သိုၵ်းမၢၼ်ႈ ယိုတ်းမိူင်း လၢမ်းလိမ်း ယိုဝ်းၵွင်ႈလူင် တူၵ်းတႅၵ်ႇ ၸွမ်းၼႂ်းသူၼ်ႁႆႈၼႃး ႁိမ်းႁွမ်းဝၢၼ်ႈ ဢမ်ႇယွမ်း 4 လုၵ်ႈ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ။

မိူဝ်ႈဝၼ်းတီႈ 24/6/2023 ယၢမ်းၵၢင်ၼႂ်မွၵ်ႈ 10 မူင်း သိုၵ်းမၢၼ်ႈ ယိုတ်းမိူင်း ဢၼ်ပၵ်းတပ်ႉဝႆႉတီႈ ဝၢၼ်ႈၼမ်ႉၸလၢပ်ႈ ၼႂ်းၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ပွႆႇမၢၵ်ႇလူင် တူၵ်းတႅၵ်ႇ ၸွမ်းၼႂ်းသူၼ်ႁႆႈ ၼႃး ႁိမ်းဝၢၼ်ႈၵွင်းၽႃႈ၊ ဝၢၼ်ႈၼႃးၵူင်း၊ ဝၢၼ်ႈႁူဝ်သေႃႇလႄႈ ဝၢၼ်ႈႁူဝ်ၶီး ၸိူဝ်းၼႆႉ။

ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ပွႆႇမၢၵ်ႇလူင် တင်းမူတ်း 4 လုၵ်ႈ။ တႃႇ 2 လုၵ်ႈ ၼႆႉ ပွႆႇၵႂႃႇ တူၵ်းတႅၵ်ႇ ၼႂ်းသူၼ် ဢၼ်မီးဝႆႉတၢင်းၾၢႆႇၼႃႈ ဝၢၼ်ႈၵွင်းၽႃႈၼၼ်ႉ။ ထႅင်ႈလုၵ်ႈၼိုင်ႈ ပွႆႇၵႂႃႇတူၵ်းတႅၵ်ႇ ၼႂ်းတူင်ႈၼႃး ႁိမ်း ဝၢၼ်ႈၼႃးၵူင်းလႄႈ ထႅင်ႈလုၵ်ႈၼိုင်ႈ ယိုဝ်းၵႂႃႇတူၵ်းတႅၵ်ႇႁိမ်းဝၢၼ်ႈႁူဝ်သေႃႇ – ဝၢၼ်ႈႁူဝ်ၶီး တၢင်း ၾၢႆႇၼၼ်ႉသမ်ႉ မီးဝႆႉသိုၵ်း ၶၢင် KIA တူင်ႉၼိုင်ယူႇဝႆႉ”- ဝႃႈၼႆ။

ၵူၼ်းဝၢၼ်ႈတႄႉလၢတ်ႈဝႃႈ သိုၵ်းမၢၼ်ႈႁူႉလွင်ႈ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ပႂ်ႉၵဵပ်းၶွၼ်ႇၸဝ်ႈၵႃး ၼိူဝ်သဵၼ်ႈတၢင်းလူင် သႅၼ်ဝီ – ၵုၼ်လူင်လႄႈ ၸင်ႇလၢမ်းလိမ်းယိုဝ်းၵွင်ႈလူင်။ ၸုမ်းယိပ်းၵွင်ႈၵၢင်ႇတႄႉထွႆၵႂႃႇၶိုၼ်းတၢင်း ဝၢၼ်ႈႁူဝ်သေႃႇ – ဝၢၼ်ႈႁူဝ်ၶီးၼၼ်ႉ ယူႇသေတႃႉ ၵူၼ်းမိူင်းတူၵ်းၸႂ်။

မၢၵ်ႇလူင်ဢၼ်သိုၵ်းမၢၼ်ႈတပ်ႉ ၼမ်ႉၸလၢပ်ႈ ယိုဝ်း 4 လုၵ်ႈၼၼ်ႉ တူၵ်းတႅၵ်ႇ ၸွမ်းၼႂ်းသူၼ်ႁႆႈၼႃးၵူၼ်းမိူင်း။ ၵူၺ်းၵႃႈ လွင်ႈတုမ်ႉတိူဝ်ႉ ၵူၼ်းပိုၼ်ႉတီႈမၢတ်ႇ ၸဵပ်းလူႉတၢႆတႄႉ ဢမ်ႇမီး။

ဢိူင်ႇၼမ်ႉၸလၢပ်ႈၼႆႉ မီးၾၢႆႇႁွင်ႇဝဵင်းသႅၼ်ဝီ တေယၢၼ်ဝဵင်းမွၵ်ႈ 30 လၵ်း မီးၼႂ်းၵႄႈသႅၼ်ဝီ – ၵုၼ်လူင်။ ယဝ်ႉ ၵေႃႈ မီးပလိၵ်ႈမၢၼ်ႈတင်း သိုၵ်းမၢၼ်ႈ ယိုတ်းမိူင်း ၸိူဝ်းၼႆႉ တူင်ႉၼိုင်ယူႇဝႆႉၼမ်။

ပူၼ်ႉမႃး မိူဝ်ႈဝၼ်းတီႈ 25/5/2023 ၼၼ်ႉၵေႃႈ ၵႃးလူင် 12 လေႃႇ တၢင်ႇလိၼ်ပုၼ် လမ်းၼိုင်ႈ ၺႃးၽဝ် ၼိူဝ်သဵၼ်ႈတၢင်းလူင် သႅၼ်ဝီ – ၵုၼ်လူင်။

ယၢမ်းလဵဝ် ၼႂ်းၸႄႈဝဵင်းသႅၼ်ဝီၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉ မိူၼ်ၼင်ႇ သိုၵ်းမၢၼ်ႈ ယိုတ်းမိူင်း၊ သိုၵ်း ၶၢင် KIA ၊ သိုၵ်းၵဝ်ႈၵၢင်ႉ MNDAA ၊ သိုၵ်းတဢၢင်း TNLA လႄႈ သိုၵ်းတႆး SSPP ၸိူဝ်းၼႆႉ။