းၵဝ်ႇသိုၵ်းမၢၼ်ႈ (ဢၼ်ထွႆဢွၵ်ႇပူၼ်ႉမႃးမွၵ်ႈ 5 ပီ) ၼႆႉၼၼ်ႉ။ သိုၵ်းမၢၼ်ႈဢဝ်ၶိူင်ႈမိၼ်မႃးယိုဝ်းဢမ်ႇယွမ်း 10 ၵမ်း။ တီႈတႄႉမၼ်း တီႈဢီႇၼၢႆးၼႆႉဢမ်ႇမီးပၢင်တိုၵ်းသင်။ သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇၵမ်းသိုဝ်ႈယဝ်ႉ” ဝႃႈၼႆ။

ၸၢၵ်ႇမၢၵ်ႇၶိူင်ႈမိၼ်သိုၵ်းမၢၼ်ႈတိူဝ်ႉသႂ်ႇႁိူၼ်းယေးၵူၼ်းဝၢၼ်ႈ လူႉၵွႆပႃးၸွမ်း။ ႁဵတ်းႁႂ်ႈၵူၼ်းမိူင်းတူၵ်းၸႂ် လႆႈပၢႆႈ။

သိုၵ်းလွႆ မၢတ်ႇၸဵပ်းလူႉတၢႆ 2 ၵေႃႉ ၵူၼ်းပိုၼ်ႉတီႈတႄႉလၢတ်ႈၸိူင်ႉၼႆယူႇသေတႃႉ ၽူႈတွႆႇႁွၵ်ႈၵပ်းသိုပ်ႇၸူးၽူႈၶၢၼ်ပၢၵ်ႇ TNLA ၵေႃႈ တိတ်းတေႃႇဢမ်ႇလႆႈလႄႈ ဢမ်ႇၸၢင်ႈယိုၼ်ယၼ်လွင်ႈမၢတ်ႇၸဵပ်းလူႉတၢႆ။

ဝၼ်းတီႈ 26 ယၢမ်းၵၢင်ဝၼ်း သိုၵ်းလွႆ TNLA ၸွမ်းပိုတ်းယိုဝ်းရူတ်ႉၵႃးသိုၵ်းမၢၼ်ႈ ၼႂ်းၵႄႈ ဝၢၼ်ႈၶိူဝ်းၼိမ်းလႄႈဝၢၼ်ႈၼႃးယႃႈမ ၸႄႈဝဵင်းလႃႈသဵဝ်ႈ ။ ၵႃးသိုၵ်းမၢၼ်ႈ ပၢႆႈမၢၵ်ႇၵွင်ႈသေ ၵႂႃႇၽႃႇၺႃးၵူၼ်းဝၢၼ်ႈ 2 ၵေႃႉၶီႇရူတ်ႉၶိူင်ႈမႃး။ ၵူၼ်းဝၢၼ်ႈတၢႆၵေႃႉၼိုင်ႈမၢတ်ႇၸဵပ်းၵေႃႉၼိုင်ႈ ၵူၼ်းၼုမ်ႇလႃႈသဵဝ်ႈၵေႃႉၼိုင်ႈလၢတ်ႈၼင်ႇၼႆ။

လိူဝ်ၼၼ်ႉ ဝၼ်းတီႈ 23 ထိုင် 26 သိုၵ်း TNLA လႄႈသိုၵ်းမၢၼ်ႈ ပိုတ်းယိုဝ်းတိုၵ်းတေႃးၵၼ် ၶဵင်ႈၶႅင်ၵၢၼ်သိုၵ်းတေႃႇၵၼ်ႁၢဝ်ႈႁႅင်း ၼႂ်းၸေႈဝဵင်းမူႇၸေႊ။ ၾၢႆႇသိုၵ်းမၢၼ်ႈမီးလွင်ႈမၢတ်ႇၸဵပ်းလူႉတၢႆ။ သိုၵ်းမၢၼ်ႈဢဝ်ၶိူင်ႈမိၼ် မႃးယိုဝ်းတီႈဢိူင်ႇၼမ်ႉဢုမ် တိူဝ်ႉသႂ်ႇႁိူၼ်းယေးၵူၼ်းဝၢၼ်ႈတီႈဝၢၼ်ႈသၢႆးၶၢဝ် ၊ မီးၵူၼ်းဝၢၼ်ႈမၢတ်ႇၸဵပ်းလူႉတၢႆၼင်ႇၵဝ်ႇ။