သိုၵ်း TNLA တင်း RCSS/SSA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းသီႇပေႃႉ ၵူၼ်းမိူင်း 400 ပၢႆ ဢွၼ်ၵၼ်ပၢႆႈ ၽေး သိုၵ်း ႁွတ်ႈၽႅဝ်ဝႆႉ ၼႂ်းဝဵင်းသီႇပေႃႉ။
ဝၼ်းတီႈ 21-22/03/2018 ၼႆႉ ၵူၼ်းမၢၼ်ႈလွႆ ဢိူင်ႇဢုမ်မူႉ ၸႄႈဝဵင်းသီႇပေႃႉ ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ် ဝႆႉတီႈ ဝတ်ႉမေႃႇၵိူဝ် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ တေမီးႁူဝ်ၵူၼ်း 400 ပၢႆ ဝႃႈၼႆ။
ၸၢႆးႁၢၼ် ၵူၼ်းမၢၼ်ႈလွႆ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၼ်ၵၼ်ပၢႆႈလူင်းမႃး ယွၼ်ႉသိုၵ်း TNLA တင်း RCSS ပဵၼ်ပၢင်တိုၵ်းၵၼ် မီး 9-10 ဝၼ်းယဝ်ႉ။ ပၢင်တိုၵ်းၼႆႉသမ်ႉသုတ်ႉ ၶဝ်ႈမႃးၸမ်ဝၢၼ်ႈႁဝ်း ၸင်ႇဢွၼ်ၵၼ်ပၢႆႈလူင်း မႃးဝႆႉၵွၼ်ႇ။ သင်ဝႃႈ ပၢင်တိုၵ်းပဵၼ်ၼႂ်းဝၢၼ်ႈႁဝ်း ၵူဝ်ဢမ်ႇတၼ်းပၢႆႈ” ဝႃႈၼႆ။
ၵူၼ်းပၢႆႈၽေး ဢၼ်ပၢႆႈလူင်းမႃး ၵမ်ႈၼမ် ပဵၼ်ၵူၼ်းထဝ်ႈ၊ လုၵ်ႈဢွၼ်ႇလႄႈ ၼၢင်းယိင်း ၵူၼ်းၼုမ်ႇၽူႈၸၢႆးသမ်ႉ ပႂ်ႉႁိူၼ်း ဝႃႈၼႆ။
ၸၢႆးႁၢၼ် လၢတ်ႈဝႃႈ တေႃႈလဵဝ် ၽူႈမၢႆ ၽူႈယႂ်ႇၵူၼ်းလူင်ဝၢၼ်ႈၵေႃႈတိုၵ်ႉပႂ်ႉဝၢၼ်ႈဝႆႉယူႇ။ လိူဝ်ၼၼ်ႉ ဝႆႉ ၵူၼ်းပႂ်ႉ ႁိူၼ်းၼိုင်ႈႁိူၼ်း 1-2 ၵေႃႉ ၵူၺ်း။ ႁဵတ်းၼၼ်သေ ပႂ်ႉဝႆႉ။
ၵူၼ်းပၢႆႈၽေးသိုၵ်း 400 ပၢႆ ၼႆႉ ပဵၼ်ၵူၼ်းဝၢၼ်ႈ မၢၼ်ႈလွႆ တင်းမူတ်း။ မိူဝ်ႈဝၼ်းတီႈ 21 ၼၼ်ႉ ယူႇတီႈ ၸုမ်းၸွႆႈထႅမ်ၵူၼ်းပၢႆႈၽေး ပရႁိတ သီႇပေႃႉ လႆႈၵႂႃႇႁပ်ႉမႃးဝႆႉတီႈဝတ်ႉမေႃႇၵိူဝ် 320 ၵေႃႉ။ ၼႂ်းဝၼ်းတီႈ 22 သမ်ႉ ဢွၼ်ၵၼ်ပၢႆႈမႃးထႅင်ႈ ႁိမ်း 40 ၵေႃႉ၊ ဢၼ်ပၢႆႈ ၵႂႃႇယူႇသဝ်းၸွမ်းႁိူၼ်းပီႈႁိူၼ်းၼွင်ႉ ၼႂ်းသီႇပေႃႉၵေႃႈ မီးၵမ်ႈၽွင်ႈ ဝႃႈၼႆ။
တႄႇဢဝ်ဝၼ်းတီႈ 10 လိူၼ်ၼႆႉမႃး သိုၵ်း TNLA တင်း RCSS/SSA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်း ၼမ်ႉတူႈ တင်း ၸႄႈဝဵင်းၵျွၵ်ႉမႄး၊ ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ ဢွၼ်ၵၼ်ပၢႆႈၽေးသိုၵ်း ၼပ်ႉႁူဝ်ႁဵင် ဝႃႈၼႆ။
