သိုၵ်းမၢၼ်ႈတင်ႈၸႂ် ပွႆႇမၢၵ်ႇသႂ်ႇ ပၢင်သဝ်းၵူၼ်းပၢႆႈၽေးတီႈမိူင်းယၢင်းလႅင် မီးၵူၼ်းမၢတ်ႇၸဵပ်း 3 ၵေႃႉ။
မိူဝ်ႈဝၼ်းတီႈ 4 ၼႂ်းလိူၼ်ၵျူႊလၢႆႊ ယၢမ်းႁူဝ်ၼႂ်ၸဝ်ႉ 2 မူင်း သိုၵ်းမၢၼ်ႈ တင်ႈၸႂ် ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ပၢင်သဝ်း ၵူၼ်းပၢႆႈၽေး ဢၼ်မီးဝႆႉ တၢင်းတူၵ်းၸႄႈဝဵင်းတီႇမေႃးသူဝ်ႇ မိူင်းယၢင်းလႅင် မီးၵူၼ်းမၢတ်ႇၸဵပ်း 3 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇၵေႃႉၼိုင်ႈ။
ၵူၼ်းပိုၼ်ႉတီႈၼႂ်းၸႄႈမိူင်းယၢင်းလႅင်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မွၵ်ႈၵၢင်ၼႂ်ၸဝ်ႉ 2 မူင်းၼႆႉ သိုၵ်းမၢၼ်ႈ ဢဝ်မၢၵ်ႇမႃးပွႆႇ။ ပဵၼ်ၶိင်ႇပိူၼ်ႈ ၼွၼ်းလပ်း။ ၶဝ်ထၢင်ႇမီး ၸုမ်းသိုၵ်း PDF ။ တီႈတေႉမၼ်း တီႈၼႆၼႆႉ မီးၵူၼ်းပၢႆႈ ၽေးသိုၵ်းၵူၺ်း ။ ဢၼ်ၸဵပ်းမၢတ်ႇၼႆႉ ပဵၼ်ပေႃႈမႄႈလုၵ်ႈ 3 ၵေႃႉ ၊ လုၵ်ႈဢွၼ်ႇတိုၵ်ႉမီးဢႃယု 3 ပီ ၼႆႉၵူၺ်း ။ ပၢႆႈ ဢမ်ႇတၼ်းလွတ်ႈ ” – ဝႃႈၼႆ။
လိူဝ်သေမီးၵူၼ်းမၢတ်ႇၸဵပ်းယဝ်ႉ မိူၼ်ၼင်ႇ သုမ်ႉၵူၼ်းပၢႆႈၽေး လႄႈ ႁွင်ႈႁဵၼ်းလုၵ်ႈဢွၼ်ႇ ၸိူဝ်းၼႆႉ လူႉၵွႆပႃး။မိူဝ်ႈလဵဝ် ၵူၼ်းပၢႆႈၽေး လႆႈၶၢႆႉပၢႆႈ ယူႇဝႆႉတီႈလွတ်ႈၽေးဝႆႉ ၼႆယဝ်ႉ။
ၵူၼ်းပိုၼ်ႉတီႈၼႂ်းၸႄႈမိူင်းယၢင်းလႅင်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ သုမ်ႉၵူၼ်းပၢႆႈၽေးၼႆႉ မီးဝႆႉမွၵ်ႈ 50 ။ၵမ်ႈၽွင်ႈၵေႃႈ ဢွၼ်ၵၼ်ပၢႆႈၼႂ်းထိူၼ်ႇၼႂ်းၶိူဝ်း ၵမ်ႈၽွင်ႈၵေႃႈ ဢမ်ႇႁူႉတေပၢႆႈယူႇလႂ် ၵႂင်ဝႆႉယူႇၵေႃႈမီး ။မၢင်ၸိူဝ်းၵေႃႈ ပၢႆႈႁႃပီႈႁႃၼွင်ႉ ” – ဝႃႈၼႆ။
ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် တိုၵ်းတေႃးတေႃႇ ၸုမ်းယိပ်းၵွင်ႈၵၢင်ႇ ဢၼ်ၶတ်းသၢၼ်ၸိူဝ်းၼၼ်ႉ ၼႂ်းၶၢဝ်းတၢင်း 28 လိူၼ်ၼႆႉ ဢမ်ႇယွမ်း 436 ပွၵ်ႈသေ ၵူၼ်းမိူင်းၽၵ်ၵႃ လူႉတၢႆ 462 ၵေႃႉၼႆ ၸုမ်း PKPF ပိုၼ်ၽၢဝ်ႇဝႆႉ မိူဝ်ႈဝၼ်းတီႈ 1 လိူၼ်ၵျုၼ်ႊၼၼ်ႉ ၼင်ႇၼႆ။
