တိူၵ်ႈသွၼ်လိၵ်ႈသင်ၶၸဝ်ႈ တီႈဝဵင်းမိူင်းၶၢၵ်ႇ တႄႇပိုတ်ႇသွၼ်ႁဵၼ်းလိၵ်ႈ ပဵၼ်ပွၵ်ႈၵမ်းႁႅၵ်း မီးသင်ၶၸဝ်ႈ မႃးႁဵၼ်း 56 တူၼ်။

ပူၼ်ႉမႃး မိူဝ်ႈဝၼ်းတီႈ 4/6/2023 ယူႇတီႈ ၸဝ်ႈၶူးၸၼ်ႇတႃႇဝႃႇရ (တူႉပီႈၸၼ်) ဢွၼ်ႁူဝ်ၼမ်းၼႃးသေ တႄႇပိုတ်ႇတိူၵ်ႈ သွၼ်လိၵ်ႈသင်ၶၸဝ်ႈ ၾၢႆႇမိူင်း(လိၵ်ႈတႆးၶိုၼ်) တီႈဝတ်ႉဝၢၼ်ႈသဵဝ်ႈ ဢိူင်ႇဝၢၼ်ႈၶုမ်ႉ ၸႄႈဝဵင်းမိူင်းၶၢၵ်ႇ ၸႄႈတွၼ်ႈၵဵင်းတုင် ၸိုင်ႈတႆးပွတ်းဢွၵ်ႇၶူင်း ပွၵ်ႈၵမ်းႁႅၵ်ႈ။

ၸဝ်ႈၶူး ၸၼ်ႇတႃႇဝႃႇရ ၽူႈဢွၼ်ႁူဝ်ၼမ်းၼႃႈ ၵေႃႇတင်ႈ တိူၵ်ႈသွၼ်လိၵ်ႈသင်ၶၸဝ်ႈ မိူင်းၶၢၵ်ႇ လၢတ်ႈတီႈၽူႈတွႆႇ ႁွၵ်ႈဝႃႈ – “ပီၼႆႉ ပိုတ်ႇပဵၼ်ပီဢွၼ်တၢင်း သင်ၶၸဝ်ႈ မႃးၶိုၼ်ႈႁဵၼ်း တင်းမူတ်းမီး 56 တူၼ်၊ ၼႂ်းၼၼ်ႉ ၸဝ်ႈသၢင်ႇ 51 တူၼ်၊ မုၼ် ၸၢင်း 5 တူၼ်။ မႃးၵိၼ်ယူႇၼွၼ်း ၼႂ်းတိူၵ်ႈသွၼ်လိၵ်ႈၼႆႉ တင်းမူတ်း။ လွင်ႈတုမ်ႈႁုင်ၵိၼ်တႄႉ ၼိုင်ႈဝၼ်းလဵင်ႉလူ 2 တႃႇ။ ပၼ်ပုၼ်ႈၽွၼ်းၵၼ်သေ တုမ်ႈႁုင်”- ဝႃႈၼႆ။

ၼႂ်းတိူၵ်ႈသွၼ်လိၵ်ႈသင်ၶၸဝ်ႈ တီႈဝတ်ႉဝၢၼ်ႈသဵဝ်ႈၼႆႉ တေၸႂ်ႉလၵ်းသုတ်ႇ ၽႃသႃလိၵ်ႈမိူင်း(လိၵ်ႈတႆးၶိုၼ်) ပဵၼ်လၵ်း သေ ပူင်သွၼ်ၵႂႃႇ။ ယဝ်ႉၵေႃႈ တေပူင်သွၼ်ပႃးထႅင်ႈ လိၵ်ႈတႆး၊ လိၵ်ႈထႆး၊ လိၵ်ႈမၢၼ်ႈလႄႈ ပၢႆးၼပ်ႉ ၸိူဝ်းၼႆႉထႅင်ႈ။

