ဝၼ်းတီႈ 23/7/2023 သိုၵ်းမၢၼ်ႈယိုတ်းမိူင်း ၵိုင်ႉၵၢင်ႉပိုၼ်ၽၢဝ်ႇ ဝႃႈ​တေ ႁဵတ်းဢွၵ်ႇ ငိုၼ်းဝႂ်သွင်မိုၼ်ႇ( 20000) ပျႃး။

ပေႃးထိုင်မႃး ဝၼ်းတီႈ 31/7/2023 ၼႆႉ ယေးငိုၼ်းမိူင်းႁူမ်ႈတုမ် ဢၼ်သိုၵ်းမၢၼ်ႈယိုတ်းမိူင်း ၵုမ်းၵမ်ၼၼ်ႉ တေပိုၼ်ၽႄႈ ၶႅပ်းငိုၼ်းၸေႈ ဝႂ် 2 မိုၼ်ႇ ( 20000 ) ပျႃး။

ၵူၼ်းၼုမ်ႇၸဝ်ႈႁၢၼ်ႉၶၢႆၵုၼ်ႇ ယူႇဝဵင်း တူၼ်ႈတီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ႁၼ်ၶဝ်လၢတ်ႈတႄႉ တေႁဵတ်းဢွၵ်ႇတႃႇပဵၼ်တီႈမၢႆတွင်းၵူၺ်းၼႆၼႃႇ။လႅပ်ႈတေဢမ်ႇပေႃးႁဵတ်းဢွၵ်ႇၼမ်။ၽွၼ်းယွၼ်ႈမၼ်းတႄႉၵေႃႈ မိူၼ်ႁူႉၵၼ်ဝႆႉယူႇယဝ်ႉ ။ ပၢႆလိူဝ်ဝၢၼ်ႈမိူင်းဢမ်ႇၼိမ်သဝ်း ၶၼ်ၵုၼ်ႇၵေႃႈသုင် ၶၼ်ငိုၼ်းမိူင်းမၢၼ်ႈ တူၵ်းယဝ်ႉတူၵ်းထႅင်ႈၼၼ်ႉၼႃႇ ” – ဝႃႈၼႆ။

ၵၢၼ်ႁဵတ်းဢွၵ်ႇငိုၼ်း​ၸေႈမၢင်မႂ်ႇပွၵ်ႈၵမ်းၼႆႉ မီးလွင်ႈတတ်းမၵ်းႁူဝ်ၼပ်ႉမၼ်းဝႆႉသေ တေပဵၼ်ၵၢၼ်လႅၵ်ႈပၼ်ငိုၼ်းဢၼ်ၵဝ်ႇသဝ်ႈ လႄႈ ငိုၼ်းဢၼ်ဢမ်ႇၸၢင်ႈၸႂ်ႉတိုဝ်းလႆႈၸိူဝ်းၼၼ်ႉၼႆယဝ်ႉ။

ၵူၼ်းၼုမ်ႇၸဝ်ႈႁၢၼ်ႉၶၢႆၵုၼ်ႇ ၼၼ်ႉသိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ မၼ်းပဵၼ်လၢႆးသိုၵ်းမၢၼ်ႈၶဝ်ႁဵတ်းမိူဝ်ႈၵွၼ်ႇ။ မိူၼ်ၼင်ႇပၢၼ် ၼဢၽ ၼဝတ ၶဝ်ၸိူဝ်းၼၼ်ႉယဝ်ႉၼႆႉ။ ႁဵတ်းႁၢင်ႈၸၢင်ႉၽိူၵ်ႇဢွၵ်ႇမႃးသေ လၢတ်ႈဝႃႈ ဝၢၼ်ႈမိူင်းၵတ်းယဵၼ်လီယဝ်ႉဢိူဝ်ႈ ။ ၾိင်ႈၾႃႉရႃႇသီႇလီမႃးဢိူဝ်ႈ မီးၶုၼ်လီၶုၼ်ငၢမ်းၶိုၼ်ႈမႃးလႄႈ ၸၢင်ႉၽိူၵ်ႇမီးမႃးဢိူဝ်ႈ သင်ဢိူဝ်ႈၼႆၼၼ်ႉၼႃႇ။ လၢႆးၶဝ်ယွၵ်ႇၸႂ်ၵူၼ်းမိူင်း။ၵူၺ်းၼႃႇ ၵူၼ်းမိူင်းတႄႉ မၼ်းဢမ်ႇငိူဝ်ႈမိူၼ်ၼင်ႇၶဝ်ဝူၼ်ႉဝႆႉ မိူၼ်ၵူႈပွၵ်ႈၼၼ်ႉယဝ်ႉၼႃႇ ။ႁူႉယူႇဝႃႈၶဝ် ၶႂ်ႈၵႂႃႇလၢႆးလႂ် ဢၼ်ဝႃႈၼၼ်ႉ ” – ဝႃႈၼႆ။

ငိုၼ်းဝႂ် 2 မိုၼ်ႇပျႃးၼႆႉ တၢင်းယၢဝ်းမီး 15 သိၼ်ႊတီႊမီႊတိူဝ်ႊ တၢင်းၵႂၢင်ႈမီး 7 သိၼ်ႊတီႊမီႊတိူဝ်ႊ ပဵၼ်ဝႂ်သီၶဵဝ်ၼုမ်ႇဝႆႉ။ၾၢႆႇၼႃႈ မီးႁၢင်ႈၸၢင်ႉၽိူၵ်ႇသေ ၾၢႆႇလင် မီးႁၢင်ႈ ၶူဝ်ၶၢမ်ႈၸႄႈၵႅင်းလႄႈ ၶူဝ်ၶၢမ်ႈဢေႇရႃႇဝတီႇ။

ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉထႅင်ႈဝႃႈ ၵၢၼ်ႁဵတ်းဢွၵ်ႇငိုၼ်းပွၵ်ႈၼႆႉ တႃႇပဵၼ်တီႈမၢႆတွင်း ဢၼ်မိၼ်းဢွင်ႇလႅင်ႇ ဢဵၼ်းဢၢၼ်းတႃႇ ဝၢၼ်ႈမိူင်းၵတ်းယဵၼ်သေ သၢင်ႈဝႆႉ ႁုၼ်ႇႁၢင်ႈၽြႃးမႃႇရႃႉဝိၸယ လႄႈ ႁုၼ်ႇႁၢင်ႈၸၢင်ႉၽိူၵ်ႇ ရထၼၼ်ႇတၵ ၶွပ်ႈၶူပ်ႇ ၼိုင်ႈပီၼၼ်ႉ ဝႃႈၼႆဝႆႉ။

ဢိင်ၼိူဝ်ငိုၼ်းမၢင်မႂ်ႇၼႆႉ​သေ ၵူၼ်းမိူင်းတႆး​တႄႉမႆႈၸႂ်ဝႃး ၵူဝ်ၶၼ်ၵုၼ်ႇသိုပ်ႇၶိုၼ်ႈထႅင်ႈ ၵူဝ်ၶၼ်ငိုၼ်းမၢၼ်ႈ တူၵ်းယဝ်ႉတူၵ်းထႅင်ႈၵူၺ်းယဝ်ႉ ၼႆယူႇ။