ၵူၼ်းပၢႆႈၽေးသိုၵ်း 468 ၵေႃႉ ဢၼ်မႃးသွၼ်ႈဝႆႉတီႈ ဝတ်ႉရတၼႃႇသူၺ်ႇၵူႇ ဝဵင်းသီႇပေႃႉၼၼ်ႉ ယွၼ်ႉငဝ်းလၢႆး ၼႂ်းပိုၼ်ႉတီႈပၢင်တိုၵ်းသိုၵ်းသိူဝ်ယဵၼ်ဝႆႉလႄႈ ဢွၼ်ၵၼ်ဝၢႆႇပွၵ်ႈၶိုၼ်းႁိူၼ်းယေးၽႂ်မၼ်းမူတ်းယဝ်ႉ ဝႃႈၼႆ။
ဝၼ်းတီႈ 11/04/2018 ယၢမ်းၵၢင်ၼႂ် 9:30 မူင်း ပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ တင်း ၸုမ်းၸွႆႈထႅမ် ၵူၼ်းပၢႆႈၽေး ပရႁိတ သီႇပေႃႉ ႁူမ်ႈၵၼ်သေ ႁၢင်ႈႁႅၼ်းၶပ်းၶိုင် သူင်ႇၵူၼ်းပၢႆႈၽေးသိုၵ်း ဝၢၼ်ႈပၢင်ၶႃးတင်း ဝၢၼ်ႈထၢင်ၸၢင်ႉ ဢၼ်မႃးသွၼ်ႈဝႆႉတီႈ ဝတ်ႉရတၼႃႇသူၺ်ႇၵူႇ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ယွၼ်ႉငဝ်းလၢႆးပၢင် တိုၵ်းသိုၵ်းသိူဝ် ၼႂ်းပိုၼ်ႉတီႈယဵၼ်ဝႆႉလႄႈ ၸင်ႇလႆႈႁၢင်ႈႁႅၼ်းသူင်ႇပွၵ်ႈမိူဝ်း ဝႃႈၼႆ။
ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေး ႁဝ်းၶႃႈၵေႃႈ ၶႂ်ႈပွၵ်ႈႁိူၼ်းၶႃႈယဝ်ႉ။ ယွၼ်ႉၼၼ် ႁဝ်းၶႃႈ လႆႈၵပ်းသိုပ်ႇတွင်ႈထၢမ် ၵႂႃႇတီႈတပ်ႉသိုၵ်း တင်းသွင် ၾၢႆႇ တပ်ႉသိုၵ်း RCSS တင်း TNLA သေ ယွၼ်ႉၵူၼ်းမိူင်းၶႂ်ႈပွၵ်ႈႁိူၼ်းၵၼ်ၶႃႈယဝ်ႉ ၸွင်ႇတေသူင်ႇပွၵ်ႈမိူဝ်းလႆႈ တပ်ႉသိုၵ်းတင်းသွင်ၾၢႆႇၵေႃႈ လၢတ်ႈဝႃႈ သူင်ႇပွၵ်ႈမႃးလႃႈ ၼႆသေ ၶႃႈႁဝ်းၵေႃႈ ၸင်ႇလႆႈႁၢင်ႈႁႅၼ်းၸတ်းၵၢၼ်သေ သူင်ႇပွၵ်ႈမိူဝ်းၶိုၼ်း။ ႁဝ်းၶႃႈ လႆႈၸတ်းႁၢင်ႈႁႅၼ်းလူတ်ႉၵႃးသေ သူင်ႇပွၵ်ႈတင်းသွင်ဝၢၼ်ႈ” ဝႃႈၼႆ။
သိုပ်ႇလၢတ်ႈဝႃႈ တေႃႈလဵဝ်တႄႉ တီႈၵျွင်းဝိႁၢရ်မေႃႇၵိူဝ်တင်း ဝတ်ႉရတၼႃႇသူၺ်ႇၵူႇၵေႃႈ ၵူၼ်းပၢႆႈၽေးဢွၼ်ၵၼ် ပွၵ်ႈမိူဝ်းၶိုၼ်းႁိူၼ်းယေးၽႂ်မၼ်းၸဵမ်လႂ်ယဝ်ႉ ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉရတၼႃႇသူၺ်ႇၵူႇ တင်းမူတ်း ႁူဝ်ၵူၼ်းမီး 468 ၵေႃႉ ပဵၼ်ဝၢၼ်ႈထၢင် ၸၢင်ႉ လင်ႁိူၼ်း 34 လင်၊ ႁူဝ်ၵူၼ်း 130 ၵေႃႉ၊ ၸၢႆး 40 ၵေႃႉ၊ ယိင်း 90 ၵေႃႉ။ ဝၢၼ်ႈပၢင်ၶႃးသမ်ႉ လင်ႁိူၼ်း 93 လင်၊ ႁူဝ်ၵူၼ်း 338 ၵေႃႉ၊ ၸၢႆး 120 ၵေႃႉလႄႈ ယိင်း 218 ၵေႃႉ။ ၵူၼ်းပၢႆႈၽေးသိုၵ်းၸိူဝ်းၼႆႉ ဢွၼ်ၵၼ်ပၢႆႈမႃး ၸဵမ်မိူဝ်ႈႁၢင်လိူၼ်မၢတ်ႊၶျ် 2018 ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 09/04/2018 ၼၼ်ႉၵေႃႈ လႆႈသူင်ႇၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉမေႃႇၵိူဝ် ၸႄႈဝဵင်းသီႇပေႃႉ လင်ႁိူၼ်း 113 လင်၊ ႁူဝ်ၵူၼ်း 346 ၵေႃႉ၊ ၸၢႆး 119 ၵေႃႉလႄႈ ယိင်း 227 ၵေႃႉ။ ၵူၼ်းပၢႆႈၽေး သိုၵ်း ဢၼ်လႆႈႁၢင်ႈႁႅၼ်းသူင်ႇပွၵ်ႈမိူဝ်းၼၼ်ႉ ပဵၼ်ၵူၼ်းမၢၼ်ႈလွႆ ၸႄႈဝဵင်းသီႇပေႃႉ ဝႃႈၼႆ။
ဢၼ်ၵူၼ်းမိူင်းလႆႈပၢႆႈၼႆႉ ပဵၼ်ယွၼ်ႉတပ်ႉသိုၵ်း TNLA တင်း RCSS ႁဵတ်းပၢင်တိုၵ်းႁိမ်ပိုၼ်ႉတီႈၵၼ် ႁၢဝ်ႈႁႅင်း လႄႈ ၸင်ႇလႆႈပႃးၵၼ်ပၢႆႈ ဝႃႈၼႆ။
