ၽွင်းၶၢဝ်းပွႆးၶၢႆၶူဝ်းၵုၼ်ႇ တီႈဝဵင်းမိူင်းပၼ်ႇ – လၢင်းၶိူဝ်း ၼႂ်းလိူၼ်ၵျူႊလၢႆႊၼႆႉ မီးၽူႈလၵ်ႉၸၵ်ႉၶုတ်ႈ လိူင်ႇၼမ်ႁႅင်း ႁိူၼ်းယေး ၵူၼ်းဝၢၼ်ႈ ဢၼ်ထုၵ်ႇၵူၼ်းလၵ်ႉၶိုၼ်ႈႁိူၼ်း ဢမ်ႇယွမ်း 6 လင်ယဝ်ႉ။

ႁၢင်လိူၼ်ၵျုႊလၢႆႊ 2023 ၼႆႉ ႁၢၼ်ႉမႄးၶမ်း(ၸၢင်ႈၶမ်း) တင်း ႁၢၼ်ႉၵႅတ်းၶူၼ်ႁူဝ် ဢၼ်ပိုတ်ႇၵိုၵ်းၵၼ်ဝႆႉ တီႈႁိမ်းဝတ်ႉ/ ၵျွင်းတေႃႇ ဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်းၼၼ်ႉ ထုၵ်ႇၽူႈလၵ်ႉယႃႉႁၢၼ်ႉ ၶဝ်ႈသွၵ်ႈတဝ် ယၢမ်းၵၢင်ၶိုၼ်း ။  

ၵူၼ်းပိုၼ်ႉတီႈ ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ဝၢႆးမီးပွႆးၶၢႆၶူဝ်းၵုၼ်ႇ မႃးဝၼ်း ၼိုင်ႈၵူၺ်း၊  ႁၢၼ်ႉၵႅတ်းၶူၼ်ႁူဝ်ဢၼ်ပိုတ်ႇၵိုၵ်းၵၼ်တင်းႁၢၼ်ႉမႄးၶမ်း တီႈႁိမ်းၵျွင်းတေႃႇၵၢင်ဝဵင်းၼၼ်ႉ ၺႃးၵူၼ်းၶဝ်ႈတဝ်။ ၵူၺ်းၵႃႈ ၶူဝ်းၶွင်ၼႂ်းမၼ်းတႄႉ ဢမ်ႇလႆႈသင်ၵႂႃႇ။ ယွၼ်ႉၼႂ်းႁၢၼ်ႉၼၼ်ႉ ဢမ်ႇမီးသင်။ ၵူၼ်းလၵ်ႉၼၼ်ႉ ၶဝ်ထၢင်ႇမီးၶမ်းယူဝ်ႉ”- ဝႃႈၼႆ။

ၵူၼ်းပိုၼ်ႉတီႈတႄႉလၢတ်ႈဝႃႈ ဢၼ်ယႃႉႁၢၼ်ႉယႃႉႁိူၼ်းၶဝ်ႈသွၵ်ႈလၵ်ႉၶူဝ်းၼႆႉ လႅပ်ႈပဵၼ်ၵူၼ်းပိုၼ်ႉတီႈၶိုၼ်းၵူၺ်း။ ပေႃးပဵၼ်ၶႅၵ်ႇ / ၵူၼ်းတၢင်ႇတီႈ လႅပ်ႈတေဢမ်ႇၸၢင်ႈႁူႉဝႃႈႁိူၼ်းလႂ်ပဵၼ်သင် ၊ ထုၵ်ႇလီၶဝ်ႈလၵ်ႉႁိူၼ်းလႂ် ႁွင်ႈလႂ်ၸိူဝ်းၼႆႉ -ဝႃႈၼႆ။

“ၵူၼ်းလၵ်ႉၼၼ်ႉ မၼ်းဢမ်ႇၸႂ်ႈပိူၼ်ႈ ပဵၼ်ၵူၼ်းၼႂ်းပိုၼ်ႉတီႈ လၢင်းၶိူဝ်းၼႆႉ ၵမ်းလဵဝ်ယဝ်ႉ။ ပေႃးဢမ်ႇၸႂ်ႈၶဝ် ၽႂ်တေႁူႉၶေႃႈ မုလ်း ႁိူၼ်းလႂ် ႁၢၼ်ႉလႂ် မီးသင် ၶၢႆသင် ၸိူဝ်းၼႆႉ ၵူၼ်းပိုၼ်ႉတီႈၵူၺ်း တေႁူႉလီ မိူၼ်ၼင်ႇ ၵူၼ်းမႃးၶၢႆၶူဝ်း ၵူၼ်းတၢင်ႇတီႈ ပိူၼ်ႈဢမ်ႇႁူႉလေႃႇ”- ၵူၼ်းပိုၼ်ႉတီႈ ဝဵင်းလၢင်းၶိူဝ်း သိုပ်ႇလၢတ်ႈၼႄၼင်ႇၼႆ။

