မိူဝ်ႈၼႆႉ ဝၼ်းတီႈ 2/6/2023 ၵၢင်ဝၼ်း 11 မူင်းၼၼ်ႉ ၵႃးလမ်းၼိုင်ႈ ၺႃးယိုဝ်း ၼိူဝ်ႈသဵၼ်ႈတၢင်းၵႂႃႇပၢင်ႇပေႃႉ ၵွပ်ႉၾ်ရီႊၵျီႊၼႃႊ ၼႂ်းပွၵ်ႉသၼ်သၢႆး (ၵ) ၸႄႈဝဵင်းတႃႈၶီႈလဵၵ်းၼၼ်ႉသေ မီးၵူၼ်းမၢတ်ႇၸဵပ်းၵေႃႉၼိုင်ႈ။
ၵူၼ်းၼုမ်ႇၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ဝႃႈၼၼ်ၶႃႈယဝ်ႉ မီးၵူၼ်းၶီႇရူတ်ႉၶိူင်ႈသေ လမ်းယိုဝ်းၼႆဢေႃႈ ။ ၼႂ်းၵႃးၼၼ်ႉတေမီးၵူၼ်းလၢႆၵေႃႉၼႆတႄႉ ႁဝ်းၵေႃႈ ဢမ်ႇႁူႉၸွမ်း ၵူၺ်းၼႃႇ ဢၼ်တိူဝ်ႉမၢၵ်ႇၵွင်ႈၼႆႉ မီးၵေႃႉၼိုင်ႈၼႆၼႃႇ။ ဝၢႆးၼၼ်ႉ ၾၢႆႇ တပ်ႉသိုၵ်းၶဝ် ယႄးၶဝ် မႃးပႂ်ႉပေႃး တဵမ်ၵႂႃႇသဵင်ႈယဝ်ႉ ႁိမ်းၼၼ်ႉ” – ဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ လွင်ႈၵေႃႇၵၢၼ်ႁၢႆႉ ၼႂ်းၸႄႈဝဵင်းတႃႈၶီႈလဵၵ်း မီးၼမ်မႃး ၶိူဝ်းယႂ်း။ ၵူၼ်းတၢင်ႇတီႈ သီႇလႅၼ်ၵေႃ ၶဝ်ႈမႃးထင်သဝ်းၼမ်လႄႈ ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ လွင်ႈၵႂႃႇလွင်ႈပႆ။
ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တႃႈၶီႈလဵၵ်းၼႆႉ မိူၼ်ၼင်ႇႁူႉၵၼ်ယူႇ ယဝ်ႉၶႃႈၼႃႇ။ ၵူၼ်းတီႈလႂ်တီႈလီလၢႆလၢႆဢမ်ႇႁူႉ ။ ပေႃးယဝ်ႉၵေႃႈ ၵူၼ်းယိပ်းၵွင်ႈၵၢင်ႇၵေႃႈ ၼမ်ၼႃႇ ၵဝ်ယိုဝ်းမႂ်း မႂ်းယိုဝ်းၵဝ် ၸိူဝ်းၼႆႉ ၵႆႉၵႆႉမီးၼႃႇ။ ဢၼ်ပဵၼ်မိူဝ်ႈၼႆႉၵေႃႈ ယွၼ်ႉလွင်ႈသုၼ်ႇတူဝ်ၶဝ်ၵူၺ်းၶႃႈၵႂႃႈ ” – ဝႃႈၼႆ ။
သိုဝ်ႇၶၢဝ်ႇၼႂ်းပိုၼ်ႉတီႈ တႃႈၶီႈလဵၵ်း(တာချီလိတ်မဏ္ဍိုင်)ဢွၵ်ႇဝႆႉဝႃႈ ဢၼ်ၺႃးယိုဝ်းသေ မၢတ်ႇၸဵပ်းၼႆႉ ပဵၼ်ၽူႈမီးၸၼ်ႉ ၼႂ်းတပ်ႉၸုမ်းပျီႇတုၸိတ်ႉတႃႈလိူဝ်ႇၵေႃႉၼိုင်ႈ ဝႃႈၼႆဝႆႉ။
တႃႈၶီႈလဵၵ်းၼႆႉ ယွၼ်ႉသဵၼ်ႈမၢႆႁူဝ်ၵူၼ်းၵေႃႈၼမ်မႃးလႄႈ ၽေးၵိုင်ႉၵၢင်ႉရူတ်ႉၶိူင်ႈၵေႃႈမီးၵူႈဝၼ်းသေ ၽူႈလၵ်ႉၸၵ်ႉၶုတ်ႈၵေႃႈလိူင်ႇၼမ် ၶိူင်ႈၶူဝ်းၸႂ်ႉသွႆၼႂ်းႁိူၼ်းၼႂ်းယေးၵူၼ်းမိူင်းၵေႃႈ ၺႃးလၵ်ႉယူႇၵူႈမိုဝ်ႉၵူႈဝၼ်း။
မိူဝ်ႈဝၼ်းတီႈ 27/5/2023 ၼၼ်ႉၵေႃႈ ထူပ်းႁၼ်တူဝ်တၢႆ ၵူၼ်းၸၢႆးၵေႃႉၼိုင်ႈ ၺႃးယိုဝ်းသေ ပႅတ်ႈဝႆႉႁိမ်းပႃႇႁဵဝ်ႈ(ငါးပါးသီလသင်္ချိုင်း) ၼႂ်းဢိူင်ႇၵွင်းၵႄး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။