ၵႃးသွင်လမ်း ပဵၼ်ၽေးၵိုင်ႉၵၢင်ႉ ပိၼ်ႈတူၵ်းႁွင်ႈ ၺႃးလဵၵ်းပၵ်းသႂ်ႇ မေႃႈၼမ်ႉမၼ်းသေ လုၵ်ႉပဵၼ်ၾႆး မီးၵူၼ်းမၢတ်ႇၸဵပ်း 2 ၵေႃႉတီႈၸႄႈဝဵင်းတႃႈၶီႈလဵၵ်း ။
မိူဝ်ႈဝႃး ဝၼ်းတီႈ 10/6/2023 ယၢမ်းၵၢင်ၶိုၼ်း 11 မူင်းပၢႆၼၼ်ႉ ၵႃး 2 လမ်း ႁေႃႈဝႆး ၶဝ်ႈၵႂႃႇၼႂ်းႉၵိဝ်ႇသဵၼ်ႈတၢင်းဢၼ်ပိူၼ်ႈတိုၵ်ႉမႄးၵုမ်းလုမ်းလႃးပႆႇယဝ်ႉ၊ ဢၼ်မီးတီႈႁိမ်းႁၢၼ်ႉႁွင်ႉၵႂၢမ်း KTV ႁႄႊရီႊပေႃႊတိူဝ်ႊ ၼႂ်းပွၵ်ႉဝဵင်းၵႅဝ်ႈ ၸႄႈဝဵင်းတႃႈၶီႈလဵၵ်း ၼၼ်ႉသေ ပိၼ်ႈတူၵ်းႁွင်ႈ လုၵ်ႉပဵၼ်ၾႆး မီးၵူၼ်းမၢတ်ႇၸဵပ်း 2 ၵေႃႉ ၼႆယဝ်ႉ။
ၵူၼ်းၼုမ်ႇ ၼႂ်းပိုၼ်ႉတီႈတႃႈၶီႈလဵၵ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈဢေႃႈ မႅၼ်ႈမိူဝ်ႈၶဝ်ၵႂႃႇ လႄႇ ၽၢပ်ႇ(Pub / ႁၢၼ်ႉၵိၼ်မူၼ်ႈၵျေႃႇ) မႃးၼၼ်ႉၵႂႃႈ။ သမ်ႉတေဢမ်ႇတၼ်းၾၢင်ႉဢၼ်ပိူၼ်ႈႁၢမ်ႈဝႆႉတီႈႁူဝ်တၢင်း။ ရူတ်ႉၵႃးၶဝ်ၵေႃႈ ႁေႃႈဝႆး ၽိူဝ်ႇထိုင်တီႈဢၼ်ပိူၼ်ႈၶုတ်းႁွင်ႈဝႆႉၼၼ်ႉ ၵူၼ်းၶူပ်းရူတ်ႉဢမ်ႇၵုမ်းရူတ်ႉလႆႈသေ တူၵ်းၵႂႃႇၼႂ်းႁွင်ႈလူင်ၼၼ်ႉ တင်းသွင်လမ်း။ တီႈႁွင်ႈၼၼ်ႉသမ်ႉမီးဝႆႉပႃးလဵၵ်းလႄႈ ဢဝ်လဵၵ်းၸိူဝ်းၼၼ်ႉသဵပ်ႇ တမ်ၺႃး မေႃႈၼမ်ႉမၼ်းၵႃး ၼၼ်ႉလႄႈ လုၵ်ႉပဵၼ်ၾႆးဢေႃႈ ။ ရူတ်ႉၵႃးဢၼ်တူၵ်းၵႂႃႇဢွၼ်တၢင်းၼၼ်ႉ ပဵၼ်ၽူႈၸၢႆးႁေႃႈမႃး။ ၵူၼ်းႁေႃႈၸဵပ်း ၼမ်ဝႆႉ။ ဢၼ်တူၵ်းတၢင်းလင်ၼႆႉတႄႉ ပဵၼ်ၼၢင်းယိင်းႁေႃႈ။ မၼ်းတႄႉဢမ်ႇပေႃးၸဵပ်းၵႃႈႁိုဝ်။ ”- ဝႃႈၼႆ။
ၵႃး 2 လမ်းဢၼ်တူၵ်းႁွင်ႈၼႆႉ ပဵၼ်သႅၼ်းတူဝ်ႇယူဝ်ႇတႃႇ crown လႄႈ ႁွၼ်ႊတႃႉၾိတ်ႉ Honda fit သေ ၵူၼ်းႁေႃႈမၼ်းပဵၼ် ၼုမ်ႇယိင်းၵေႃႉၼိုင်ႈလႄႈၸၢႆးၵေႃႉၼိုင်ႈ ပဵၼ်ၵူၼ်းၼႂ်းၸႄႈဝဵင်းတႃႈၶီႈလဵၵ်းတင်းသွင်။
ၵူၼ်းၼုမ်ႇ ၼႂ်းပိုၼ်ႉတီႈဝဵင်းတႃႈၶီႈလဵၵ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ သဵၼ်ႈတၢင်း ဢၼ်ၶဝ်မႃးပဵၼ်ၽေးၵိုင်ႉၵၢင်ႉၼႆႉ ပိူၼ်ႈမႄးမႃး ၶၢဝ်းတၢင်း 10 ဝၼ်းပၢႆယဝ်ႉၼင်ႇၵဝ်ႇဢေႃႈၼၼ်ႉ ။ မၢင်တီႈၵေႃႈ ဢဝ် မႆႉသၢင်းမႃး ၶႅၼ်ႈဝႆႉယူႇ ။ ၵူၺ်းၼႃႇ ပေႃးၵၢင်ၶမ်ႈၵၢင်ၶိုၼ်းတႄႉ ပေႃးဢမ်ႇၾၢင်ႉတူၺ်းလီလီ တေဢမ်ႇႁၼ် ယွၼ်ႉၼၼ်လႄႈ ၸၢင်ႈပဵၼ်ၽေးထႅင်ႈဢေႃႈ ပေႃးၶဝ် ဢမ်ႇႁၢမ်ႈဝႆႉ လီလီတႄႉ။ ဢၼ်ပဵၼ်ၵႂႃႇၼႆႉၵေႃႈ ၵူၼ်းမႄးတၢင်းၸိူဝ်းဢၼ်ၼွၼ်းပႂ်ႉၸိူဝ်းၼၼ်ႉ မႃးၸၼ်ၵူၼ်းဢွၵ်ႇဝႆးလႄႈ ဢမ်ႇတၼ်းတၢႆ ၵူၺ်းဢေႃႈ ၵတ်ႉၵႃႈလႃႈ ” – ဝႃႈၼႆ။
မိူဝ်ႈဝၼ်းတီႈ 7/6/2023 ၼၼ်ႉၵေႃႈ ၾႆးမႆႈႁၢၼ်ႉမႄးရူတ်ႉၶိူင်ႈႁၢၼ်ႉၼိုင်ႈ ၼႂ်းပွၵ်ႉမၢၵ်ႇၵႃႇ ႁူဝ်ၶမ်း ၸႄႈဝဵင်းတႃႈၶီႈလဵၵ်းလၢမ်းမႆႈပႃး ႁၢၼ်ႉ KTV ႁၢၼ်ႉၼိုင်ႈဢၼ်တိတ်းၸပ်း မီးႁိမ်းၵၼ်ၼၼ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