ၵူၼ်းၼုမ်ႇ 2 ၵေႃႉ တီႈဝဵင်းတႃႈၶီႈလဵၵ်း ၸူဝ်းၵၼ်ၵိၼ်လဝ်ႈၸွမ်းၵၼ်တီႈထဵင်ၼႃး လိုၼ်းမႃးထဵင်မေႃးၽိတ်း ၵၼ် ၼႂ်းပၢင်လဝ်ႈ ထိုင်တီႈယိုဝ်းၽၼ်းၵၼ် မၢတ်ႇၸဵပ်းႁၢဝ်ႈႁႅင်း လႆႈႁၢမ်တူဝ်သူင်ႇႁူင်းယႃ။  

မိူဝ်ႈဝႃး ဝၼ်းတီႈ 18/6/2023 ယၢမ်းၶမ်ႈ 7 မူင်းၼၼ်ႉ ၽူႈၸၢႆးဢူၺ်းၵေႃႉၵၼ် 2 ၵေႃႉၵူၼ်းဝၢၼ်ႈပၢင်ႁၵ်ႉလႄႈ ဝၢၼ်ႈသီႇရိငွၵ်း ဝဵင်းတႃႈၶီႈလဵၵ်း  ၸူဝ်းၵၼ်ၵႂႃႇၵိၼ်လဝ်ႈတီႈ ထဵင်ၼႃး ၼႂ်းဝၢၼ်ႈမူင်ႈ ဢိူင်ႇမိူင်းၵူဝ်းသေ ထိုင်မဝ်းမႃး ထဵင်မေႃး ၽိတ်းၽႅၵ်ႇၵၼ် ထိုင်တီႈ ၽၼ်းၵၼ် ယိုဝ်းၵၼ်မၢတ်ႇၸဵပ်းတင်းသွင်။

ၽူႈတူင်ႉၼိုင်ၼႂ်းၸုမ်းၸွႆႈတူင်ႇၵူၼ်း သူၺ်ႇမၢၵ်ႇယၢင်းလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မိူဝ်ႈႁဝ်းၵႂႃႇႁွတ်ႈတီႈၶဝ်ၼၼ်ႉတႄႉ ၵွင်ႈဝႃႇ ၾႃႉဝႃႇ ဢမ်ႇႁၼ်မီးၼႂ်းမိုဝ်းၶဝ်ယဝ်ႉ။ ဢၼ်ႁွင်ႉႁဝ်းၵႂႃႇတႄႉ တေပဵၼ်ပီႈၼွင်ႉၶဝ်ၵူၺ်းၼေႈ။ၶဝ်ဝႃႈ ၵေႃႉၼိုင်ႈသမ်ႉ ၸႂ်လမ်တေႃးသဢွၵ်ႇသေယဝ်ႉၵေႃႈ ဢဝ်ၵွင်ႈသတ်ႉယၢမ်းၼႆႉ ယိုဝ်းသႂ်ႇၼႆဢေႃႈ။ထဵင်လွင်ႈသင်ၵၼ် ႁဝ်းၵေႃႈ ဢမ်ႇတၼ်းထၢမ် လူဝ်ႇႁိပ်ႈလူးၼေႃႈ။  ၵေႃႉၼိုင်ႈသမ်ႉၶိုၼ်းဢဝ်ၾႃႉၽၼ်းၼႆလူး။ ၸဵပ်းၼမ်တင်းသွင်ၵေႃႉယဝ်ႉ။ ၵေႃႉဢၼ်ၺႃးမၢၵ်ႇၵွင်ႈတႄႉ တၢင်းတႂ်ႈဢူၵ်းမၼ်းၾၢႆႇသၢႆႉမီးႁွႆးၸဵပ်း လိူတ်ႈၵေႃႈဢွၵ်ႇၼမ် ထႅင်ႈၵေႃႉၼိုင်ႈသမ်ႉ ၵႅမ်ႈမၼ်းလႄႈ ဢႅင်ႈမၼ်းၸိူဝ်းၼႆႉ မီးႁွႆးၽၼ်းဝႆႉ။ တီႈၶဝ်ၵႂႃႇၵိၼ်လဝ်ႈၼႆႉၵေႃႈ ဢမ်ႇၸႂ်ႈဝၢၼ်ႈၶဝ် ပဵၼ်ၼႂ်းၼႃးပိူၼ်ႈတၢင်ႇဝၢၼ်ႈပုၼ်ႉၼေႈ ” – ဝႃႈၼႆ။

