သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း ပၼ်ႇလဵပ်ႈႁႃ တပ်ႉသိုၵ်း SSPP တၢင်းၾၢႆႇဢွၵ်ႇဝဵင်းလၢႆးၶႃႈ ဢမ်ႇယွမ်း 5-6 ပွၵ်ႈ ဝႃႈၼႆ။

မိူဝ်ႈဝႃး ဝၼ်းတီႈ 28/6/2023 ယၢမ်းၵၢင်ၼႂ်မွၵ်ႈ 10 မူင်းၶိုင်ႈ ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း လမ်း ၼိုင်ႈ မႃးပၼ်ႇလဵပ်ႈႁႃ ဢွင်ႈတီႈတပ်ႉသိုၵ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/ SSA) ဢၼ်တူင်ႉ ၼိုင်ပၵ်းယူႇဝႆႉ တၢင်းၾၢႆႇဢွၵ်ႇဝဵင်းလၢႆးၶႃႈ ၼႂ်းၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၸိူဝ်းၼႆႉ။

ၽူႈတူင်ႉၼိုင် ၵၢၼ်သိုၵ်း တၢင်းထုင်ႉလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပၼ်ႇ လႅပ်ႈတၢင်းၾၢႆႇဢွၵ်ႇဝဵင်းၼႆႉ ဢမ်ႇယွမ်း 6 ပွၵ်ႈၼႆႉ လုၵ်ႉတၢင်းၼမ်ႉၸၢင် – ၶူဝ်လမ်မႃး ပေႃးၶဝ်မႃးလဵပ်ႈပၼ်ႇယဝ်ႉ ၶိုၼ်းမိၼ် ပွၵ်ႈမိူဝ်းၶိုၼ်းတၢင်းပုၼ်ႉၶႃႈဢေႃႈ။ ပဵၼ်ၶိူင်ႈမိၼ်တိုၵ်း လမ်းၼိုင်ႈၵူၺ်းၶႃႈ ဢၼ်မႃးၼႆႉ”- ဝႃႈၼႆ။

ၽူႈမီးၸၼ်ႉၼႂ်းၵၢၼ်သိုၵ်းၼၼ်ႉလၢတ်ႈၼႄဝႃႈ တႄႇဢဝ် ဝၼ်းတီႈ 27-28 ၶၢဝ်းတၢင်း 2 ဝၼ်းၼႆႉမႃး သိုၵ်းမၢၼ်ႈ တေႃႉၵွင်ႈလူင် မႃးဝႆႉထႅင်ႈ တီႈတၢင်းဝၢၼ်ႈႁၢႆးသႅင် ယဝ်ႉၵေႃႈ ထႅမ်ႁႅင်းသိုၵ်းမႃးထႅင်ႈ မွၵ်ႈ 30 ၼႆႉ။

“တပ်ႉသိုၵ်းမၢၼ်ႈ ဢၼ်ၶႂ်ႈတိုၵ်း SSPP တၢင်းၾၢႆႇဢွၵ်ႇဝဵင်းလၢႆးၶႃႈၼႆႉ ပဵၼ်ၶေႃႈၸီႉသင်ႇ တီႈတပ်ႉ ႁၢႆးသႅင် ၼႆႉ ၵမ်းလဵဝ် ။ မိူဝ်ႈဝႃး ဝၼ်းတီႈ 28 ယၢမ်းၵၢင်ၼႂ် 7 မူင်းၼႆႉ သိုၵ်းမၢၼ်ႈ တေၶိုၼ်ႈၵူတ်ႇထတ်း တီႈလွႆဝၢၼ်ႈလုၵ်း ၼွင်သႅမ်း။ ဢွင်ႈတီႈၼၼ်ႉသမ်ႉ မီး SSPP ပၵ်းဝႆႉလႄႈ သင်ဝႃႈ ၶဝ်ၶိုၼ်ႈမႃးၸိုင် သဵင်ၵွင်ႈၼႆႉ တိုၼ်းတေတႅၵ်ႇဢမ်ႇႁၢင်ႉ။ ယၢမ်းလဵဝ် တင်းသွင်ၾၢႆႇၼႆႉ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ”- ၽူႈတူင်ႉၼိုင် ၼႂ်းၵၢၼ်သိုၵ်း တၢင်းထုင်ႉလၢႆးၶႃႈ သိုပ်ႇလၢတ်ႈၼႄၼင်ႇၼႆ။

