မိူဝ်ႈၼႆႉ ဝၼ်းတီႈ19/5/2023 ယၢမ်းၵၢင်ၼႂ် 6 မူင်းၶိုင်ႈၼၼ်ႉ ၵႃးၽႃႇၺႃး ရူတ်ႉၶိူင်ႈ(လေႃႉၶၢႆၶဝ်ႈသွႆး) (ဘေးတွဲဆိုင်ကယ်) တီႈသဵၼ်ႈတၢင်းလူင် ၾၢႆႇၼႃႈႁူင်းႁဵၼ်းၸၼ်ႉသုင် ႁိမ်းႁူင်းယႃၵဝ်ႇ ၸႄႈဝဵင်းတႃႈၶီႈလဵၵ်း မီးလွင်ႈမၢတ်ႇၸဵပ်းလူႉသုမ်း။
ၽူႈၶဝ်ႈၸုမ်းၸွႆႈတူင်ႇၵူၼ်းဢူးလႃႉမူဝ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၵႃးလမ်းၼိုင်ႈ သမ်ႉႁေႃႈမႃး ၽႂ်းဢိတ်းၼိုင်ႈ မႃးၽႃႇသႂ်ႇ ရူတ်ႉၶိူင်ႈလေႃႉၶၢႆၶဝ်ႈသွႆး( ဘေးတွဲဆိုင်ကယ်)လမ်းၼိုင်ႈ ဢၼ်တိုၵ်ႉလႅၼ်ႈ ယူႇၼိူဝ် တၢင်းၼၼ်ႉၼႃႇ ။ ၶိူင်ႈၶူဝ်းတၢင်းၶၢႆမၼ်းၸိူဝ်းၼၼ်ႉတႄႉ လူႉၵွႆသုမ်းမူတ်းဢေႃႈ ။ ၵူၼ်းတႄႉ မၢတ်ႇၸဵပ်း လွၵ်ႈ လၢၼ်ႉဢိတ်းဢွတ်း။ ၵူၺ်းၵႃႈ ဢမ်ႇထိုင်တီႈလႆႈမႆႈၸႂ်ၼင်ႇၵဝ်ႇ ။ ၸဝ်ႈၵႃးတႄႉဢမ်ႇပဵၼ်သင် လိူဝ်သေ ႁူဝ်ၵႃးမၼ်းၵွႆၽွင်ႈ။ ၾၢႆႇၵုမ်းရူတ်ႉၵႃး ၶဝ်မႃးတူၺ်းႁေ ဢဝ်လိူင်ႈဢဝ်လၢဝ်းၸဝ်ႈၵႃးၼၼ်ႉယူႇ။ ႁဝ်းၶႃႈတႄႉ ၸွႆႈထႅမ်ႁပ်ႉသူင်ႇၵူၼ်းပဵၼ်ၵူၺ်းၶႃႈၼႄႇၼေႃႈ။ ဢဝ်လိူင်ႈၵၼ်ၸိူင်ႉႁိုဝ်ၼႆတႄႉဢမ်ႇႁူႉၸွမ်းတႅတ်ႈတေႃး။ ” – ဝႃႈၼႆ။
ၵူၼ်းၶၢႆၶဝ်ႈသွႆးၵူဝ်ႈဢၼ်ၺႃးၵႃးၽႃႇၼႆႉ ဢႃယု မီးၸမ်( 50 )ပီ။ ၸႂ်ႉရူတ်ႉၶိူင်ႈတိုတ်ႉလေႃႉၼၼ်ႉသေ လႄႇႁႃၶၢႆၸွမ်းၼႂ်းဝဵင်းၼွၵ်ႈဝဵင်း။ မိူဝ်ႈလဵဝ်ၾၢႆႇၸွႆႈထႅမ်တူင်ႇၵူၼ်းဢူးလႃႉမူဝ်း ၸွႆႈသူင်ႇယူတ်းယႃတူဝ်ယဝ်ႉသေ ၸုမ်းၾၢႆႇၵုမ်းရူတ်ႉၵႃးတိုၵ်ႉထဵတ်ႈထၢမ်လွင်ႈပိူင်ပဵၼ်ၼႆႉယူႇ ၼႆယဝ်ႉ။
မိူဝ်ႈၼႆႉၵူၺ်းၼင်ႇၵဝ်ႇ ၵူၼ်းၸၢႆး ဢႃယု 28 ပီ ၵေႃႉၼိုင်ႈ ပဵၼ်ၽေးၵိုင်ႉၵၢင်ႉရူတ်ႉၶိူင်ႈလူမ်ႉ တီႈမိူင်းၽူင်း( ၶ) ၸႄႈဝဵင်းတႃႈၶီႈလဵၵ်းသေ မၢတ်ႇၸဵပ်းႁၢဝ်ႈႁႅင်း လႆႈႁၢမ်သူင်ႇႁူင်းယႃ ။ ၵေႃႉဢၼ်ပဵၼ်ၽေးၵိုင်ႉၵၢင်ႉၼႆႉ ပဵၼ်ၵူၼ်းပွၵ်ႉပႃႇလႅင်(1) ဝဵင်းတႃႈၶီႈလဵၵ်းဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 8/5/2023 ၼၼ်ႉၵေႃႈ ၵႃးတၢင်ႇၵုၼ်ႇ 6 လေႃႉ လမ်းၼိုင်ႈ ပရိတ်ႈပွင်ႇသေ လေႃႈတမ် သႂ်ႇလွႆ တီႈလွႆပၢင်ၵႂၢႆး ၼိူဝ်သဵၼ်ႈတၢင်းလူင် ၵဵင်းတုင် – တႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လူႉတၢႆ 1 ၵေႃႉ မၢတ်ႇၸဵပ်း 3 ၵေႃႉ။
 (ဘေးတွဲဆိုင်ကယ်) တီႈသဵၼ်ႈတၢင်းလူင် ၾၢႆႇၼႃႈႁူင်းႁဵၼ်းၸၼ်ႉသုင် ႁိမ်းႁူင်းယႃၵဝ်ႇ ၸႄႈဝဵင်းတႃႈၶီႈလဵၵ်း မီးလွင်ႈမၢတ်ႇၸဵပ်းလူႉသုမ်း။){kind=link}