ဝၢၼ်ႈမႂ်ႇတိုၼ်းလီ ဢၼ်မီးဝႆႉၾၢႆႇႁွင်ႇ ဝဵင်းလၢႆးၶႃႈ ဢၼ်တိုၵ်ႉတႄႇဝၢၼ်ႈမႃးပႆႇႁိုင်ၼႆႉ ဢိင်ၼိူဝ်ပၼ်ႁႃလွင်ႈ ပၢင်တိုၵ်း ၼႂ်းပိုၼ်ႉတီႈတိုၵ်ႉၶဵင်ႈၶႅင်တေႃႇၵၼ်ယူႇလႄႈ ၵူၼ်းဝၢၼ်ႈဢမ်ႇၸၢင်ႈယူႇသဝ်း လႆႈဢွၼ်ၵၼ်သိုပ်ႇပၢႆႈၵႂႃႇထႅင်ႈ ယၢမ်းလဵဝ် ဝၢၼ်ႈပေႃးႁၢမ်းၶိုၼ်းယဝ်ႉ ဝႃႈၼႆ။

ဝၢၼ်ႈမႂ်ႇတိုၼ်းလီ မီးဝႆႉၼႂ်းဢိူင်ႇဝၢၼ်ႈထီႇ ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း လင်ႁိူၼ်းမီးမွၵ်ႈ 70 ပၢႆ ၊ တႄႇဢဝ် ပီ 2023 ၼႆႉမႃး ၵူၼ်းဝၢၼ်ႈ ဢွၼ်ၵၼ်ပၢႆႈဢွၵ်ႇဝၢၼ်ႈသေ ၵမ်ႈၽွင်ႈပၢႆႈၶဝ်ႈယူႇၼႂ်းဝဵင်း၊ ၵမ်ႈၽွင်ႈၶဝ်ႈႁဵတ်းၵၢၼ်မိူင်းထႆး ၊ မၢင်ၸိူဝ်း ပွၵ်ႈၶိုၼ်း ဝၢၼ်ႈၵဝ်ႇၽႂ်မၼ်း ၊ ၵူၼ်းဝၢၼ်ႈလၢတ်ႈဝႃႈ ပဵၼ်ယွၼ်ႉသိုၵ်း RCSS တင်း SSPP ၶိုၼ်းၶဵင်ႈၶႅင်ၵၢၼ်သိုၵ်းတေႃႇၵၼ်၊ တူင်ႉၼိုင်ထႅမ်ႁႅင်းသိုၵ်းၶိုၼ်း ထိုင်တီႈၵူၼ်းဝၢၼ်ႈတူၵ်းၸႂ် ဝႃႈၼႆ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ-“ဝၢၼ်ႈမႂ်ႇတိုၼ်းလီၼႆႉ တႄႇမႃး မိူဝ်ႈပီ 2021 ။ ယွၼ်ႉပၢင်တိုၵ်း သိုၵ်း RCSS – SSPP လႄႈ ၸင်ႇလႆႈမႃးတင်ႈဝၢၼ်ႈမႂ်ႇၼႆႉမႃး မီးလင်ႁိူၼ်း 70 ပၢႆ။ ယၢမ်းလဵဝ်ၵိုတ်း ဝႆႉ 12 – 13 လင်ၶႃးႁိူၼ်းၵူၺ်း ႁူဝ်ၵူၼ်းတေမီး 10 ပၢႆ။ လိူဝ်ၸိူဝ်းၼၼ်ႉတႄႉ ပၢႆႈၵႂႃႇမိူင်းထႆး၊ ၶဝ်ႈဝဵင်းလၢႆးၶႃႈ၊ မၢင်ၸိူဝ်းပွၵ်ႈ ၶိုၼ်း ဝၢၼ်ႈၵဝ်ႇၽႂ်မၼ်း ၸိူဝ်းၼႆႉၶႃႈဢေႃႈ။ ယွၼ်ႉပၼ်ႁႃ ၵၢၼ်မိူင်းၼႂ်းပိုၼ်ႉတီႈ ဢမ်ႇၵတ်းယဵၼ်ၼိမ်သဝ်းၼၼ်ႉၶႃႈယဝ်ႉ”- ဝႃႈၼႆ။