ပွႆးၶၢႆၶူဝ်းၵုၼ်ႇ တီႈဝဵင်းလၢင်းၶိူဝ်းၼႆႉ တႄႇၸတ်းႁဵတ်း ၼႂ်းဝၼ်းတီႈ 21-28/7/2023 ဢွင်ႈတီႈၸတ်းႁဵတ်းသမ်ႉ တီႈႁူင်း ၵၢၼ်ႁဵတ်းဢွၵ်ႇယႃႈၶၢၼ်းဝၢၼ် တၢင်းၶဝ်ႈဝဵင်း ပွၵ်ႉဝၢၼ်ႈလွႆ။ ၵူၼ်းမႃးၶၢႆၶူဝ်းတႄႉပဵၼ်ၵူၼ်းတၢင်ႇတီႈသီႇလႅၼ်။ လႅပ်ႈပဵၼ်ၸၢဝ်းမၢၼ်ႈၵမ်ႈၼမ်။ ၶူဝ်းၶွင်သမ်ႉပဵၼ်ၶူဝ်းၶွင်မိူင်းၶႄႇ မိူင်းမၢၼ်ႈ၊ ပဵၼ်ၶူဝ်းၼုင်ႈတင်းဝႆ ၶူဝ်းၶွင်ၵိၼ်ယမ်ႉလႄႈ တၢင်းလဵၼ်ႈလုၵ်ႈဢွၼ်ႇၸိူဝ်းၼႆႉ။

ၵၢင်လိူၼ်ၵျူႊလၢႆႊ ပူၼ်ႉမႃးၼႆႉ တီႈဝဵင်းမိူင်းပၼ်ႇၵေႃႈ ၸတ်းႁဵတ်းပွႆးၶၢႆၶူဝ်းၵုၼ်ႇ တီႈၼႂ်းဝၢင်းဝတ်ႉမူၺ်ႇတေႃႇ ၶၢဝ်းတၢင်း 10 ဝၼ်း ႁိူၼ်းယေး ၵူၼ်းဝၢၼ်ႈ ထုၵ်ႇၽူႈလၵ်ႉၸၵ်ႉၶုတ်ႈ သွၵ်ႈတဝ် ၼႂ်းႁိူၼ်းယေး မီးၵႂႃႇ 6 လင်ယဝ်ႉ။

ၵူၼ်းပိုၼ်ႉတီႈ ဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၽွင်းၶၢဝ်းပွႆးၶၢႆၶူဝ်းၵုၼ်ႇ တီႈဝဵင်းမိူင်းပၼ်ႇ 10 ဝၼ်းမႃး ၼႆႉ ႁိူၼ်း ယေး ၵူၼ်းဝၢၼ်ႈထုၵ်ႇၽူႈလၵ်ႉၵၼ်းၶိုၼ်ႈႁိူၼ်း ၼႂ်းဝဵင်းၵူၺ်းမီးၵႂႃႇမွၵ်ႈ 6 လင် ဝၢၼ်ႈၼွၵ်ႈၼႃးပၢင်ႇ 1 လင်။ တေလႆႈဝႃႈ ၽွင်းၶၢဝ်းပွႆးၶၢႆၶူဝ်းၵုၼ်ႇၼႆႉ ၽူႈလၵ်ႉၸၵ်ႉၶုတ်ႈ လိူင်ႇၼမ်ႁႅင်း ။ လွင်ႈၶူဝ်းၶွင်ႁိူၼ်းယေး လူႉသုမ်းၵႂႃႇသင်လၢႆလၢႆ တႄႉ ဢမ်ႇလႆႈႁူႉ ႁူဝ်ယွႆႈမၼ်း ”- ဝႃႈၼႆ။

