ၵူၼ်းလူင်ၽိတ်းၵၼ် သမ်ႉႁဵတ်းႁၢႆႉလုၵ်ႈဢွၼ်ႇထိုင်တၢႆ

ၵူၼ်းယူႇႁိမ်းၵိၼ်ၸမ်ၵၼ် ၽိတ်းမေႃးၵၼ် ဢမ်ႇႁၢၼ်ႉၸႂ်ၵၼ်သေ လုၵ်ႉလွမ်ႁဵတ်းႁၢႆႉတေႃႇလုၵ်ႈဢွၼ်ႇၵၼ် ထိုင်တၢႆ။

မိူဝ်ႈဝၼ်းတီႈ 28/6/2023 ယၢမ်းႁူဝ်ၶမ်ႈၼၼ်ႉ ၵူၼ်းဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း သွင်ႁိူၼ်းယူႇၸမ်ၵၼ် ၽိတ်းမေႃးၵၼ် ၊ ဢၼ်ႇႁၢၼ်ႉၸႂ်ၼိူဝ်ၵၼ်သေ လၵ်ႉလွမ်ႁဵတ်းႁၢႆႉတေႃႇလုၵ်ႈဢွၼ်ႇၵၼ် ပၢတ်ႇၶေႃးလုၵ်ႈဢွၼ်ႇ ထိုင်တၢႆ။

ၵူၼ်းတႃႈၶီႈလဵၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ  – “  ၶႃယူႇႁိမ်းၵိၼ်ၸမ်ၵၼ် ။ ၵေႃႉၼိုင်ႈ ၽဝ်ယုၵ်းယၢၵ်း တၢင်းၼႃႈႁိူၼ်း။ ၼၢႆးထႅင်ႈႁိူၼ်းၼိုင်ႈသမ်ႉဝႃႈမဵၼ်ၵႂၼ်းၾႆးၼႆသေ ထိုင်တီႈထဵင်မေႃးၽိတ်းၵၼ်တင်းႁိုင်။  ၽွင်း ၼၼ်ႉ လုၵ်ႈဢွၼ်ႇၶႃလဵၼ်ႈၵေႃႉၵၼ်ယူႇတၢင်းၼႃႈႁိူၼ်း။ ၵေႃႉပဵၼ်ၽူဝ် ၼၢႆးၽဝ်ယုၵ်းယၢၵ်းၼၼ်ႉ ယိပ်းၶဵဝ်း ဢွၵ်ႇမႃးပၢတ်ႇၶေႃးလုၵ်ႈဢွၼ်ႇၵူၼ်းႁိမ်းႁိူၼ်းၼၼ်ႉ ၶဝ်ႈလိုၵ်ႈမွၵ်ႈ 2 ၼိဝ်ႉ။ လိူတ်ႈဢွၵ်ႇၼမ်သေ လုၵ်ႈဢွၼ်ႇလဵၵ်ႉ တၢႆ”- ဝႃႈၼႆ။

လုၵ်ႈဢွၼ်ႇ ဢၼ်ၺႃးၶဵဝ်းပၢတ်ႇၶေႃးတၢႆထင်တီႈၼႆႉ ၸိုဝ်ႈ ဢေးဢေးၶၢႆႇ ဢႃယု 5 ၶူပ်ႇ ပဵၼ်လုၵ်ႈယိင်း ပႃႈဢႃးပ (ၵူၼ်းႁိမ်းႁိူၼ်းဢၼ်မဵၼ်ၵႂၼ်း)။ ၽူႈၸၢႆးၵေႃႉပူၼ်ႉပႅၼ်ပၢတ်ႇၶေႃးလုၵ်ႈဢွၼ်ႇ ၸိုဝ်ႈ လုင်းၵျပူၵ်ႉ ဢႃယု 54 ပီ ပဵၼ်ၽူဝ် ပႃႈၼႃႇတေႃး (ၵေႃႉၽဝ်ယုၵ်းယၢၵ်းၼႃႈႁိူၼ်း) ။ တင်းသွင်ႁိူၼ်းၼႆႉ ပဵၼ်ၸၢဝ်းလႃးႁူႇၼင်ႇၵၼ်။

ၵူၼ်းတႃႈၶီႈလဵၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ လုၵ်ႈဢွၼ်ႇၼၼ်ႉ ၵႂႃႇတၢႆတီႈ ႁူင်းယႃ။ လုင်းၵျပူၵ်ႉဢၼ် ပၢတ်ႇၶေႃးလုၵ်ႈဢွၼ်ႇၼၼ်ႉ ပၢႆႈဝႆႉ – ပလိၵ်ႈ ပႆႇတီႉၺွပ်းလႆႈ ။  တေၶိုင်ၵၢၼ်မၼ်းၸိူင်ႉႁိုဝ်တႄႉ ပႆႇႁူႉ။  ၵမ်ႈၼမ် ဢၼ်ပူၼ်ႉပႅၼ်ၸိူင်ႉၼႆတႄႉ လႅပ်ႈတေပဵၼ်ၵူၼ်းမဝ်းလဝ်ႈမဝ်းယႃႈ ” – ဝႃႈၼႆ။

ၼႂ်းလိူၼ်ၵျုၼ်ႊၼႆႉၵူၺ်းၼင်ႇၵဝ်ႇ မိူဝ်ႈဝၼ်းတီႈ 12 ၼၼ်ႉ ၵူၼ်းၸၢႆးၵေႃႉၼိုင်ႈ တီႈဝၢၼ်ႈပၢင်လိၼ် ဢိူင်ႇမိူင်းၶွၼ် ၸႄႈဝဵင်းၵဵင်းတုင် ၶႃႈႁႅမ်ၵေႃႉပဵၼ်မႄႈမၼ်းတၢႆ ၼႂ်းႁိူၼ်း။

ၼႂ်းဝၼ်းမိူဝ်ႈၼႆႉ မိူင်းတႆးပတ်းပိုၼ်ႉ ယႃႈမဝ်းၵမ်လိူင်ႇၽႄႈႁႅင်း မၢင်ဢိူင်ႇမၢင်ဝၢၼ်ႈ မီးငိုၼ်းမၢၼ်ႈ 4-5 ပၢၵ်ႇၵူၺ်းၵေႃႈ သိုဝ်ႉၵိၼ်ယႃႈမႃႉလႆႈ ႁဵတ်းႁႂ်ႈ ၵူၼ်းၼုမ်ႇဢိၵ်ႇထဝ်ႈ ၼႂ်းဝၢၼ်ႈၼႂ်းဝဵင်း တိတ်းၸပ်းယိၼ်ႉယႃႈမဝ်းၵမ်။မၢင်ၵေႃႉ ထိုင်တီႈ ယွင်ႇမႃႈ ဢမ်ႇႁူႉပီႈႁူႉၼွင်ႉ ၶႃႈႁႅမ် ပေႃႈမႄႈပီႈၼွင်ႉၸိူဝ်ႉၶိူဝ်းတူဝ်ၵဝ်ႇၵေႃႈ မီးမႃးၼမ်။