ယၢမ်းလဵဝ် ဝၢၼ်ႈမႂ်ႇတိုၼ်းလီၼႆႉ တေၵိုတ်းဝႆႉ လင်ႁိူၼ်းမွၵ်ႈ 12-13 လင်ၼႆႉ ႁူဝ်ၵူၼ်းတေမီး 10 ပၢႆ။ ၼႂ်း 10 ႁိူၼ်းပၢႆၼႆႉ မၢင်ႁိူၼ်းတေမီး 1 ၵေႃႉ 2 ၵေႃႉ မွၵ်ႈၼႆႉၵူၺ်း။ ၵမ်ႈၼမ် ၵူၼ်းဝၢၼ်ႈမႂ်ႇတိုၼ်းလီၼႆႉ တေႁဵတ်းၵၢၼ်ႁႃၵိၼ်လဵင်ႉတွင်ႉ သူၼ်ႁႆႈၼႃး ၽုၵ်ႇၶဝ်ႈၵၢပ်ႇ(ၶဝ်ႈၶႄႇ) ၸိူဝ်းၼႆႉ ပဵၼ်ပိူင်ယႂ်ႇ။

“ႁူင်းႁဵၼ်း ဝၢၼ်ႈမႂ်ႇတိုၼ်းလီၼႆႉ လႆႈတင်ႈမႃး တိုၵ်ႉမီးၶၢဝ်းတၢင်းပီပၢႆ လုၵ်ႈႁဵၼ်းတႄႉ မီး 20 ပၢႆ။ ယၢမ်းလဵဝ် လုၵ်ႈ ႁဵၼ်းၼႆႉ ဢမ်ႇမီးယဝ်ႉ ဢၼ်ၶၢႆႉမႃးၶိုၼ်းႁူင်းႁဵၼ်းလူင်ပွင်ၸိုင်ႈမၢၼ်ႈ တီႈၼႂ်းဝဵင်းၼႆႉၵေႃႈမီး တေမီးမွၵ်ႈ 5-6 ၵေႃႉ ၼႆႉ။ လိူဝ်ၼၼ်ႉ ဢၼ်ပၢႆႈၵႂႃႇမိူင်းထႆး ၸွမ်းပေႃႈမႄႈ၊ ပွၵ်ႈၶိုၼ်ႈႁိူၼ်းဝၢၼ်ႈၵဝ်ႇ ၸိူဝ်းၼႆႉ။ တႃႇၵၢၼ်သွၼ်ႁဵၼ်းၼႂ်းပီ 2023-2024 ၼႆႉတႄႉ ဢမ်ႇမီးယဝ်ႉ လႆႈၵိုတ်းယင်ႉဝႆႉၶႃႈဢေႃႈ။ သင်ဝႃႈ ငဝ်းလၢႆးလီမႃးၶိုၼ်းၼႆ ၸင်ႇတေၸၢင်ႈပိုတ်ႇ ၶိုၼ်းၶႃႈယဝ်ႉ”- ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈၼႄ ၼင်ႇၼႆ။

ႁူင်းႁဵၼ်း ဝၢၼ်ႈမႂ်ႇတိုၼ်းလီၼႆႉ လႆႈပူင်သွၼ်ပၼ် လုၵ်ႈဢွၼ်ႇပၢႆႈၽေးသိုၵ်းမႃး မိူၼ်ၼင်ႇ ပၢင်သွၼ်ၶွမ်း (Computer) ၊ ဢင်းၵိတ်း (English 4 Skills)၊ လိၵ်ႈထႆး၊ လိၵ်ႈတႆး ၸိူဝ်းၼႆႉ။ ၽူႈဢွၼ်ႁူဝ်ၵေႃႇတင်ႈဝၢၼ်ႈလႄႈ ႁူင်းႁဵၼ်းၼႆႉသမ်ႉ ပဵၼ် ၸၢႆးသၢႆလႅင်း (ၼမ်ႉၽိတ်းၽူး) ၼႆယဝ်ႉ။

ဝၢၼ်ႈမႂ်ႇတိုၼ်းလီ မီးဝႆႉၾၢႆႇႁွင်ႇဝဵင်းလၢႆးၶႃႈ လႆႈတႄႇတင်ႈမႃး ယွၼ်ႉပၢင်တိုၵ်းသိုၵ်း RCSS တင်း SSPP တႄႇပိုတ်းယိုဝ်း ၵၼ်မႃး မိူဝ်ႈပီ 2021 တီႈလွႆႁူၼ်း ဝဵင်းၵေးသီးၼၼ်ႉသေ ၵူၼ်းဝၢၼ်ႈၼႃးတုၼ်ႇ၊ ဝၢၼ်ႈလွႆတွင်ႇ၊ ဝၢၼ်ႈၵုင်းပႅၵ်ႇ တင်းမူတ်း ႁူဝ်ၵူၼ်း 200 ပၢႆ ႁူမ်ႈၵၼ် ၵေႃႇတင်ႈမႃး ဝႃႈၼႆ။