မိူဝ်ႈၼႆႉ ဝၼ်းတီႈ 29/6/2023 ၶၼ်ငိုၼ်းၶႄႇ ပုင်ႈၶိုၼ်ႈႁႅင်း 100 ယႂၼ် လႆႈငိုၼ်းမၢၼ်ႈ 43,500 ပျႃး ပဵၼ်ၶၼ်လႅၵ်ႈ ၼႂ်းပိုၼ်ႉတီႈ ဝဵင်းမူႇၸေႊ လႅၼ်လိၼ်တႆး – ၶႄႇ ၸိုင်ႈတႆးပွတ်းႁွင်ႇ။
ၵူၼ်းလႅၵ်ႈငိုၼ်း တီႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ငိုၼ်းၶႄႇပုင်ႈၶိုၼ်ႈႁႅင်း 100 ယႂၼ် လႆႈငိုၼ်းမၢၼ်ႈ 43,500 ပျႃး။ မိူဝ်ႈဝႃးသမ်ႉ မီး 43,000 ပျႃး။ ယဝ်ႉၵေႃႈ ၶၼ်ၶူဝ်းၵုၼ်ႇၸိူဝ်းၼႆႉၵေႃႈ ပုင်ႈၶိုၼ်ႈၸွမ်းမူတ်း။ ယွၼ်ႉပၼ်ႁႃ ၵၢၼ်မိူင်း ၼႂ်းမိူင်းႁဝ်းသုၵ်ႉယုင်ႈၵေႃႈ တေပႃး။ ယွၼ်ႉမိူင်းဝၼ်းတူၵ်းၶဝ် ပိၵ်ႉဢိုတ်းပႅတ်ႈယေးငိုၼ်း ၶွင်မိူင်းမၢၼ်ႈၼႆႉၵေႃႈ တေပႃးဢေႃႈ ၵွပ်ႈၼႆလႄႈ ၶၼ်ငိုၼ်းၼႆႉ ၸင်ႇပုင်ႈၶိုၼ်ႈၸိူင်ႉၼႆ”- ဝႃႈၼႆ။
တႄႇဢဝ် ဝၼ်းတီႈ 1/6/2023 ၼၼ်ႉမႃး ငိုၼ်းၶႄႇ 100 ယႂၼ် လႆႈငိုၼ်းမၢၼ်ႈ 41,200 ပျႃး – 41,800 ပျႃး။ ထိုင်မႃး ႁၢင် လိူၼ်ၵျုၼ်ႊၼႆႉသမ်ႉ ပုင်ႈၶိုၼ်ႈထိုင် 43,000 ပျႃး – 43,500 ပျႃး ။ တေလႆႈဝႃႈ ငိုၼ်းၶႄႇ 100 ယႂၼ် ပုင်ႈၶိုၼ်ႈမႃးထႅင်ႈ 20,000 ပျႃးပၢႆ ၼႆႉပဵၼ်ၶၼ်လႅၵ်ႈငိုၼ်းၶႄႇ ၼႂ်းပိုၼ်ႉတီႈ ဝဵင်းမူႇၸေႊ။
ယွၼ်ႉၶၼ်ငိုၼ်းၶႄႇ ပုင်ႈၶိုၼ်ႈၸိူင်ႉၼႆသေ ၸဵမ်ၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉ၊ ၶိူင်ႈၵေႃႇသၢင်ႈ ၸိူဝ်းၼႆႉ ပုင်ႈၶိုၼ်ႈမူတ်း ယွၼ်ႉၶူဝ်းၵုၼ်ႇၸိူဝ်းၼႆႉသမ်ႉ လႆႈသိုဝ်ႉတၢင်းၾင်ႇမိူင်းၶႄႇ ၶဝ်ႈမႃးၶၢႆ။
