မိူဝ်ႈၼႆႉ ဝၼ်းတီႈ 15/6/2023 ယၢမ်းၵၢင်ၼႂ် 9:15 မူင်း ၽူႈၸၢႆး ဢႃယုမွၵ်ႈ 30 ပီ ၵေႃႉၼိုင်ႈ ထုၵ်ႇယိုဝ်းတၢႆ ထင်တီႈ ၾၢႆႇၸၢၼ်းၵၢတ်ႇလူင် တီႈပွၵ်ႉ 3 ၼႂ်းၵၢင်ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၽူႈၸၢႆး ဢၼ်ထုၵ်ႇယိုဝ်းတၢႆၼၼ်ႉ တေမီးဢႃယုမွၵ်ႈ 30 ပီၼႆႉ မၼ်းၸၢႆး ထုၵ်ႇယိုဝ်းတိူဝ်ႉတီႈပဵမ်ႉ 3 ၵမ်းသေ လူႉတၢႆထင်တီႈ။ ၵူၼ်းမႃးယိုဝ်းၼၼ်ႉ တေၶီႇၵႃးမႃးၸွမ်းၵၼ် 3 ၵေႃႉ။ ၶဝ်ယိုဝ်းသႂ်ႇယဝ်ႉၵေႃႈ ႁေႃႈၵႃးပၢႆႈၵမ်းလဵဝ်”- ဝႃႈၼႆ။

ၽူႈၸၢႆး ဢၼ်ထုၵ်ႇယိုဝ်းတၢႆၼၼ်ႉ မၼ်းၸၢႆးၵႂႃႇၵႅတ်းၶူၼ်ႁူဝ်သေ ဢွၵ်ႇႁၢၼ်ႉမႃး ဢၢင်ႈတေၶၢမ်ႈတၢင်းလႄႈ မီးၵူၼ်းၶီႇၵႃးမႃးယိုဝ်းတၢႆ တီႈၼၼ်ႈၵမ်းလဵဝ် ဝႃႈၼႆ။

“တူဝ်တၢႆ ၽူႈၸၢႆးၼၼ်ႉ ပလိၵ်ႈမၢၼ်ႈၶဝ် မႃးၵူတ်ႇထတ်းသေ လႆႈႁူႉဝႃႈ ၼႂ်းထူင်ပႃးမၼ်းၸၢႆးၼၼ်ႉ မီးဝႆႉတဝ်ႈၼမ်ႉလႄႈ ၵၢင်ႇၵွၼ်။ ယဝ်ႉၵေႃႈ ၽူႈတၢႆၼၼ်ႉ ဢမ်ႇၸႂ်ႈပဵၼ်ၵူၼ်းပိုၼ်ႉတီႈ လုၵ်ႉတီႈလႂ်မႃးၵေႃႈ ဢမ်ႇႁူႉ။ ႁဝ်းၶႃႈ ဢမ်ႇတွၼ်ႉယၢမ်ႈႁၼ်မၼ်း  ၶႃႈ”- ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၶၢပ်ႈတူဝ်တၢႆ ၽူႈၸၢႆးၼႆႉ ယူႇတီႈပလိၵ်ႈမၢၼ်ႈၶဝ် လႆႈဢဝ်ၵႂႃႇ ဝႆႉတီႈႁူင်းယႃလူင် ဝဵင်းလၢႆးၶႃႈယဝ်ႉ ဝႃႈ ၼႆ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းပိုၼ်ႉတီႈ ဝဵင်းလၢႆးၶႃႈ ဢွၼ်ၵၼ်တူၵ်းၸႂ် တိုၼ်ႇသၢၼ်ႈၵၼ် ယွၼ်ႉဢမ်ႇယၢမ်းမီးမႃးသေပွၵ်ႈ လွင်ႈယိုဝ်းၵၼ်တၢႆ တီႈၼႂ်းၵၢင်ဝဵင်း ၸိူင်ႉၼင်ႇၼႆ။

ၼႂ်းၸႄႈဝဵင်းလၢႆးၶႃႈၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃးၼမ် မိူၼ်ၼင်ႇ သိုၵ်းမၢၼ်ႈ ယိုတ်းမိူင်း၊ ၸုမ်းပျီႇတူႉ ၸိတ်ႉ၊ သိုၵ်း SSPP ၊ သိုၵ်း UWSA လႄႈ သိုၵ်း RCSS ၸိူဝ်းၼႆႉ။