ၵေႃႉဢၼ်ဢဝ် ၵွင်ႈယိုဝ်းၼႆႉ ၸိုဝ်ႈႁွင်ႉ ၸၢႆးလူင် ဢႃယု 26 ပီ ယူႇဝၢၼ်ႈပၢင်ႁၵ်ႉ ၵေႃႉဢၼ်ဢဝ်ၾႃႉၽၼ်းၼႆႉ ၸိုဝ်ႈႁွင်ႉ ၸၢႆးဢူးၶွၼ် ဢႃယု 23 ပီ ယူႇဝၢၼ်ႈသီရိငွၵ်း ႁွင်ႉၵၼ်မႃး တႄႇပၢင်လဝ်ႈၸွမ်းၵၼ်သေ ဝၢႆးၼၼ်ႉ ၵႂၢမ်းၼမ်ၽိတ်းမေႃးၵၼ် ထိုင်တီႈၽၼ်းယိုဝ်းၵၼ် ၾၢႆႇၸုမ်းၸွႆႈတူင်ႇၵူၼ်းသူၺ်ႇမၢၵ်ႇယၢင်း ၸွႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင်တႃႈၶီႈလဵၵ်းၼႆယဝ်ႉ။

ၽူႈတူင်ႉၼိုင်ၼႂ်းၸုမ်းၸွႆႈတူင်ႇၵူၼ်းသူၺ်ႇမၢၵ်ႇယၢင်းလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈဝႃးတႄႉၵေႃႈ မေႃယႃၶဝ် ႁႃ လိူတ်ႈပၼ်ၶဝ် မွၵ်ႈ 4 တဝ်ႈၼႆႉၼေႈ မိူဝ်ႈၼႆႉတႄႉ တေပဵၼ်ႁိုဝ် ပႆႇႁူႉ လႅပ်ႈလိူဝ်ၸႂ်ဝႆႉယူႇဢေႃႈ ” – ဝႃႈၼႆ။

မိူဝ်ႈဝၼ်းတီႈ 17/6/2023 ၼၼ်ႉၵေႃႈ မီးလွင်ႈပိုတ်းယိုဝ်းၵၼ် တီႈႁၢၼ်ႉၵိၼ်ၵျေႃႇ @16 ၼႂ်းပွၵ်ႉသၼ်သၢႆး (ၶ) ၸႄႈဝဵင်းတႃႈၶီႈလဵၵ်း မီးၵူၼ်းမၢတ်ႇၸဵပ်းႁၢဝ်ႈႁႅင်း 3 ၵေႃႉ တင်းမူတ်းပဵၼ်ၵူၼ်းထႆးၼႆယဝ်ႉ ။

မိူဝ်ႈဝၼ်းတီႈ 2/6/2023 ၼၼ်ႉၵေႃႈ ၵႃးလမ်းၼိုင်ႈ ၺႃးယိုဝ်း ၼိူဝ်ႈသဵၼ်ႈတၢင်းၵႂႃႇပၢင်ႇပေႃႉ ၵွပ်ႉၾ်ရီႊၵျီႊၼႃႊ ၼႂ်းပွၵ်ႉသၼ်သၢႆး (ၵ) ၸႄႈဝဵင်းတႃႈၶီႈလဵၵ်းၼၼ်ႉသေ မီးၵူၼ်းမၢတ်ႇၸဵပ်းၵေႃႉၼိုင်ႈ။

ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ လွင်ႈၵေႃႇၵၢၼ်ႁၢႆႉ ၼႂ်းၸႄႈဝဵင်းတႃႈၶီႈလဵၵ်း မီးၼမ်မႃး ၶိူဝ်းယႂ်း။ ၵူၼ်းတၢင်ႇတီႈ သီႇလႅၼ်ၵေႃႈ ၶဝ်ႈမႃးထင်သဝ်းၼမ်လႄႈ ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ လွင်ႈၵႂႃႇလွင်ႈပႆ။ ၼႂ်းလုၵ်ႈလိူၼ်ၵျုၼ်ႊၼႆႉၵူၺ်းၵေႃႈ မီးလွင်ႈပိုတ်းယိုဝ်းၵၼ် တီႈတႃႈၶီႈလဵၵ်း ဢမ်ႇယွမ်း 3 ပွၵ်ႈ။