သိုၵ်းမၢၼ်ႈယႃႉ ပၢႆႉၶဝ်ႈဢွၵ်ႇဝၢၼ်ႈ ဢၼ်ပႃးလိၵ်ႈလႄႈတုင်း(ၸွမ်ပိဝ်) တဢၢင်း

ပၢႆႉၶဝ်ႈဢွၵ်ႇဝၢၼ်ႈ ဢၼ်ပႃးလိၵ်ႈလႄႈ တုင်းၸိူဝ်ႉၸၢတ်ႈ တဢၢင်း 4-5 ဝၢၼ်ႈ ၼႂ်းၸိုင်ႈတႆးပွတ်းႁွင်ႇၼၼ်ႉ ၺႃးသိုၵ်းမၢၼ်ႈပေႃႉထုပ်ယႃႉၵွႆ ။

တႄႇမိူဝ်ႈဝၼ်းတီႈ 9/6/2023 ၼၼ်ႉမႃး ၸုမ်းသိုၵ်းမၢၼ်ႈလႄႇႁႃ ထုပ်ႉပေႃႉ ယႃႉပၢႆႉၶဝ်ႈ/ဢွၵ်ႇဝၢၼ်ႈ ၼႂ်းၸႄႈဝဵင်း လႃႈသဵဝ်ႈ ၼမ်ႉတူႈ လၢႆလၢႆဝၢၼ်ႈဢၼ်ပႃး လိၵ်ႈလႄႈ ႁၢင်ႈတုင်း (ၸွမ်ပိဝ်) တဢၢင်း  လူႉၵွႆတၢင်းၼမ် ။

ၸၢဝ်းတဢၢင်း ၼႂ်းၸႄႈဝဵင်းလႃႈသဵဝ်ႈ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈၶဝ်ၼႆႉ ဢႃးၵူဝ်းၵွင်ႈၵၢင်ႇ လၢၵ်ႈၼၢၵ်ႈသေယဝ်ႉၵေႃႈ ပေႉၵိၼ်လူလၢႆၵူၼ်းမိူင်း ။ ၶဝ်တင်ႈၸႂ် မႃးယႃႉပၢႆႉၶဝ်ႈဝၢၼ်ႈႁဝ်းႁဵတ်းၼႆ တေမီးမွၵ်ႈ 5 ဝၢၼ်ႈၼႆႉယဝ်ႉ ။ ပဵၼ်ဢၼ်ႁဵတ်းဝႆႉ မႂ်ႇမႂ်ႇၵူႈဢၼ်ယဝ်ႉၼၼ်ႉ” – ဝႃႈၼႆ။

ပၢႆႉၶဝ်ႈ/ဢွၵ်ႇဝၢၼ်ႈ ဢၼ်ၺႃးသိုၵ်းမၢၼ်ႈ ယႃႉလႅဝ်ၼႆႉ မီးလၢႆလၢႆဝၢၼ်ႈ မိူၼ်ၼင်ႇ ဝၢၼ်ႈၼွင်ယူမ်း ၊ ဝၢၼ်ႈၵွင်းၶႃး ၊ ဝၢၼ်ႈႁူဝ်ပိုၵ်ႉ၊ဝၢၼ်ႈႁူးမူၼ်ႈ ၼႂ်းၸႄႈဝဵင်းလႃႈသဵဝ်ႈလႄႈၼမ်ႉတူႈ ။ ထိုင်မႃးဝၼ်းတီႈ 12/6/2023 ၼႆႉၵေႃႈ ပၢႆႉၶဝ်ႈဢွၵ်ႇဝၢၼ်ႈ ဢၼ်မီးၼႂ်းဢိူင်ႇၶိူဝ်းၼိမ်း ၸႄႈဝဵင်းလႃႈသဵဝ်ႈ ဢၼ်ပႃးလိၵ်ႈလႄႈၸွမ်ပိဝ်တဢၢင်းၵမ်ႈၽွင်ႈ ၵေႃႈ ၺႃးပေႃႉထုပ်ႉယႃႉလူႉလႅဝ်ထႅင်ႈၼႆယဝ်ႉ။

