သိုၵ်းမၢၼ်ႈ ယိုတ်းမိူင်း သင်ႇ SSPP/ SSA ထွႆဢွၵ်ႇ ၸႄႈဝဵင်းလၢႆးၶႃႈ လိူၼ်လဵဝ် မီး 3 ပွၵ်ႈယဝ်ႉ ၾၢႆႇ SSPP ဢမ်ႇထွႆလႄႈ တင်းသွင်ၾၢႆႇ လႆႈၶဵင်ႈၶႅင်ၵၢၼ်သိုၵ်းၵၼ်မႃး မီးၶၢဝ်းတၢင်းမွၵ်ႈလိူၼ်ယဝ်ႉ။

ပူၼ်ႉမႃး ဝၼ်းတီႈ 28/6/2023 ၼၼ်ႉ ၶွင်ႇသီႇသိုၵ်းမၢၼ်ႈ ယိုတ်းမိူင်း သင်ႇႁႂ်ႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ထွႆဢွၵ်ႇ သဵၼ်ႈတၢင်းလူင် ၾၢႆႇႁွင်ႇတၢင်းၵႃး တႄႇဢဝ် လွႆလႅမ် – ပၢင်လူင် – လၢႆးၶႃႈ – မိူင်းၼွင် ၸိူဝ်းၼႆႉ  တင်းမူတ်း ယွၼ်ႉပိုၼ်ႉတီႈ ၸိူဝ်းၼၼ်ႉ ပဵၼ်ပိုၼ်ႉတီႈလမ်ႇလွင်ႈ ႁူမ်ႇလူမ်ႈတႃႇၾၢႆႇၸၢၼ်း ငဝ်ႈငုၼ်း SSPP ၼႆယဝ်ႉ။

ၽူႈတူင်ႉၼိုင် ၵၢၼ်သိုၵ်း ပွတ်းထုင်ႉလၢႆးၶႃး လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်သိုၵ်းမၢၼ်ႈ ၸႂ်ႉထွႆၼႆႉ ၼႂ်းလိူၼ် ၵျုၼ်ႊ ၵူၺ်း မီးမႃး 3 ပွၵ်ႈ ။ ၾၢႆႇ SSPP တႄႉတေပႆႇၸၢင်ႈထွႆ ဢွင်ႈတီႈၸိူဝ်းၼၼ်ႉ ယွၼ်ႉမၼ်းပဵၼ် ၵၢၼ်ႁူမ်ႇလူမ်ႈ လွင်ႈယႂ်ႇ တႃႇၾၢႆႇၸၢၼ်းငဝ်ႈငုၼ်းဝၢၼ်ႈႁႆး ။ ဝၢႆးၶဝ် ၸႂ်ႉထွႆယဝ်ႉ SSPP ဢမ်ႇထွႆလႄႈ ၶဝ်သူင်ႇႁႅင်းသိုၵ်းဢိူမ်ႈ ၸမ်မႃး မွၵ်ႈဢဵၼ်ႁႅင်း 500 ၼႆႉ။ တေႃႇထိုင်ယၢမ်းလဵဝ် တိုၵ်ႉဢိူမ်ႈၸမ်ငႃၵၼ်ဝႆႉယူႇ ၾၢႆႇမၢၼ်ႈၵေႃႈပႆႇထွႆ”- ဝႃႈၼႆ။

ယၢမ်းလဵဝ် သိုၵ်းမၢၼ်ႈ ယိုတ်းမိူင်း ဢၼ်ဢိူမ်ႈၸမ် ၶဵင်ႈၶႅင်ၵၼ်တင်း သိုၵ်း SSPP/ SSA ၼႂ်းၸႄႈဝဵင်းလၢႆးၶႃႈၼႆႉ တေ ပဵၼ်ၾၢႆႇၸဵင်ႇၸၢၼ်းဝၼ်းဢွၵ်ႇ သၼ်လွႆၶႄႇလႄႈ ၾၢႆႇၸၢၼ်းဝဵင်းလၢႆးၶႃႈ ၸိူဝ်းၼႆႉ။ ဢွင်ႈတီႈ ဢၼ်ၶဝ်တမ်းဝႆႉ တပ်ႉၵွင်ႈ လူင်ၶဝ်ၼၼ်ႉသမ်ႉ တေပဵၼ်တီႈဝၢၼ်ႈႁၢတ်ႇလီႈ။