ယၢမ်းလဵဝ် တီႈတိူၵ်ႈသွၼ်လိၵ်ႈဝတ်ႉဝၢၼ်ႈသဵဝ်ႈသမ်ႉ ထူပ်းတၢင်းယၢပ်ႇၽိုတ်ႇဝႆႉ လွင်ႈၼမ်ႉၵိၼ်/ ၼမ်ႉၸႂ်ႉ တႃႇသင်ၶၸဝ်ႈ ယွၼ်ႉပီၼႆႉ ၾူၼ်ဢမ်ႇတူၵ်း ၼမ်ႉၸႂ်ႉသမ်ႉ လႆႈသႂ်ႇလွတ်ႇ လုၵ်ႉၼႂ်းႁူၺ်ႈ/ လွႆသေ ဢဝ်မႃးၸႂ်ႉသွႆ ဝႃႈၼႆ။

“ဝတ်ႉဝၢၼ်ႈသဵဝ်ႈၼႆႉ သမ်ႉယူႇဝႆႉ တီႈၵွင်းသုင်ဝႆႉဢိတ်းၼိုင်ႈ ၼမ်ႉၸႂ်ႉ/ ၵိၼ်သမ်ႉ လႆႈသႂ်ႇလွတ်ႈၼမ်ႉသေ ဢဝ်ၼႂ်း ႁူၺ်ႈ/ လွႆမႃး ၸႂ်ႉ။ ပီၼႆႉ ၾူၼ်ဢမ်ႇတူၵ်းလႄႈ ၼမ်ႉၸႂ်ႉ/ ၵိၼ် ဢမ်ႇၵုမ်ႇထူၼ်ႈ။ ယၢမ်းလဵဝ် လူဝ်ႇတၢင်းၸွႆႈထႅမ် တႃႇ ႁဵတ်းထႅင်ႉၼမ်ႉလႄႈ ၶုတ်းၼမ်ႉမေႃႇ တႃႇၸႂ်ႉသွႆၼႂ်းတိူၵ်ႈသွၼ်လိၵ်ႈၼႆႉ မုင်ႈမွင်းၸဝ်ႈတႃႇၼ တီႈၵႆၸမ် ႁူမ်ႈၵၼ်မႃးလူႇတၢၼ်းယူႇ”- ၸဝ်ႈၶူး ၸၼ်ႇတႃႇဝႃႇရ သိုပ်ႇလၢတ်ႈၼႄၼင်ႇၼႆ။

တႃႇတေပိုတ်ႇမႃး တိူၵ်ႈသွၼ်လိၵ်ႈသင်ၶၸဝ်ႈ တီႈဝဵင်းမိူင်းၶၢၵ်ႇၼႆႉ ပူၼ်ႉမႃး မိူဝ်ႈဝၼ်းတီႈ 19/5/2023 ယူႇတီႈ သင်ၶ ၸဝ်ႈ လႄႈ တၵ်ႉၵႃႇသတ်ႉထႃး ၸင်ႇလႆႈၸတ်းႁဵတ်းပၢင်ၵုမ် ဢုပ်ႇဢူဝ်းၵၼ် တီႈဝတ်ႉဝၢၼ်ႈသဵဝ်ႈ ဢိူင်ႇဝၢၼ်ႈၶုမ်ႉမႃး ။ ဝတ်ႉဝၢၼ်ႈ သဵဝ်ႈ ဢိူင်ႇဝၢၼ်ႈၶုမ်ႉၼႆႉ တေယၢၼ်ၵႆဝဵင်းမိူင်းၶၢၵ်ႇ မွၵ်ႈ 7 လၵ်း။

ၼႂ်းတူင်ႇဝဵင်းမိူင်းၶၢၵ်ႇၼႆႉ မီး 4 ဢိူင်ႇ 20 ဝၢၼ်ႈပၢႆ။ မီးပီႈၼွင်ႉတႆးလိုဝ်ႉ၊ ၶိုၼ် လႄႈဢႃးၶႃႇ ၊ မူးသိူဝ်း ၊ ဢႅၼ်ႇ ယူႇသဝ်း ႁူမ်ႈၵၼ်။