ၸၢဝ်းတဢၢင်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပၢႆႉၸိူဝ်းၼႆႉ တႃႇတေပဵၼ်မႃးၵေႃႈ ဢမ်ႇငၢႆႈ ႁဝ်းၶႃႈ လႆႈၵဵပ်းငိုၼ်းၵၼ် ၵေႃႉဢိတ်းၵေႃႉဢွတ်းသေ ႁဵတ်းမႃး ၶႃႈဢေႃႈ ။ မိူဝ်ႈလဵဝ် ၺႃးယႃႉၸိူင်ႉၼႆ ၸႂ် ဢမ်ႇလီသေဢိတ်းၶႃႈ ။ ၶႂ်ႈႁႂ်ႈ ၶဝ် မႄးႁဵတ်းပၼ်ၶိုၼ်းဢေႃႈ။ဢမ်ႇသင်ၵေႃႈ ႁဵတ်းပၢႆႉတႅမ်ႈလိၵ်ႈၶဝ်ၵေႃႈလႆႈ ၶႃႈယဝ်ႉ ငိၼ်းဝႃႈ ၶဝ် မႃးႁွင်ႉဢဝ် ပူႇၵႄႇၼႂ်းဝၢၼ်ႈၵႂႃႇလူင်းလၢႆးမိုဝ်းႁေ ႁၢမ်ႈဝႃႈ တေဢမ်ႇလႆႈႁဵတ်း ပၢႆႉဢၼ်တႅမ်ႈလိၵ်ႈတဢၢင်းၼႆဢေႃႈ။ပေႃးႁဵတ်းၵေႃႈ တေလႆႈတႅမ်ႈလိၵ်ႈမၢၼ်ႈၵူၺ်း ” – ဝႃႈၼႆ။

ပၢႆႉၶဝ်ႈဢွၵ်ႇဝၢၼ်ႈ မၢင်ဝၢၼ်ႈ ဢၼ်ၺႃးယႃႉၼႆႉ မီးၵႆဝၢၼ်ႈတဢၢင်း၊ မၢင်ၸိူဝ်းသမ်ႉ ယူႇႁိမ်းၸမ် သဵၼ်ႈတၢင်းလူင်၊ လိူဝ်ၼၼ်ႉ မၢင်ဝၢၼ်ႈသမ်ႉ ဢမ်ႇၸႂ်ႈၸၢဝ်းတဢၢင်းမဵဝ်းလဵဝ်ယူႇသဝ်း၊ မီးပႃးတၢင်ႇၸၢဝ်းၶိူဝ်းယူႇႁူမ်ႈၵၼ်။ ၾၢႆႇၼိုင်ႈ တီႈပၢႆႉၼၼ်ႉ တႅမ်ႈဝႆႉၸိုဝ်ႈဝၢၼ်ႈပဵၼ်လိၵ်ႈတဢၢင်းၵူၺ်းဢမ်ႇၵႃး  ယင်းပၢႆတႅမ်ႈဝႆႉပႃးထႅင်ႈဝႃႈ ၸႄႈမိူင်းတဢၢင်း။ လိူဝ်ၼၼ်ႉ ဢဝ်တုင်းၸိူဝ်ႉၸၢတ်ႈတဢၢင်းမႃးသႂ်ႇဝႆႉပႃးလႄႈ ႁဵတ်းႁႂ်ႈ သိုၵ်းမၢၼ်ႈမႃးယႃႉၵေႃႈပဵၼ်လႆႈ ၵူၼ်းပိုၼ်ႉတီႈတႄႉ ထတ်းသၢင်လၢမ်းၶၢတ်ႈၼင်ႇၼႆ။

ဢမ်ႇၵႃးပၢႆႉၶဝ်ႈဝၢၼ်ႈ ဢၼ်ပႃးလိၵ်ႈတဢၢင်းၵူၺ်း ၊ တၢင်းၸႄႈမိူင်းၶၢင် တိူင်းၸႄႈၵႅင်းၸိူဝ်းၼၼ်ႉၵေႃႈ ဝၢၼ်ႈတႆးလႅင် ဢၼ်တႅမ်ႈပႃးလိၵ်ႈတႆးလႅင်တီႈပၢႆႉၶဝ်ႈဢွၵ်ႇဝၢၼ်ႈၼၼ်ႉ ၺႃးသိုၵ်း PDF သိုၵ်းၶၢင် ယႃႉလႅဝ်ပႅတ်ႈ မီးလၢႆလၢႆၵမ်းယဝ်ႉၼင်ႇၵဝ်ႇ။

ၽွင်းပၢၼ်လူင်ပွင်ၸိုင်ႈတဵင်းၸဵင်ႇၽွင်းငမ်းမိူင်းၼၼ်ႉ ၽွင်းလူင်ၾၢႆႇလိူမ်ႈလႆႇ လူင်ပွင်ၸိုင်ႈမိူင်းတႆး ယၢမ်ႈပိုၼ်ၽၢဝ်ႇပဵၼ်တၢင်းၵၢၼ်ဝႃႈ တႃႇယုၵ်ႉမုၼ်းၽႃႇသႃႇလိၵ်ႈလၢႆးၸဝ်ႈၵဝ်ႇၼၼ်ႉ ပၢႆႉၶဝ်ႈဝဵင်း ဢွၵ်ႇဝဵင်း  ၼွၵ်ႈလိူဝ်လိၵ်ႈမၢၼ်ႈယဝ်ႉ တႅမ်ႈပႃးလိၵ်ႈၸၢဝ်းၶိူဝ်းၽႂ်မၼ်းၵေႃႈလႆႈ ဝႃႈၼႆ ။