“သိုၵ်းမၢၼ်ႈ ဢၼ်မႃးတူင်ႉၼိုင် ဢိူမ်ႈၸမ် SSPP တၢင်းထုင်ႉလၢႆးၶႃႈၼႆႉ တေပဵၼ်သိုၵ်းမၢၼ်ႈ တႂ်ႈတိူင်းသိုၵ်းၶူဝ်လမ် မူတ်း မူတ်း ။ ဢၼ်ၶဝ်မႃးဢိူမ်ႈၸမ်တပ်ႉ SSPP ၼႆႉ မၢင်တီႈ ၶဝ်မီးဢဵၼ်ႁႅင်း ၼပ်ႉပၢၵ်ႇ၊ မၢင်တီႈ မီးဢဵၼ် ႁႅင်း 20 – 30 ၸိူဝ်းၼႆႉ။ ၵွင်ႈလူင်ၶဝ်တႄႉ တင်ႈဝႆႉတီႈဝၢၼ်ႈႁၢတ်ႇလီႈ ဝၢႆႇၼႃႈၸူးတပ်ႉ SSPP တီႈဝၢၼ်ႈၼႃးမၢင်းဝႆႉ ”- ၽူႈတူင်ႉၼိုင် ၵၢၼ်သိုၵ်း ပွတ်းထုင်ႉလၢႆးၶႃး သိုပ်ႇလၢတ်ႈၼႄၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 28/6/2023 ယၢမ်းၵၢင်ၼႂ်မွၵ်ႈ 10 မူင်းၶိုင်ႈ ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း လမ်း ၼိုင်ႈ မႃးပၼ်ႇလဵပ်ႈႁႃ ဢွင်ႈတီႈတပ်ႉသိုၵ်း SSPP/ SSA ဢၼ်တူင်ႉၼိုင် ပၵ်းယူႇဝႆႉ တၢင်းၾၢႆႇဢွၵ်ႇဝဵင်းလၢႆး ၶႃႈ ၸိူဝ်းၼႆႉ။

ဢၼ်သိုၵ်းမၢၼ်ႈ သင်ႇႁႂ်ႈ SSPP/SSA ထွႆဢွၵ်ႇပိုၼ်ႉတီႈ ၸိူဝ်းၼႆႉ မိူဝ်ႈပီ 2022 ပူၼ်ႉမႃးၵေႃႈၼၼ်ႉ ၶဝ်ၸႂ်ႉထွႆ မီး 3 ပွၵ်ႈ ယဝ်ႉ။ ပီ 2023 ၼႂ်းလိူၼ်ၵျုၼ်ႊပူၼ်ႉမႃးၼႆႉ ၶဝ်သင်ႇႁႂ်ႈထွႆဢွၵ်ႇထႅင်ႈ မီး 3 ပွၵ်ႈယဝ်ႉ။

တႄႇဢဝ် ဝၼ်းတီႈ 11/4/2023 ၼၼ်ႉမႃး သိုၵ်း SSPP တင်း RCSS ပိုတ်းယိုဝ်းၵၼ်မႃး ႁၢဝ်ႈႁႅင်းတၢင်းၾၢႆႇဢွၵ်ႇဝဵင်း လၢႆးၶႃႈသေ ႁဵတ်းႁႂ်ႈၵူၼ်းပိုၼ်ႉတီႈ ၼႂ်းဢိူင်ႇဝၢၼ်ႈၸေႈ၊ ဢိူင်ႇႁၢႆးသႅင်၊ ဢိူင်ႇဝၢၼ်ႈပၢင်ႇ၊ ဢိူင်ႇပၢင်သၢင်း၊ ဢိူင်ႇဝၢၼ်ႈထီႇ၊ ဢိူင်ႇၼွင်ၵေႃႈလႄႈ ဢိူင်ႇၼႃးပွႆး ၸိူဝ်းၼႆႉ ႁူဝ်ၵူၼ်းဢမ်ႇယွမ်းႁဵင် လႆႈဢွၵ်ႇပၢႆႈသွၼ်ႈၸွမ်းဝတ်ႉဝႃးမုၼ် ၸဝ်ႈလႄႈ ႁိူၼ်း ယေး ပီႈၼွင်ႉၽႂ်မၼ်း ၼႂ်းဝဵင်း ၼႆယဝ်ႉ။