မိူဝ်ႈဝႃးဝၼ်းတီႈ 28/5/2023 ယၢမ်းႁူဝ်ၼႂ် 3 မူင်းၼၼ်ႉ သွင်ထဝ်ႈပူႇဢွၵ်ႇ ၶီႇရူတ်ႉၶိူင်ႈမႃး ၺႃးၵႃးၽႃႇ တီႈၼႃႈဝၢၼ်ႈၵဵင်းၽွင်း ဢိူင်ႇယၢင်းလေႃး ၸႄႈဝဵင်းၵဵင်းတုင် ရူတ်ႉၶိူင်ႈလႅဝ်ၽႅဝ်ႉ သွင်ထဝ်ႈတၢႆထင်တီႈ။

ၽူႈတူင်ႉၼိုင်ၼႂ်းၸုမ်းတႆးၼိူဝ် ၾၢႆႇၸွႆႈထႅမ်ၶႅၵ်ႇလီပၢင်ၸႃႉလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၽွင်းသွင်ထဝ်ႈၺႃးၵႃးၽႃႇၼၼ်ႉ မိူင်းပႆႇလႅင်း  ၊ ယင်းပႆႇႁၼ်တႃလီလီ ။ ပိူၼ်ႈထူဝ်းႁွင်ႉၸုမ်းႁဝ်းသေ လႆႈၵႂႃႇတူၺ်းဢေႃႈ ။ မိူဝ်ႈႁဝ်းၵႂႃႇႁွတ်ႈၼၼ်ႉ ။ ၵူၼ်းႁေႃႈၵႃးၼၼ်ႉၵေႃႈ မိူၼ်မဝ်းႁႅင်းဝႆႉ  ၊ မၼ်းၵေႃႈမၢတ်ႇၸဵပ်းၶႂ်ႈလိူဝ်ၸႂ်ဝႆႉဢေႃႈ။   ၵူၼ်းထဝ်ႈ သွင်ၵေႃႉဢၼ်ၶီႇရူတ်ႉၶိူင်ႈမႃးၼၼ်ႉတႄႉတၢႆထင်တီႈဢေႃႈ သွင်ၶႃ လႅပ်ႈဢၢၼ်းတေၵႂႃႇၶၢႆၶူဝ်းၼႂ်းၵၢတ်ႇၵႂႃႈတူၺ်းတႄႉ ။ ဢွၵ်ႇႁိူၼ်းမႃးႁေ မႃးပဵၼ်ၽေးၵိုင်ႉၵၢင်ႉပၢၵ်ႇၼႃႈဝၢၼ်ႈၶဝ် ၼၼ်ႉၵမ်းလဵဝ်ဢေႃႈၼၼ်ႉ ” – ဝႃႈၼႆ။

သွင်ထဝ်ႈၽူဝ်မေးဢၼ်ၺႃးၵႃးၽႃႇသေလူႉတၢႆၵႂႃႇၼႆႉ  ၸိုဝ်ႈ လုင်းတၢၼ်း ဢႃယု 57 ပီ ၊ ပႃႈၸိင်ႇ ဢႃယု 58 ပီ  ယူႇဝၢၼ်ႈၵဵင်းၽွင်း ဢိူင်ႇယၢင်းလေႃး ၸႄႈဝဵင်းၵဵင်းတုင်။ ၾၢႆႇၸွႆႈထႅမ်ၶႅၵ်ႇလီပၢင်ၸႃႉတႆးၼိူဝ် ၸွႆႈဢဝ်ၶၢပ်ႈတူဝ် သူင်ႇၵူတ်ႇထတ်းတီႈႁူင်းယႃယဝ်ႉ လီငၢမ်းသေ တေပူၼ်ႉၶၢပ်ႈတူဝ်တၢႆ မိူဝ်ႈၽုၵ်ႈ ဝၼ်းတီႈ 30/5/2023 ၼႆယဝ်ႉ။

ၽူႈတူင်ႉၼိုင်ၼႂ်းၸုမ်းတႆးၼိူဝ် ၾၢႆႇၸွႆႈထႅမ်ၶႅၵ်ႇလီပၢင်ၸႃႉသိုပ်ႇလၢတ်ႈဝႃႈ – ၼိူဝ်သဵၼ်ႈတၢင်းဢၼ်ၶဝ်ပဵၼ်ၼႆႉ ၵႆႉၵႆႉပဵၼ်ၽေးၵိုင်ႉၵၢင်ႉဢေႃႈ။ သဵၼ်ႈတၢင်းသမ်ႉလီၼႃႇလူး ။ ၸဝ်ႈၵႃး ၵမ်ႈၼမ်သမ်ႉ တေႁေႃႈဝႆးၼၼ်ႉၶႃႈၼႃႇၼေႃႈ။ တီႈၵဵင်းတုင်ၼႆႉ ၼိုင်ႈလိူၼ်လႂ် မွၵ်ႈ 10 ပွၵ်ႈပၢႆၼႆႉတႄႉ ရူတ်ႉၵႃးၼႆႉတႄႉ တိုၼ်းၽႃႇၵၼ် တမ်ၵၼ်ယူႇယဝ်ႉ” -ဝႃႈၼႆ။

ၼႂ်းလိူၼ်မေႊၼႆႉၵူၺ်း ၼႂ်းၸႄႈဝဵင်းၵဵင်းတုင် ပဵၼ်ၽေးၵိုင်ႉၵၢင်ႉ ရူတ်ႉၵႃးၽႃႇၵၼ် ပိၼ်ႈၶႂမ်ႈ ၸိူဝ်းၼႆႉ ပဵၼ်မႃးၼမ် မီးၵူၼ်း မၢတ်ႇၸဵပ်းလူႉတၢႆၸွမ်း ဢမ်ႇယွမ်း 10 ၵေႃႉ။

မိူဝ်ႈဝၼ်းတီႈ 28/5/2023 ၵူၺ်းၼင်ႇၵဝ်ႇ ယၢမ်းၵၢင်ၶမ်ႈ 10 မူင်းၼၼ်ႉ သွင်ပေႃႈလုၵ်ႈ ပဵၼ်ၽေးၵိုင်ႉၵၢင်ႉရူတ်ႉၶိူင်ႈလူမ်ႉ တီႈႁိမ်းၶူင်ႇႁိူဝ်းမိၼ် ၸႄႈဝဵင်းတႃႈၶီႈလဵၵ်းၼၼ်ႉသေ ၵေႃႉပဵၼ်ပေႃႈလူႉတၢႆထင်တီႈ။