ႁိူၼ်းယေး ၵူၼ်းဝၢၼ်ႈ တီႈဝဵင်းမိူင်းပၼ်ႇ ဢၼ်ထုၵ်ႇၽူႈလၵ်ႉၸၵ်ႉၶုတ်ႈ ၶိုၼ်ႈႁိူၼ်းၼၼ်ႉသမ်ႉ တေပဵၼ်တီႈ ပွၵ်ႉ ဢွၵ်ႇ၊ ပွၵ်ႉ တူၵ်း၊ ႁိမ်းၵၢတ်ႇလူင်လႄႈ ဝၢၼ်ႈၼမ်ႉတိုင်း ၸိူဝ်းၼႆႉ။

ယူႇတီႈ ပလိၵ်ႈသိုၵ်းမၢၼ်ႈတႄႉ ဢမ်ႇဢဝ်ပုၼ်ႈၽွၼ်း တူၺ်းထိုင်လွင်ႈႁူမ်ႇလူမ်ႈ ပၼ်ၵူၼ်းမိူင်းသင် ၵဵဝ်ႇၵပ်းလွင်ႈ ၼႆႉ ယူႇတီႈၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၼႂ်းပိုၼ်ႉတီႈ လႆႈဢဝ်ပုၼ်ႈၽွၼ်းသေ ၵူတ်ႇထတ်းတီႉၺွပ်းလႆႈ ၽူႈလၵ်ႉ ၸၵ်ႉၶုတ်ႈမႃး မီး လၢႆၵေႃႉယဝ်ႉ။

“ပလိၵ်ႈသိုၵ်းမၢၼ်ႈၶဝ် ဢမ်ႇႁဵတ်းသင်ပၼ်ၶႃႈ ယူႇတီႈ RCSS ဢဝ်ပုၼ်ႈၽွၼ်းသေ ၵူတ်ႇထတ်း တီႉၺွပ်းလႆႈမႃး ၵူၼ်းလၵ်ႉၼၼ်ႉ ယဝ်ႉၵေႃႈ ၵူတ်ႇထတ်းယဵဝ်ႈပႃးထႅင်ႈ ၽူႈလၵ်ႉၼၼ်ႉ သူႇသမ်းၵိၼ်ယႃႈမဝ်းၵမ်ပႃးထႅင်ႈၼႆၶႃႈ ယၢမ်းလဵဝ် RCSS တႄႉ ၵုမ်းတူဝ်ၵႂႃႇယဝ်ႉ” – ၵူၼ်းပိုၼ်ႉတီႈ ဝဵင်းမိူင်းပၼ်ႇ သိုပ်ႇလၢတ်ႈၼႄ ၼင်ႇၼႆ။

လိူဝ်ၼၼ်ႉ တီႈဝဵင်းပၢင်လူင်ၵေႃႈ တိုၵ်ႉၸတ်းႁဵတ်း ပွႆးၶၢႆၶူဝ်းၵုၼ်ႇၼႆႉ ၼိုင်ႈပွၵ်ႈလႂ် တေၸတ်းႁိုင် မွၵ်ႈ 2 ဝူင်ႈၼႆႉ ဝႃႈ ၼႆ။  

ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ၵႃႈၵွၼ်ႇပူၼ်ႉမႃးတႄႉ ပေႃးၶဝ်ပိုတ်ႇပွႆးၶၢႆၶူဝ်းၵုၼ်ႇၼႆ ရူတ်ႉၶိူင်ႈပိူၼ်ႈ တေၵႆႉႁၢႆၶႃႈဢေႃႈ ၽူႈလၵ်ႉၸၵ်ႉၶုတ်ႈတႄႉ မီးၼမ်ဢေႃႈ။ ပွၵ်ႈၼႆႉတႄႉ ပႆႇငိၼ်းဝႃႈႁိုဝ် လွင်ႈရူတ်ႉၶိူင်ႈႁၢႆၼႆႉ”- ဝႃႈၼႆ။

ယၢမ်းလဵဝ် တီႈဝဵင်းပၢင်လူင်ၼႆႉ ၸတ်းမႃး ပွႆးၶၢႆၶူဝ်းၵုၼ်ႇၼႆႉ မီးမွၵ်ႈ 5 ဝၼ်းယဝ်ႉ ၵမ်ႈၼမ် တေၶၢႆၶူဝ်းၵုၼ်ႇ မိူၼ်ၼင်ႇ ၶိူင်ႈၸႂ်ႉၼႂ်းႁိူၼ်းယေးလႄႈ ၶိူင်ႈလဵၼ်ႈလုၵ်ႈဢွၼ်ႇ ၸိူဝ်းၼႆႉ။