သိုၵ်းမၢၼ်ႈ ဢၼ်တူင်ႉၼိုင်ယူႇဝႆႉ တၢင်းၾၢႆႇဢွၵ်ႇဝဵင်းလၢႆးၶႃႈၼႆႉ တေမီးဢဵၼ်ႁႅင်း မွၵ်ႈ 200 ။ၵမ်ႈၼမ် တေထႅမ် ႁႅင်း သိုၵ်းမႃး တၢင်းၼမ်ႉၸၢင် – ၶူဝ်လမ်။ ယဝ်ႉၵေႃႈ တၢင်းဝဵင်းလၢႆးၶႃႈ ၸိူဝ်းၼႆႉ။ ယၢမ်းလဵဝ် သိုၵ်းမၢၼ်ႈ ဢၼ်ပၵ်းတပ်ႉဝႆႉ တၢင်းၾၢႆႇၸၢၼ်းဝၢၼ်ႈလုၵ်းၼၼ်ႉ တေမီးမွၵ်ႈ 3 ၸုမ်းၼႆႉ ဝႃႈၼႆ။

ၼႂ်းလိူၼ်ၵျုၼ်ႊၼႆႉ သိုၵ်းမၢၼ်ႈ ယိုတ်းမိူင်း သင်ႇသိုၵ်း SSPP/SSA ႁႂ်ႈထွႆဢွၵ်ႇ ၼႂ်းပိုၼ်ႉတီႈ ၸႄႈဝဵင်းလၢႆးၶႃႈ 2 ပွၵ်ႈယဝ်ႉသေတႃႉ ၾၢႆႇ SSPP ဢမ်ႇယွမ်းထွႆ။

“ဢၼ်ႁဝ်းၶႃႈ လႆႈႁပ်ႉႁူႉၶၢဝ်ႇမႃးတႄႉ မိူဝ်ႈႁၢင်လိူၼ်ၼႆႉ ဝၢႆးပၢင်ၵုမ် သိုၵ်းမၢၼ်ႈ ဢၼ်ၶဝ်ၸတ်းႁဵတ်းတီႈၼေႇပျီႇတေႃႇ ယဝ်ႉတူဝ်ႈၵႂႃႇၼၼ်ႉ။ ဢွင်ႈတီႈဢၼ်သိုၵ်းမၢၼ်ႈ ၸႂ်ႉႁဝ်းၶႃႈ ထွႆဢွၵ်ႇ ၼႂ်းပိုၼ်ႉတီႈဝဵင်းလၢႆးၶႃႈ ၸိူဝ်းၼႆႉ သင်ဝႃႈ ဢမ်ႇထွႆဢွၵ်ႇ ၸိုင် ၾၢႆႇသိုၵ်းမၢၼ်ႈၶဝ် မီးၽႅၼ် တေႁႅၼ်းသိုၵ်းလေႃႇတိုၵ်း SSPP ၼႆၶႃႈဢေႃႈ”- ၽူႈတူင်ႉၼိုင် ၵၢၼ်သိုၵ်း တၢင်းပွတ်း လၢႆးၶႃႈလၢတ်ႈ။

ဢၼ်သိုၵ်းမၢၼ်ႈ သင်ႇႁႂ်ႈ SSPP/SSA ထွႆဢွၵ်ႇပိုၼ်ႉတီႈ ၸိူဝ်းၼႆႉ မိူဝ်ႈပီ 2022 ပူၼ်ႉမႃးၵေႃႈၼၼ်ႉ မီး 3 ပွၵ်ႈယဝ်ႉ။ ပီ 2023 ၼႆႉၵေႃႈ ယင်းတိုၵ်ႉ သင်ႇႁႂ်ႈထွႆဢွၵ်ႇထႅင်ႈ။

ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ သိုပ်ႇၾူၼ်းၸူး ၽူႈၶၢၼ်ပၢၵ်ႇ SSPP/SSA လၢႆၵမ်းသေတႃႉ ဢမ်ႇမီးၽႂ်ႁပ်ႉတွပ်ႇ လၢတ်ႈပၼ်။

မိူဝ်ႈပီၵၢႆၵေႃႈ သိုၵ်းမၢၼ်ႈၸႂ်ႉ SSPP/SSA ထွႆဢွၵ်ႇ ၼႂ်းၸႄႈဝဵင်းမိူင်းသူႈလႄႈ SSPP ဢမ်ႇထွႆ။ သွင်ၾၢႆႇ လႆႈထႅမ်ႁႅင်း သိုၵ်း ၶဵင်ႈၶႅင်ၵၢၼ်သိုၵ်းတေႃႇၵၼ်မႃး။ ထိုင်မႃး ႁူဝ်ပီ 2023 ၼႆႉ သိုၵ်းမၢၼ်ႈၸႂ်ႉၶိူင်ႈမိၼ် မႃးပၼ်ႇလဵပ်ႈလွၵ်ႇငိုတ်ႈ တီႈငဝ်ႈ ငုၼ်း တပ်ႉၸုမ်း SSPP/SSA တီႈဝၢၼ်ႈႁႆးယဝ်ႉ လၢႆၵမ်း။