ၾူၼ်တူၵ်းႁႃႇယႂ်ႇလႄႈ ႁဵတ်းႁႂ်ႈၼမ်ႉႁူၺ်ႈၼမ်ႉႁွင်ႈယိုင်ႈၼွင်း  ထူမ်ႈႁိူၼ်းၵူၼ်းဝၢၼ်ႈႁၢင်ၼႃး ၸႄႈဝဵင်းလႃႈသဵဝ်ႈ ။

မိူဝ်ႈဝႃး ဝၼ်းတီႈ 6/6/2023 ယၢမ်းႁူဝ်ၶမ်ႈ 4 မူင်းၼၼ်ႉ ၾူၼ်တူၵ်းႁႃႇယႂ်ႇ ႁဵတ်းႁႂ်ႈၼမ်ႉႁူၺ်ႈၼမ်ႉလွႆ ယိုင်ႈၼွင်းထူမ်ႈႁိူၼ်းၵူၼ်းမိူင်း ဝၢၼ်ႈႁၢင်ၼႃး  ႁူဝ်ႉဝၢင်း သုမ်ႉသိုင်ႇၸိူဝ်းၼႆႉလူႉၵွႆတင်းၼမ် ။

ၵူၼ်းၼႂ်းပိုၼ်ႉတီႈၸႄႈဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ပီၼႆႉ ၾူၼ်တိုၵ်ႉတူၵ်းဢိတ်းၼိုင်ႈၵွႆးၵေႃႈ ၼမ်ႉပေႃးထူမ်ႈၶႃႈယဝ်ႉ ။   မၼ်းတေတူၵ်းတၢင်းႁူဝ်မၼ်းယႂ်ႇၶႃႈၵႂႃႈ ၸင်ႇဝႃႈ ၼမ်ႉပေႃးၼွင်းၼႆႉ။ ၽူၼ်မႃးတီႈၼႆၼႆႉ မွၵ်ႈ 15 မိၼိတ်ႉၼႆႉၵူၺ်း။ ၼမ်ႉၼွင်းယိုင်ႈယႂ်ႇသေပီၵၢႆဢေႃႈ။ ၼမ်ႉၶဝ်ႈထိုင် ၼႂ်းဝၢင်းႁိူၼ်းၸိူဝ်းၼႆႉဢေႃႈ။ ဢၼ်လူႉၵွႆႈတႄႉ တေပဵၼ် ႁူဝ်ႉဢုတ်ႇႁူင်းႁဵၼ်းလူင်ပွင်ၸိုင်ႈ ၼႂ်းဝၢၼ်ႈၼႆႉဢေႃႈ ။ ၵူၼ်ႇပင်း ပဵၼ်ထႅဝ်လူင်ၵႂႃႇ။ ႁူဝ်ႉဝၢင်း ႁိူၼ်းၵူၼ်းဝၢၼ်ႈၵေႃႈ ၵူၼ်ႇပင်းၵမ်ႈၽွင်ႈယူႇ” – ဝႃႈၼႆ။

ဝၢၼ်ႈႁၢင်ၼႃးၼႆႉ ပေႃးပဵၼ်ၶၢဝ်းၾူၼ်ၼႆ ၵူၼ်းဝၢၼ်ႈထူပ်းၽေးၼမ်ႉထူမ်ႈၵူႈပီ ၵွပ်ႈၼၼ် ၶႂ်ႈမႄးၶုတ်းလၢင်းႁွင်ႈမိူင် ၼင်ႇႁိုဝ် ၼမ်ႉႁူၺ်ႈၼမ်ႉလွႆလႆလႆႈလီလီသေ တေဢမ်ႇလူၼ်ႉၶဝ်ႈထိုင် ၼႂ်းဝၢင်းႁိူၼ်းလႆႈ ။

ၵူၼ်းၼႂ်းပိုၼ်ႉတီႈၸႄႈဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၶႂ်ႈပဵၼ်တႄႉၵေႃႈ ၶႂ်ႈႁႂ်ႈၸွႆႈၵၼ်ၶုတ်းႁွင်ႈၼမ်ႉ တႃႇၼမ်ႉႁူၺ်ႈ ၼမ်ႉလွႆ လႆႈၵႂႃႇတၢင်ႇတၢင်း ယႃႇႁႂ်ႈမၼ်း ထူမ်ႈမႃးတၢင်း ၼႂ်းဝၢၼ်ႈ  ။ မွင်းၾၢႆႇတၢင်း ၾၢႆႇၽွင်းငမ်းၶဝ်ၸွႆႈၶိုင်ပၼ်တႄႉတႄႉၶႃႈဢေႃႈ။  ” – ဝႃႈၼႆ။

ၽွင်းၶဝ်ႈဝႃႇသႃ ပီ 2022 ပူၼ်ႉမႃးၼႆႉၵေႃႈ တီႈဝၢၼ်ႈႁၢင်ၼႃး ၸႄႈဝဵင်းလႃႈသဵဝ်ႈ ၸိုင်ႈတႆး ၾူၼ်တူၵ်းထပ်းၵၼ်ႁၢဝ်ႈႁႅင်း လၢႆဝၼ်း   ႁဵတ်းႁႂ်ႈၼမ်ႉပႃႇ လႆၼွင်းထူမ်ႈ ၸွမ်းႁိူၼ်းယေး ၵၢင်ဝၢၼ်ႈ၊ သဵၼ်ႈတႃႇသၢႆတၢင်းလႄႈ ႁူဝ်ႉဢုတ်ႇ ၸိူဝ်းၼႆႉ ၵူၼ်ႇပင်း လူႉၵွႆၼမ်ၼင်ႇၵဝ်ႇ  ။