မိူဝ်ႈဝၼ်းၽတ်း ပူၼ့်မႃးၼႆ့ ပူႇလၢၼ် သွင်ၵေႃ့ ၵႂႃႇၼႃး ၵႂႃႇၺႃးမၢၵ်ႇတႅၵ်ႇသႂ်ႇ ၊ ၵေႃ့ပဵၼ်လၢၼ်မၢတ်ႇၸဵပ်းႁႅင်း လႆႈႁၢမ် သူင်ႇႁူင်းယႃ ။
ပဵၼ်ၵႂႃႇမိူဝ်ႈ ဝၼ်းတီႈ 29 လိူၼ်ၵျုၼ်ႊ ယၢမ်းၵၢင်ၼႂ် မွၵ်ႈ 10 မူင်း ၊ တီႈ ၼႂ်းဢိူင်ႇၼမ့်ၽၵ်းၵႃ ၸႄႈဝဵင်းၵူတ့်ၶၢႆ ။
ၵေႃ့ပဵၼ်လၢၼ် မီးဢႃယု 9 ၶူပ်ႇ၊ မၢတ်ႇၸဵပ်း တီႈတွင့် ၊ တိၼ်လႄႈ မိုဝ်းၸိူဝ်းၼႆ့ ႁၢဝ်ႈႁႅင်း လႆႈသူင်ႇႁူင်းယႃ တီႈလႃႈသဵဝ်ႈဝႆ့ ၼႆယဝ့် ။
ဝၼ်းၼၼ့် ပူႇလၢၼ် သွင်ၵေႃ့ ၵႂႃႇၼႂ်းၼႃး ၊ ၵေႃ့ပဵၼ်လၢၼ် ၵႂႃႇယိပ်းမႅၼ်ႈထူင်လမ်ဢၼ်ၼိုင်ႈ တႅၵ်ႇၽူင့်မၢတ်ႇ ၸဵပ်းႁႅင်း။
တီႈပဵၼ်မၢၵ်ႇတႅၵ်ႇၼၼ့် မိူဝ်ႈပီ 2022 ၸုမ်းယိပ်းၵွင်ႈၼင်ႇၵၼ် ပဵၼ်ပၢင်တိုၵ်း ၵၼ်မႃးႁၢဝ်ႈႁႅင်း ၊ လႅပ်ႈတေပဵၼ် မၢၵ်ႇဢၼ်ၵိုတ်းၶင့်ဝႆ့ ၸဵမ်မိူဝ်ႈပၢင်တိုၵ်းၼၼ့်ၼႆ ၵူၼ်းမိူင်းပိုၼ်ႉတီႈၵေႃ့ၼိုင်ႈ လၢတ်ႈ။
ၼႂ်းပိုၼ့်တီႈၼၼ့် မီးဝႆ့ ၸုမ်းယိပ်းၵွင်ႈၵၢင်ႇ မိူၼ်ၼင်ႇ ၸုမ်းသိုၵ်းတႆး SSPP ၊ ၸုမ်းသိုၵ်းတဢၢင်း TNLA ၊ ၸုမ်း သိုၵ်းၶၢင် KIA ၊ သိုၵ်းၵဝ်ႈၵၢင့် MNDAA ၊ သိုၵ်းမၢၼ်ႈယိုတ်းမိူင်း လႄႈ ၸုမ်းသိုၵ်း ပျီႇတူ့သိတ့် တူင့်ၼိုင်ၵႂႃႇမႃးဝႆ့ ။
မိူဝ်ႈဝၼ်းတီႈ 19 လိူၼ်ၵျုၼ်ႊၼႆ့ၵေႃႈ မၢၵ်ႇတႅၵ်ႇၼႂ်းၵႄႈ ဝဵင်းၼမ့်တူႈ – မၢၼ်ႈတူင်ႈ ၵူၼ်းၸၢႆးၵေႃႉၼိုင်ႈ မၢတ်ႇၸဵပ်း ၼႆယဝ့် ။
ၸွမ်းၼင်ႇ ၸုမ်းၶူၼ့်ၶႂႃ့ပႂ့်တူၺ်း ငဝ်းလၢႆးမၢၵ်ႇၾင်လိၼ်မိူင်းမၢၼ်ႈ ႁၢႆးငၢၼ်းဝႆ့ မိူဝ်ႈပီ 2020 ၼၼ့် – ၼႂ်းမိူင်းမၢၼ်ႈ ယွၼ့်မၢၵ်ႇမႅင်းၾင်လိၼ်၊ ၶိူင်ႈမၢၵ်ႇမိုဝ့်ၸိုၼ်းယၢမ်း ဢၼ်ၵိုတ်းၶင့်ၼႂ်းပၢင်တိုၵ်းသေ မီးၵူၼ်းမၢတ်ႇၸဵပ်းလူ့တၢႆ 368 လိူင်ႈ ၊ ၼႂ်းၼၼ့် မိူင်းတႆးၼႆ့ ပဵၼ်ဢၼ်ၼမ်သုတ်းယဝ့်သေ ပဵၼ်ၵႂႃႇ 121 လိူင်ႈ ။