ၵူၼ်းၵႃႉၶၢႆၶူဝ်းၵုၼ်ႇ တီႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉငိုၼ်းၶႄႇၼႆႉၶိုၼ်ႈသေ တုမ်ႉတိူဝ်ႉႁဝ်းၶႃႈ ၸဝ်ႈၶွင်ၶၢႆ ၶူဝ်းၵုၼ်ႈၼႆႉ တႄႉတႄႉဝႃႈဝႃႈၶႃႈယဝ်ႉ။ ႁဝ်းၶႃႈ ၶၢႆၶိူင်ႈၵေႃႇသၢင်ႈႁိူၼ်း လႆႈဢဝ်ၶူဝ်းၵုၼ်ႇတၢင်းမိူင်းၶႄႇ ၼၼ်ႉ တေႃႉမႃးၶၢႆ လႄႈ ပေႃးဝႃႈ ၶၼ်ငိုၼ်းၶႄႇၶိုၼ်ႈၵေႃႈ ၶူဝ်းၵုၼ်ႇၼႆႉ ႁူႉၵႃႈလႆႈၶိုၼ်ႈၸွမ်းယဝ်ႉ ပေႃးႁဝ်းၶႃႈ ဢမ်ႇၶိုၼ်ႈၸွမ်းၼႆ တေၶိုၼ်း မႄးသိုဝ်ႉ ၵႃႈၶၼ်ၵဝ်ႇၶိုၼ်းၼၼ်ႉ မၼ်းတေဢမ်ႇလႆႈယဝ်ႉ”- ဝႃႈၼႆ။
မိူၼ်ၼင်ႇ ၶွင်ၵိၼ်ယႅမ်ႉ ဢၼ်တေႃႉဢဝ်တၢင်းမိူင်းၶႄႇ ၸိူဝ်းၼၼ်ႉမႃးၶၢႆၵေႃႈ ၵႃႈၶၼ်မၼ်း ပုင်ႈၶိုၼ်ႈ မိူၼ်ၵၼ် ယၢမ်းလဵဝ် ၵေႃႇၾီႇ မိၵ်ႈသၼ်းတေး၊ သူႇပႃႇ ၸိူဝ်းၼႆႉ ၵူႈပွၵ်ႈ 1 ထုပ်ႉ 9,500 ပျႃး။ ယၢမ်းလဵဝ် 10,000 ပၢႆယဝ်ႉ။
ဢိင်ၼိူဝ် လွင်ႈၶၼ်ငိုၼ်းၶႄႇ – တေႃႇလႃႇ ပုင်ႈၶိုၼ်ႈၸိူင်ႉၼႆၼႆႉ ပူၼ်ႉမႃး မိူဝ်ႈဝၼ်းတီႈ 21/6/2023 ၼၼ်ႉ ယူႇတီႈ ႁွင်ႈ ၵၢၼ် ၾၢႆႇၵၢၼ်ငိုၼ်း ၶွင်မိူင်းဢမေႊရိၵၼ်ႊ ပိုၼ်ၽၢဝ်ႇဢွၵ်ႇမႃး လွင်ႈပိၵ်ႉဢိုတ်း ဢဝ်လိူင်ႈ(ၸွႆးတြႃး) ယေးငိုၼ်း MFTB တင်း MICB ဢၼ်ပဵၼ်ယေးငိုၼ်း တႂ်ႈသိုၵ်းမၢၼ်ႈ ၵုမ်းၵမ်ၼႆႉဝႆႉ ဝႃႈၼႆ။
ဝၢႆးလင် ယေးငိုၼ်း သွင်ဢၼ်ၼႆႉ လႆႈထုၵ်ႇပိၵ်ႉဢိုတ်း ဢဝ်လိူင်ႈၸိူင်ႉၼႆယဝ်ႉ ၶၼ်ငိုၼ်းတေႃႇလႃႇၼႆႉ လႆႈပုင်ႈ ၶိုၼ်ႈႁႅင်း 1 တေႃႇလႃႇလႂ် ပုင်ႈၶိုၼ်ႈထိုင် 3,100 ပျႃး – 3,200 ပျႃး။ ၶၼ်ၶမ်းသမ်ႉ 1 ဝၢတ်ႇလႂ် ၶိုၼ်ႈပဵၼ် 32 သႅၼ်ပျႃးပၢႆ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